អតីតប្រធានាធិបតីបារាំងត្រលប់ចូលឆាកនយោបាយ ៖ ប្រតិបត្តិការប្រកបដោយហានិភ័យ
ចុះផ្សាយនៅថ្ងៃ៖
ស្តាប់ - ០៤:៥១
ជាផ្លូវការហើយ លោក នីកូឡា សាកូហ្ស៊ី អតីតប្រធានាធិបតីបារាំងពីឆ្នាំ២០០៧-២០១២ បាន ប្រកាសវិលត្រលប់មកប្រលូកក្នុងឆាកនយោបាយវិញ ដោយឈរឈ្មោះជាបេក្ខជនប្រកួតប្រជែងដណ្តើមតំណែងប្រធានគណបក្សស្តាំនិយម។ ការវិលត្រលប់ ដែលបានក្លាយជាបច្ចុប្បន្នភាពមួយយ៉ាងផុសផុលពេញមួយសប្តាហ៍នេះ បញ្ជាក់ច្បាស់អំពីមហិច្ឆតារបស់លោក សាកូហ្ស៊ី ថាមិនកំរិតត្រឹមប្រធានបក្សទេ តែលោកដៅឆ្ងាយដល់ឆ្នាំ២០១៧ ចង់ក្លាយជាបេក្ខជនប្រធានាធិបតី ជាប្រធានាធិបតីបារាំងជាថ្មី។ តើដែលធ្លាប់មានទេ ក្នុងប្រវត្តិនយោបាយដែលប្រធានាធិបតីផុតអាណត្តិទៅហើយវិលមករកកាន់អំណាចជាថ្មី ? ចុះតើមហិច្ឆតានេះ អាចនឹងទទួលជោគជ័យ និងការគាំទ្រយ៉ាងណា ?
តាំងពីចប់អាណត្តិជាប្រធានាធិបតី និងក្រោយចាញ់ឆ្នោតឆ្នាំ២០១២មក លោកសាកូហ្ស៊ី ចេញមុខចេញនិងចេញសំដីតិចតួចបំផុត ! លោកធ្លាប់ទាំងបានអះអាងថាមិនវិលមកធ្វើនយោបាយវិញទេ ប៉ុន្តែមហិច្ឆតា និងចិត្តជាមនុស្សសកម្មបានយកឈ្នះ នៅថ្ងៃអាទិត្យទី ២១កញ្ញាលោកបានប្រកាសជាផ្លូវការចូលប្រឡូកក្នុងឆាកនយោបាយជាថ្មី តាមរយៈការឈរឈ្មោះជាបេក្ខជនប្រកួតប្រជែងយកតំណែងប្រធានគណបក្សស្តាំនិយមUMP។ ការវិលត្រលប់ដែលលោកបានរៀបយុទ្ធសាស្ត្រចេញផ្សាយដំណឹង តាមប្រព័ន្ធសង្គមនៅថ្ងៃដំបូង និងផ្តល់បទសម្ភាសន៍ ផ្លូវការតាមកញ្ចក់ទូរទស្សន៍ជាតិនៅពីរថ្ងៃបន្ទាប់ ដើម្បីពន្យល់អំពីមូលហេតុនៃការវិលត្រលប់នេះ។
ដោយសារមានសម្បជញ្ញៈ យល់ថាមិនអាចឈ្នះទៅរួចដោយម្នាក់ឯង និងដោយមានភាពចាស់ទុំនយោបាយ លោកអតីតប្រធានាធិបតីចង់យកបទពិសោធន៍មកបំរើជាតិ ទើបសុទ្ធចិត្តចូលធ្វើនយោបាយជាថ្មី។
លោក នីកូឡា សាកូហ្ស៊ី ៖ “ខ្ញុំមិនដែលឃើញបណ្តាជនបារាំងអស់សង្ឃឹម ខឹង និងគ្មានសោះទស្សនវិស័យសម្រាប់អនាគតយ៉ាងដូច្នេះទេ ! ជាមួយបទពិសោធន៍ជាច្រើនរបស់ខ្ញុំ និងចេតនាចង់ផ្តល់ជម្រើសថ្មីដល់ជនរួមជាតិ ខ្ញុំពិតជាមិនអាចឈរមើលបារាំងរលំរលាយ ពលរដ្ឋអស់ជំនឿលើនយោបាយ គណបក្សស្តាំនិយមUMPបែកបាក់ឡើយ! ខ្ញុំយល់ហើយខ្ញុំសំងំ ស្ងៀម នៅក្នុងផ្ទះឬ? ខ្ញុំមិនចង់ឱ្យប្រទេសបារាំងក្លាយជាវត្ថុសម្រាប់គេបង្អាប់លេង ឬអនាគតឯកា ដែលជាទស្សនៈរបស់ក្រុមស្តាំជ្រុលនិយមទេ ! ក្រោយការត្រិះរិះពិចារណា ការវិលត្រលប់របស់ខ្ញុំមិនមែនត្រឹមតែជាចំណង់បុគ្គលទេ តែគ្មានជម្រើស !”
ក្រៅអំពីត្រូវការស្ថាបនាបក្សស្តាំនិយម ឱ្យរឹងមាំឡើងវិញ សក្តិសមជាបក្សប្រឆាំងខ្លាំងក្លា កុំឱ្យក្រុមអ្នកកាន់អំណាចជិះសេះលែងដៃពេក មហិច្ឆតារបស់លោកសាកូហ្ស៊ីមិនបញ្ឈប់ត្រឹមប្រធានគណបក្សឡើយ ! ថ្វីបើលោកមិនទាន់ចេញស្តីមែន ប៉ុន្តែគ្រប់គ្នាយល់ច្បាស់អំពីទិសដៅចុងក្រោយរបស់លោក គឺត្រលប់មកកាន់វិមានអេលីហ្សេនៅឆ្នាំ២០១៧ ពោលគឺប្រធានាធិបតីបារាំង។
ហេតុដូច្នេះហើយបានជាការវិលត្រលប់នេះ ត្រូវបានទទួលការចាប់អារម្មណ៍ខ្លាំង ទាំងសម្រាប់គ្រួសារគណបក្សអ្នកស្តាំនិយម និងគណបក្សកាន់អំណាច ព្រមទាំងពលរដ្ឋ។ ឆាកឈុតនៃការរៀបខ្លួនឡើងឆាកនយោបាយរបស់លោក សាកូហ្ស៊ី អាចចាត់ទុកថាជោគជ័យ មានមនុស្សចូលLikes ក្នុងទំព័រហ្វេសប៊ូកសឹងចូលដល់លាននាក់ តែប៉ុន្មានថ្ងៃ និងជាបច្ចុប្បន្នភាពយ៉ាងពុះកញ្ជ្រោលពេញមួយសប្តាហ៍នេះ ! ប៉ុន្តែបើនិយាយអំពីខ្លឹមសារស៊ីជម្រៅវិញ តើវាមិនមែនជាការចម្លែកពេកទេឬដែលប្រធានាធិបតីផុតអាណត្តិទៅហើយត្រលប់មកធ្វើនយោបាយវិញនោះ ?!
នេះជាលើកទីមួយហើយ នៅក្នុងប្រវត្តិប្រទេសបារាំងសាធារណរដ្ឋ ទី៥ ដែលក្រោយពីចប់អាណត្តិនិងដោយចាញ់ឆ្នោតហើយ អតីតប្រធានាធិបតីហ៊ានបកមកធ្វើនយោបាយទៀតនោះ។ អតីតប្រធានាធិបតីបារាំងនៅឆ្នាំ១៩៧៤ ដែលនៅមានជីវិតដល់សព្វថ្ងៃ លោកវ៉ាឡេរី ហ្ស៊ីហ្កាដេស្តាំង ធ្លាប់ត្រឹមបង្ហាញចេតនាចង់វិលមកប្រកួតប្រជែងនយោបាយដើម្បីសងសឹកចង់យកឈ្នះលើគូប្រជែងវិញតែប៉ុណ្ណោះ ប៉ុន្តែមិនបានចេញមុខក្នុងសភាពជាក់ស្តែងដូចលោក សាកូហ្ស៊ី។ ប៉ុន្តែវាមិនចម្លែកហើយក៏មិនខុសអ្វីបើគិតទៅតាមច្បាប់រដ្ឋធម្មនុញ្ញ ដែលប្រធានាធិបតីផុតអាណត្តិហើយ វិលមកកាន់ឆាកនយោបាយនោះ។ គ្រាន់តែថាការវិលត្រលប់របស់លោកសាកូហ្ស៊ី ដាក់ដូចជាឆាប់បន្តិច ព្រោះគេនៅមិនទាន់ភ្លេចសំដីលោក ដែលធ្លាប់មានប្រសាសន៍មិនធ្វើនយោបាយទៀតបើលោកចាញ់ឆ្នោត (២០១២)។ តែនេះគ្រាន់តែជាសំដីអ្នកនយោបាយ។
លោកសាកូហ្ស៊ី ដែលមាននិស្ស័យខាងដឹកនាំគេ មានបុគ្គលិកលក្ខណៈរហ័សរហួន មានឆន្ទៈ និងវៀងវៃ ត្រលប់មកវិញ ដោយអះអាងថាមានភាពចាស់ទុំ មានគតិបណ្ឌិតចេះគិតប្រមាណជាងមុន និងបទពិសោធន៍ច្រើនមែន ប៉ុន្តែមានឧបសគ្គជាច្រើនកំពុងរង់ចាំ។ ថ្វីបើសកម្មជនបក្សស្តាំនិយម៧៣% ចង់ឃើញលោកជាបេក្ខជនប្រធានាធិបតីជាថ្មីនៅឆ្នាំ២០១៧មែន ប៉ុន្តែអ្នកស្និទ្ធិនឹងក្រុមឆ្វេងនិយមដល់ទៅ ៩០%បដិសេធ ហើយត្រូវប្រកួតប្រជែងជាមួយឥស្សរជនដ៏មានឥទ្ធិពលម្នាក់ក្នុងបក្ស ជាអតីតនាយករដ្ឋមន្ត្រីនិងជាបុគ្គលដែលពលរដ្ឋបារាំងចូលចិត្តជាងបំផុត ក្នុងអ្នកនយោបាយបារាំងទាំងអស់ ៖ លោក អាឡាំង ហ្សូប៉េ(Alain Juppé) ដែលបានចុះឈ្មោះ ប្រកួតប្រជែងធ្វើបេក្ខជនប្រធានាធិបតីសម្រាប់បក្សUMP រួចហើយ បានបញ្ជាក់ជាថ្មី តស៊ូប្រកួតប្រជែងដល់ទីបំផុត។ នេះមិនរាប់ពីគូប្រជែងក្នុងបក្សផ្សេងទៀតផង។ ឧបសគ្គចុងក្រោយធំមួយទៀត ដែលអាចរាំងស្ទះផ្លូវនយោបាយអតីតប្រធានាធិបតី គឺសំណុំរឿងតុលាការដ៏ស្មុគស្មាញ។ អតីតប្រមុខរដ្ឋបារាំង អាចជាប់អង្កេត និងជាប់ចោទក្នុងសំណុំរឿងជាច្រើន ប្រទាក់ក្រឡាគ្នា។ លោកសាកូហ្ស៊ីកំពុងល្បងនឹងល្បែងប្រកបដោយហានិភ័យបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ