រឿងអាស្រូវរដ្ឋមន្ត្រីមហាផ្ទៃបារាំងរឿងយកកូនៗជាអនីតិជនមកធ្វើជាជំនួយការសភា
ទូរទស្សន៍បារាំង តេ អិម សេ TMC បានចុះផ្សាយរឿងអាស្រូវរបស់រដ្ឋមន្ត្រីក្រសួងមហាផ្ទៃបារាំង លោកប្រុយណូ ឡឺរូ ទាក់ទងនឹងការដែលគាត់បានយកកូនស្រីទាំង២របស់គាត់ ដែលនៅជាអនីតិជននៅឡើយអោយមកធ្វើជាអ្នកជំនួយការសភា កាលពីគាត់នៅធ្វើជាអ្នក តំណាងរាស្ត្រនៅឡើយ។ ថ្ងៃអង្គារនេះ រដ្ឋមន្ត្រីមហាផ្ទៃនឹងបំភ្លឺរឿង អាស្រូវនេះ នៅចំពោះមុខនាយករដ្ឋមន្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
រឿងអាស្រូវរដ្ឋមន្ត្រីមហាផ្ទៃបារាំង លោកប្រុយណូ ឡឺរូ ធ្លាប់យកកូនៗខ្លួនឯងដែលជាអនីតិជន អោយមកធ្វើជាអ្នកជំនួយការសភានេះ បានកើតឡើង ចន្លោះឆ្នាំ២០០៩ ដល់ឆ្នាំ២០១៦ ក្នុងពេលដែលលោកនៅជាតំណាងរាស្ត្រតំបន់សែន សាំងដឺនី។ កូនស្រីទាំង២របស់រដ្ឋមន្ត្រីមហាផ្ទៃបារាំង ក្នុងពេលធ្វើជាអ្នកជំនួយការសភា នៅជាសិស្សវិទ្យាល័យនៅឡើយ ព្រោះពេលចូលធ្វើការដំបូង គេទាំង២មានអាយុ១៥ទៅ១៦ឆ្នាំប៉ុណ្ណោះ។
ពេលក្លាយជានិស្សិតហើយ ក៏កូនៗរដ្ឋមន្ត្រីមហាផ្ទៃ នៅបន្តធ្វើជាអ្នកជំនួយការសភា។ នៅរដូវក្តៅឆ្នាំ២០១៣ និងខែឧសភាឆ្នាំ២០១៤ ក្មេងស្រីទាំង២បានបំពេញការងារសម្រាប់សភា ស្របពេលជាមួយគ្នានេះ ក៏ជាពេលដែលពួកគេធ្វើកម្មសិក្សាតាមក្រុមហ៊ុនផងដែរ។ តាមរយៈកិច្ចសន្យាការងាររយៈពេលខ្លីៗ កូនស្រីទាំង២របស់រដ្ឋមន្ត្រីមហាផ្ទៃបារាំងបានទទួលចំណូលប្រហែល៥ម៉ឺន៥ពាន់អឺរ៉ូ។
លោកប្រុយណូ ឡឺរូ ទទួលស្គាល់ថា ធ្លាប់យកកូនៗគាត់អោយធ្វើជាជំនួយការសភាមែន ប៉ុន្តែមិនដែលអោយពួកគេធ្វើការជាអចិន្ត្រៃយ៍ទេ។ រដ្ឋមន្ត្រីមហាផ្ទៃលើកឡើងថា រឿងនេះធ្វើអោយច្របូកច្របល់ ព្រោះវាលេចឡើង ចំពេលអតីតនាយករដ្ឋមន្ត្រីបារាំងមួយរូប គឺលោកហ្វ្រង់ស៊៍រ ហ្វីយ៉ុង កំពុងមានរឿងអាស្រូវផងដែរ។ លោកហ្វីយ៉ុងជាបេក្ខជនប្រធានាធិបតី សម្រាប់ការបោះឆ្នោតនៅបារាំងឆ្នាំ២០១៧នេះ។
រឿងអាស្រូវរបស់លោកហ្វីយ៉ុង ទាក់ទងនឺងការដែលលោកយកភរិយាលោកអោយមកធ្វើជាអ្នកជំនួយការសភាបារាំងដូចគ្នាដែរ។ តែគេសង្ស័យថា នេះគ្រាន់តែជាលេស ដើម្បីយកលុយរដ្ឋមកចាយ ហើយភរិយាលោកហ្វីយ៉ុងប្រហែលមិនបានធ្វើការអោយស្វាមីខ្លួនទេ។ ដោយសាររឿងនេះ អតីតនាយករដ្ឋមន្ត្រីបារាំងបានរងការចោទប្រកាន់ពីបទបន្លំថវិការជាតិ និងបំពានលើទ្រព្យសម្បត្តិសាធារណៈ។ លោកហ្វីយ៉ុងក៏នៅជាប់រឿងអាស្រូវថា បានយកកូនៗគាត់អោយធ្វើការផងដែរ។
ការយកសមាជិកគ្រួសារខ្លួន អោយមកធ្វើជាជំនួយការសភា គឺមានច្រើន នេះបើយោងតាមអ្នកសម្របសម្រួលយុទ្ធនាការឃោសនាបោះឆ្នោតបារាំងមួយរូប របស់អតីតនាយករដ្ឋមន្ត្រីហ្វីយ៉ុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ