ព្រឹទ្ធសភាសម្រេចបង្កើតគណៈកម្មការជំនាញទី១០ ប្រគល់ឲ្យគណបក្សសម រង្ស៊ី តែអនុប្រធានទី២ព្រឹទ្ធសភា មិនទាន់សម្រេចទេ
ក្រុមការងារគណបក្សប្រជាជនកម្ពុជា និងគណបក្សសម រង្ស៊ី បានជួបប្រជុំ ដើម្បីរៀបចំឡើងវិញនូវក្បាលម៉ាស៊ីន ដឹកនាំព្រឹទ្ធសភា កាលពីព្រឹកថ្ងៃទី ៦សីហានេះ។ ក្រុមការងារ ដែលមានសមាសភាពម្ខាង ៣រូប បានព្រមព្រៀងបង្កើតគណៈកម្មការព្រឹទ្ធសភាមួយថែមទៀត គឺគណៈកម្មការទី១០ មានឈ្មោះថា គណៈកម្មការអង្កេត បោសសំអាត និងប្រឆាំងអំពើពុករលួយ ដូចនៅរដ្ឋសភាដែរ។ ក្នុងនោះ គណបក្សប្រជាជនកម្ពុជា ក៏ព្រមផ្តល់ឲ្យគណបក្សសម រង្ស៊ី ជាប្រធានគណៈកម្មការ ២ប៉ុណ្ណោះ ខណៈដែលគណបក្សសម រង្ស៊ី ស្នើជាប្រធានគណៈកម្មការ ៣ អនុប្រធានទី២ ព្រឹទ្ធសភា និងអគ្គលេខាធិការរង ១រូប។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីកិច្ចប្រជុំក្រុមការងារគណបក្សប្រជាជនកម្ពុជា និងគណបក្សសមរង្ស៊ី ជិតមួយម៉ោង កាលពីម៉ោង ៩ ព្រឹក ថ្ងៃទី៦សីហានេះ លោក គង់ គាំ ប្រធានគណបក្សសមរង្ស៊ី បានឲ្យដឹងថា ក្រុមការងារគណបក្សប្រជាជនកម្ពុជា បានសន្យាថា យកការស្នើសុំរបស់គណបក្សសមរង្ស៊ី ទៅពិគ្រោះជាមួយថ្នាក់ដឹកនាំគណបក្សប្រជាជនកម្ពុជា ហើយនឹងជូនដំណឹងនៅពេលក្រោយ។
ការស្នើរៀបចំឡើងវិញនូវក្បាលម៉ាស៊ីនព្រឹទ្ធសភា ត្រូវបានលោក គង់ គាំ លើកឡើងថា ក្នុងកិច្ចប្រជុំ នៅព្រឹទ្ធសភា គណបក្សសមរង្ស៊ី ស្នើជាប្រធានគណៈកម្មការជំនាញរដ្ឋសភា ចំនួន ៣ ជាអនុប្រធានទី២ព្រឹទ្ធសភា និងជាអគ្គលេខាធិការរងព្រឹទ្ធសភា ១ រូប។
ប៉ុន្តែលោក គង់ គាំ អះអាងថា ក្រុមការងារគណបក្សប្រជាជនកម្ពុជា ដែលដឹកនាំដោយលោក ទេព ងន បានព្រមព្រៀងផ្តល់ឲ្យគណបក្សសមរង្ស៊ី ជាប្រធានគណៈកម្មការ តែ ២ គណៈកម្មការប៉ុណ្ណោះ។ អ្វីផ្សេងទៀត រង់ចាំពិគ្រោះយោបល់ថ្នាក់ដឹកនាំគណបក្សប្រជាជន ដោយមិនទាន់កំណត់ថ្ងៃជួបគ្នាជាថ្មីទេ។
ការរៀបចំឡើងវិញនូវក្បាលម៉ាស៊ីនដឹកនាំព្រឹទ្ធសភាដូច្នេះ ត្រូវបានលោកគង់គាំ អះអាងថា ដើម្បីឲ្យព្រឹទ្ធសភា ក៏ដូចរដ្ឋសភា ជាពហុបក្ស និងប្រជាធិបតេយ្យ ហើយមានតុល្យភាពអំណាច។
កិច្ចប្រជុំរវាងក្រុមការងារគណបក្សប្រជាជនកម្ពុជា និងគណបក្សសមរង្ស៊ី នៅព្រឹកថ្ងៃពុធនេះ បានធ្វើឡើង បន្ទាប់ពីមានលិខិតឆ្លងឆ្លើយរវាងលោកសមរង្ស៊ី និងលោកជាស៊ីម កាលពីថ្ងៃទី៤ និងថ្ងៃទី៥សីហា ដើម្បីបង្កើតក្រុមការងារ រៀបចំឡើងវិញនូវក្បាលម៉ាស៊ីនដឹកនាំព្រឹទ្ធសភា ស្របតាមកិច្ចព្រមព្រៀង កាលពីថ្ងៃទី២២ ខែកក្កដា ឆ្នាំ២០១។
សូមរម្លឹកថា សមាជិកព្រឹទ្ធសភា នីតិកាលទី៣ មានអាណត្តិរយៈពេល ៦ ឆ្នាំ ចាប់ពីឆ្នាំ២០១២ ដល់ឆ្នាំ២០១៨ មានចំនួន ៦១ រូប។ ក្នុងនោះ សមាជិកព្រឹទ្ធសភា ៤៦ រូប មកពីគណបក្សប្រជាជនកម្ពុជា គណបក្សសមរង្ស៊ី ១១ រូប សមាជិកព្រឹទ្ធសភា ២ រូប ត្រូវបានជ្រើសតាំងដោយព្រះមហាក្សត្រ និងសមាជិកព្រឹទ្ធសភា ២ រូបផ្សេងទៀត ត្រូវជ្រើសតាំងដោយរដ្ឋសភា។
ចាប់តាំងពីបង្កើតកាលពីខែមេសា ឆ្នាំ២០១២ ប្រធានព្រឹទ្ធសភា អនុប្រធានទី១ អនុប្រធានទី២ និងប្រធានគណៈកម្មការជំនាញព្រឹទ្ធសភា ទាំង ៩ សុទ្ធតែដឹកនាំដោយសមាជិកព្រឹទ្ធសភា មកពីគណបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ