សិង្ហបុរី៖ ក្រុមចោរព័ត៌មានវិទ្យាចូលលួចទិន្នន័យសុខភាពរបស់នាយករដ្ឋមន្ត្រី និងពលរដ្ឋ ជាង១លានកន្លះ
នៅសិង្ហបុរី ទិន្នន័យសុខភាពរបស់ប្រជាពលរដ្ឋ ជាង១លានកន្លះ រួមទាំងទិន្នន័យសុខភាពរបស់លោកនាយរដ្ឋមន្ត្រី Lee Hsien Loong ផង បានត្រូវក្រុមចោរព័ត៌មានវិទ្យាចូលលួច។ នេះគឺជាសេចក្តីប្រកាសរបស់មន្ត្រីក្រសួងសុខាភិបាលសិង្ហបុរី កាលពីថ្ងៃទី២០កក្កដា។ ភ្លាមៗ ចៅក្រមស៊ើបបានបើកការស៊ើបអង្កេត និងបានកំណត់មុខសញ្ញារួចរាល់ហើយ។ ក៏ប៉ុន្តែ អាជ្ញាធរសិង្ហបុរី ពុំបានទម្លាយឲ្យដឹងថា នរណានៅពីក្រោយការបាត់ទិន្នន័យនេះ នោះទេ។
ចុះផ្សាយនៅថ្ងៃ៖
«ក្រុមចោរព័ត៌មានវិទ្យាទាំងនោះ គឺពុំមែនជាក្រុមចោរតូចតាច ឬក្រុមកូនសិស្សនិស្សិតរៀនខាងព័ត៌មានវិទ្យាធម្មតាៗទេ។ នេះគឺជាការវាយប្រហារដោយចេតនាពីក្រុមចោរជាន់ខ្ពស់ ហើយពួកគេបានកំណត់គោលដៅយ៉ាងច្បាស់លាស់។ ពួកនេះបានព្យាយាមម្តងហើយម្តងទៀត ដើម្បីចូលលួចទិន្នន័យទាំងជាង១លានកន្លះនោះ»។ នេះគឺជាអ្វីដែលរដ្ឋមន្ត្រីក្រសួងសុខាភិបាលសិង្ហបុរី បានថ្លែងប្រាប់អ្នកកាសែតនៅក្នុងសន្នីសីទសារព័ត៌មានកាលពីថ្ងៃទី២០កក្កដា។
តាមប្រភពពីរដ្ឋមន្ត្រីសិង្ហបុរីដដែល, ក្រុមចោរព័ត៌មានទាំងនោះ បានប្រើកម្មវិធីមេរោគ ដើម្បីចូលទៅលួចបន្លំទាញយកទិន្នន័យពីក្នុងកុំព្យូទ័ររបស់ក្រសួង។ ពួកគេនេះ បានបើកប្រតិបត្តិការ ចន្លោះពីថ្ងៃទី២៧មិថុនា រហូតដល់ថ្ងៃទី៤កក្កដា រហូតដល់ពេលក្រសួងឃើញប្រព័ន្ធកុំព្យូទ័រដើរខុសប្រក្រតី ទើបអន្តរាគមទប់ស្កាត់ ហើយពួកចោរក៏ឈប់សកម្មភាព។ ក្រសួងសុខាភិបាល បានបញ្ជាក់ទៀតថា ទិន្នន័យដែលបានបាត់បង់នោះ គឺព័ត៌មានផ្ទាល់ខ្លួននិងការផ្តល់ថ្នាំដល់អ្នកជំងឺតែប៉ុណ្ណោះ ក៏ប៉ុន្តែកំណត់ត្រាវេជ្ជសាស្រ្ត និងកំណត់ត្រាប្រវត្តិព្យាបាលជំងឺ គឺមិនប៉ះពាល់នោះទេ។
ចំណែកនាយរដ្ឋមន្ត្រី Lee Hsien Loong បានប្រតិកម្មតាមគណនីហ្វេសបុករបស់លោកថា ចំពោះទិន្នន័យសុខភាពរបស់លោកផ្ទាល់ គឺជាធម្មតា លោកមិនដែលនិយាយប្រាប់មនុស្សទូទៅទេ ក៏ប៉ុន្តែ បើទោះបីពួកចោលលួចយកទៅមែន ក៏ទិន្នន័យនោះគ្មានអ្វីសំខាន់ធំដុំដែរ។
គួរបញ្ជាក់ថា ទិន្នន័យសុខភាពដែលត្រូវចោរលួច ទាំងជាង១លានកន្លះនោះ គឺមិនដែលធ្លាប់មានទេក្នុងប្រវត្តិសាស្ត្រសិង្ហបុរី ដែលជាប្រទេសជឿនលឿនខាងព័ត៌មានវិទ្យាដែរនោះ។ ទិន្នន័យដ៏ច្រើននេះ គឺ ស្មើនឹងចំនួនជាង១ភាគ៣នៃចំនួនប្រជាជនសិង្ហបុរីសរុប (៥លាន៨សែននាក់)។
បើតាមជាជំនាញខាងឧក្រិដ្ឋកម្មតាមប្រព័ន្ធអ៊ីនធ័រនែត ការលួចទិន្នន័យសុខភាពរបស់ប្រជាជននេះ គឺមានសារៈសំខាន់សម្រាប់រដ្ឋបរទេសដទៃផ្សេងទៀត។ តែយ៉ាងណា គេនៅមិនទាន់ដឹងទេថា នរណានៅពីក្រោយខ្នងនៃការលួចទិន្នន័យនេះ បើទោះបីអាជ្ញាធរសិង្ហបុរីបានកំណត់សញ្ញារួចមកហើយ តែសិង្ហបុរីពុំទាន់បញ្ជាក់ឲ្យច្បាស់នោះដែរ។ ក៏ប៉ុន្តែ អ្នកជំនាញអាមេរិក បានចោទថា ទង្វើនេះអាចជាប្រព្រឹត្តរបស់ភ្នាក់ងាររបស់រុស្ស៊ី ចិន អ៊ីរង់ ឬកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ