អូស្រ្តាលីប្រកាសថាទីតាំងដែលគេរុករកកន្លងទៅនេះមិនមែនជាទីតាំងដែលយន្តហោះម៉ាឡេស៊ីធ្លាក់
ចុះផ្សាយនៅថ្ងៃ៖
ស្តាប់ - ០៤:៥៤
អាជ្ញាធរអូស្រ្តាលី ដែលជាអ្នកសម្របសម្រួលប្រតិបត្តិការស្វែងរកយន្តហោះរបស់ក្រុមហ៊ុនម៉ាឡេស៊ី ទើបនឹងបានប្រកាស នៅថ្ងៃព្រហស្បតិ៍នេះថា តំបន់ ដែលគេធ្វើការរុករកនៅបាតសមុទ្រកន្លងមកនេះ មិនមែនជាទីតាំង ដែលយន្តហោះ MH370 ធ្លាក់ទេ។ សញ្ញាដែលគេទទួលបាន កាលពីដើមខែមេសាកន្លងទៅនេះ ក៏ទំនងជាមិនមែនចេញពីប្រអប់ខ្មៅរបស់យន្តហោះដែលបាត់នេះដែរ។ ខាងក្រោមនេះ ជាសំណួរ-ចម្លើយ ជុំវិញប្រតិបត្តិការស្វែងរកយន្តហោះ MH370។
សំណួរ-តើសំអាងលើមូលហេតុអ្វីទើបគេសន្និដ្ឋានថាទីតាំងនេះមិនមែនជាកន្លែងយន្តហោះធ្លាក់?
គេសន្និដ្ឋានបែបនេះ ដោយសារតែគេបានរុករកសព្វកន្លែងអស់ហើយ ទាំងនៅលើផ្ទៃទឹក និងនៅបាតសមុទ្រ ដោយប្រើយានមុជទឹកគ្មានមនុស្សបើក ក៏ប៉ុន្តែ រកមិនឃើញអ្វីទាំងអស់ ដែលទាក់ទងនឹងយន្តហោះ ដែលបាត់នេះ។ ទាំងប្រអប់ខ្មៅក៏រកមិនឃើញ ហើយសូម្បីតែបំណែកយន្តហោះណាមួយក៏មិនឃើញមាន។ បើសិនជាយន្តហោះពិតជាធ្លាក់ នៅកន្លែងនោះមែន គេមិនអាចថារកមិនឃើញអ្វីសោះបែបនេះទេ។ ដូច្នេះហើយបានជាគេសន្មត់ថា កន្លែងដែលគេរុករកនេះ មិនមែនជាកន្លែងដែលយន្តហោះធ្លាក់។
សំណួរ-ចុះកាលពីដំបូង តើគេសំអាងលើអ្វីបានជាគេកំណត់ទីតាំងនេះថាជាកន្លងដែលយន្តហោះធ្លាក់?
គេកំណត់យកទីតាំងនេះពីដំបូង ដោយសំអាងទៅលើទិន្នន័យបានពីផ្កាយរណប ហើយដែលវិភាគ និងគណនាដោយក្រុមហ៊ុនមួយរបស់អង់គ្លេស ឈ្មោះ Inmarsat។
យើងដឹងហើយថា យន្តហោះជើងហោះហើរលេខ ៣៧០ របស់ក្រុមហ៊ុន Malaysia Airlines ជើងហោះហើរពីគួឡាឡាំពួ ទៅប៉េកាំង ត្រូវបាត់ពីរ៉ាដា នៅចន្លោះ រវាងម៉ាឡេស៊ី និងប៉ែកខាងត្បូងវៀតណាម។ ក្រោយពីបាត់ពីរ៉ាដា យន្តហោះនេះ បត់ក្បាលទៅទិសខាងលិច ហើយត្រូវរ៉ាដាយោធាចាប់បាន នៅក្នុងមហាសមុទ្រឥណ្ឌា (នៅខាងលិចម៉ាឡេស៊ី និងខាងជើងឥណ្ឌូណេស៊ី)។
នៅក្នុងរយៈពេលប្រមាណពី ៦ ទៅ ៧ម៉ោងក្រោយមកទៀត យន្តហោះនេះនៅតែបន្តផ្តល់សញ្ញាទៅផ្កាយរណប ដែលអាចឲ្យគេសន្និដ្ឋានថា កំពុងបន្តហោះហើរនៅឡើយ ដោយគេកំណត់យកទិសដៅពីរ៖ ឬមួយ យន្តហោះនេះហោះទៅទិសខាងជើង កាត់ពីលើប្រទេសកម្ពុជា ថៃ ឡាវ និងចិន រហូតទៅដល់កាហ្សាក់ស្ថាន ឬមួយហោះទៅទិសខាងត្បូង សំដៅទៅប៉ែកខាងត្បូងនៃមហាសមុទ្រឥណ្ឌា។
តាមរយៈការសិក្សា និងគណនាទៅលើទិន្ន័យដែលទទួលបានពីផ្កាយរណប ក្រុមហ៊ុន Imarsat របស់អង់គ្លេសបានសន្មត់ថា យន្តហោះ MH370 ហោះឆ្ពោះទៅទិសខាងត្បូង ហើយដោយគណនាទៅតាមបរិមាណសាំងដែលមានលើយន្តហោះ គេក៏កំណត់ថា យន្តហោះនេះត្រូវធ្លាក់ នៅក្នុងមហាសមុទ្រឥណ្ឌា នៅខាងលិចប្រទេសអូស្រ្តាលី។
ក្រោយមកទៀត នៅដើមខែមេសា នៅពេលដែលគេកំពុងរុករក នៅក្នុងតំបន់សង្ស័យ គេចាប់បានសញ្ញាចំនួន ៤លើក ដែលគេកំណត់ថា ជាសញ្ញា ដែលចេញពីប្រអប់ខ្មៅរបស់យន្តហោះ។ ចេញពីទីតាំង ដែលគេចាប់បានសញ្ញាចុងក្រោយនេះហើយ ទើបគេកំណត់តំបន់ប្រហែលជា ៨៥០គីឡូម៉ែត្រក្រឡាថាជាទីតាំងដែលយន្តហោះធ្លាក់ ហើយធ្វើការរុករកនៅបាតសមុទ្រ។
ចុងក្រោយ តំបន់ទាំង ៨៥០គីឡូម៉ែត្រក្រឡានេះត្រូវគេរុករកសព្វកន្លែងទាំងអស់ តែរកមិនឃើញអ្វីទាំងសោះ ទើបគេសន្មត់ថា នេះមិនមែនជាទីតាំងដែលយន្តហោះធ្លាក់ ហើយវិស្វករមកពីកងទ័ពជើងទឹកអាមេរិកបានសន្និដ្ឋានថា សញ្ញា ដែលគេចាប់បានកាលពីខែមេសា ប្រហែលជាមិនមែនសញ្ញាចេញពីប្រអប់ខ្មៅ ដូចដែលគេសន្និដ្ឋានពីមុននោះទេ។
សំណួរ-បើដូច្នេះ តើការរុករកយន្តហោះអាចនឹងត្រូវបិទបញ្ចប់ត្រឹមនេះ ហើយយន្តហោះនេះត្រូវបាត់ស្រមោលដោយមិនអាចរកឃើញជារៀងរហូតឬក៏យ៉ាងណា?
បើតាមការប្រកាសរបស់អូស្រ្តាលី គេមិនបញ្ឈប់ការរុករកយន្តហោះតែត្រឹមនេះទេ គេនឹងបន្តស្វែងរកតទៅទៀត ប៉ុន្តែ ត្រូវចាប់ផ្តើមពីចំណុចសូន្យមកវិញ ដោយត្រូវធ្វើការសិក្សាមើលនូវរាល់ទិន្នន័យពីដើមឡើងវិញទាំងអស់ ដើម្បីកំណត់ទីតាំងថ្មី ដែលត្រូវស្វែងរក។
ទិន្នន័យ ដែលប្រហែលជាត្រូវគេផ្តោតអាទិភាពខ្ពស់ជាងគេ គឺទិន្នន័យផ្កាយរណប ដែលគណនាដោយក្រុមហ៊ុន Inmarsat ហើយដែលកំណត់ថា យន្តហោះនេះហោះមកទិសខាងត្បូង មកធ្លាក់នៅខាងលិចប្រទេសអូស្រ្តាលី។
ប្រសិនបើសិក្សាមើលទៅ គេកំណត់ថា ការគណនារបស់ក្រុមហ៊ុន Inmarsat មិនត្រឹមត្រូវ គេប្រាកដជាត្រូវកំណត់ឡើងវិញទាំងអស់ថា តើយន្តហោះនេះហោះទៅទិសណាវិញ ក្រោយពីបាត់ពីរ៉ាដា។
ផ្ទុយទៅវិញ ប្រសិនបើគេនៅតែប្រកាន់យកតាមការសន្និដ្ឋានរបស់ Inmarsat ដដែល ដោយគ្រាន់តែសន្មត់ថា សញ្ញា ដែលគេចាប់បានពីដើមខែមេសាមិនចេញពីប្រអប់ខ្មៅ ប្រតិបត្តិការស្វែងរកយន្តហោះនឹងត្រូវធ្វើនៅក្បែរប្រទេសអូស្រ្តាលីដដែល ដោយគ្រាន់តែត្រូវពង្រីកពីតំបន់ ៨៥០គីឡូម៉ែត្រក្រឡា ទៅតំបន់ជុំវិញនោះ ដែលអាជ្ញាធរអូស្រ្តាលីកំណត់ថា មានផ្ទៃក្រឡារហូតដល់ទៅ ៦ម៉ឺនគីឡូម៉ែត្រក្រឡា (ប្រហែល ១ភាគ៣នៃផ្ទៃដីរបស់ប្រទេសកម្ពុជា) ហើយដែលកន្លែងខ្លះមានជម្រៅដល់ទៅជាង ៤ពាន់ម៉ែត្រ។
សំណួរ-ក៏ប៉ុន្តែ គេថាប្រអប់ខ្មៅរបស់យន្តហោះអាចនៅបន្តឲ្យសញ្ញាបានតែក្នុងរយៈពេលមួយខែប៉ុណ្ណោះ។ ឥឡូវនេះ ជិត ៣ខែហើយ ដូច្នេះ ប្រអប់ខ្មៅលែងអាចឲ្យសញ្ញា ដើម្បីឲ្យគេកំណត់ទីតាំងបានទៀតហើយ។ តើគេធ្វើម៉េចអាចនឹងរកយន្តហោះនេះឃើញ?
ប្រអប់ខ្មៅឈប់ឲ្យសញ្ញាមិនមែនមានន័យថា គេប្រាកដជាមិនអាចរកយន្តហោះឃើញទេ។ ជាក់ស្តែងករណីបាត់យន្តហោះរបស់ក្រុមហ៊ុន Air France ជើងហោះហើរលេខ AF447 នៅក្នុងមហាសមុទ្រអាត្លង់ទិក កាលពីឆ្នាំ២០០៩ ប្រអប់ខ្មៅក៏ឈប់ឲ្យសញ្ញាដែរ ក៏ប៉ុន្តែ គេនៅតែអាចរកបំណែកយន្តហោះ និងប្រអប់ខ្មៅឃើញ គ្រាន់តែគេត្រូវការចំណាយពេលយូរ។
នៅក្នុងករណីបាត់យន្តហោះរបស់ក្រុមហ៊ុន Air France គេដឹងពីតំបន់ដែលយន្តហោះត្រូវធ្លាក់ ក៏ប៉ុន្តែ គេនៅតែត្រូវចំណាយពេលរហូតដល់ទៅជិត ២ឆ្នាំ ទើបរកប្រអប់ខ្មៅឃើញ។ ក្នុងករណីយន្តហោះម៉ាឡេស៊ីនេះវិញ គេមិនទាំងដឹងច្បាស់ផងថា តើយន្តហោះនេះធ្លាក់នៅកន្លែងណា? ដូច្នេះ ការស្វែងរកអាចនឹងត្រូវចំណាយពេលកាន់តែយូរជាងនេះទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ