អត្រាភាពក្រីក្រធ្លាក់ចុះសល់តែ២០% តែប្រឈមហានិភ័យខ្ពស់

អត្រាភាពក្រីក្ររបស់កម្ពុជាបានធ្លាក់ចុះជាងពាក់កណ្តាលក្នុងរយៈពេល៧ឆ្នាំចុងក្រោយនេះពោលគឺធ្លាក់ចុះពី ៥៣% ក្នុងឆ្នាំ ២០០៤ មកត្រឹម ២០,៥% នៅឆ្នាំ ២០១១ ។ នេះបើយោងតាមរបាយការណ៍វាយតម្លៃភាពក្រីក្រថ្មីរបស់ធានាគារពិភពលោកដែលត្រូវបានផ្សព្វផ្សាយនៅថ្ងៃទី២០កុម្ភៈ។

ចុះផ្សាយនៅថ្ងៃ៖ 21/02/2014 - 04:04កែប្រែថ្ងៃទី៖ 21/02/2014 - 09:43

ផ្សាយពាណិជ្ជកម្ម

យោងតាមរបាយការណ៍ថ្មីនេះ បច្ចុប្បន្នប្រជាជនកម្ពុជា២នាក់ក្នុងចំណោម ១០នាក់មានជីវភាពក្រីក្រ ខណៈដែលកាលពីឆ្នំា ២០០៤ គឺមានរហូតទៅដល់៥នាក់ក្នុងចំណោម១០នាក់រស់ក្រោមបន្ទាត់ភាពក្រីក្រ។ការកើនឡើងតម្លៃស្រូវនិងទិន្នផលស្រូវបានចូលរួមចំណែកយ៉ាងខ្លាំងក្នុងការកាត់បន្ថយភាពក្រីក្រ។

ហេដ្ឋារចនាសម្ព័ន្ធសង្គមដូចជាផ្លូវថ្នល់និងស្ពានដែលអាចឲ្យកសិករនំាផលិតផលទៅកាន់ទីផ្សារបានស្រួលនិងការទទួលបានព័ត៌មានអំពីតម្លៃផលិតផលតាមរយៈទូរស័ព្ទដៃ ប្រព័ន្ធធារាសាស្ត្រ ដែលមានលក្ខណៈល្អប្រសើរជាងមុន និងទីផ្សារកសិកម្មសេរីនិងសមស្របក៏ជាចំណែកនៃការធ្លាក់ចុះភាពក្រីក្រផងដែរ។

ធនាគារពិភពលោកកត់សម្គាល់ថា កម្ពុជាជាប្រទេសមួយក្នុងចំណោមប្រទេសជាច្រើនដែលអនុវត្តបានល្អក្នុងការកាត់បន្ថយភាពក្រីក្រនៅលើពិភពលោកក្នុងរយៈពេលប៉ុន្មានឆ្នាំចុងក្រោយនេះ។ ប្រជាពលរដ្ឋកម្ពុជាមានជីវភាពកាន់តែប្រសើរជាងមុនដោយសារតែពួកគាត់មានទ្រព្យសម្បត្តិប្រើប្រាស់ក្នុងផ្ទះបានកើនឡើងដូចជាទូរទស្សន៍ ម៉ូតូនិងទូរស័ព្ទដៃជាដើម។បច្ចុប្បន្នគ្រួសារមានទូរទស្សន៍ប្រើប្រាស់បានកើនឡើង៤ដង និងគ្រួសារអ្នកមានម៉ូតូកើនឡើង២ដង បើប្រៀបធៀបនឹងឆ្នាំ២០០៧។

ប៉ុន្តែ របាយការណ៍បានបង្ហាញថាប្រជាជនដែលទើបតែចាកផុតពីបន្ទាត់ភាពក្រីក្រពោលគឺអ្នកដែលរស់នៅមានចំណូលតិចជា ២,៣០ ដុលា្លរក្នុងមួយថ្ងៃងាយនឹងរអិលធា្លក់ចូលក្នុងភាពក្រីក្រវិញណាស់ ប្រសិនបើមានផលប៉ះពាល់សេដ្ឋកិច្ចបន្តិចបន្តួចមានន័យថា បើពួកគេបាត់បង់ចំណូលតែ ១២០០ រៀលក្នុងមួយថ្ងៃ មនុស្សប្រមាណជា៣លាននាក់នឹងធ្លាក់ចូលក្នុងភាពក្រីក្រវិញភ្លាម ហើយអត្រាភាពក្រីក្រនឹងកើនឡើងលើសពីមុនទៅទៀតពោលគឺនឹងកើនដល់៤០%វិញ៕