បរិស្ថាន៖សិង្ហបុរីនឹងប្តឹងក្រុមហ៊ុនឥណ្ឌូណេស៊ី ក្នុងសំណុំរឿងភ្លើងឆេះព្រៃ ដូចការគ្រោងទុក
យោងតាមសារព័ត៌មានបារាំង AFP ចុះផ្សាយថ្ងៃអាទិត្យ៣កក្កដានេះ សិង្ហបុរីមិនប្តូរការសម្រេចចិត្តពីមុនទេ ដោយនៅតែត្រូវប្តឹងផ្តល់បណ្តាក្រុមហ៊ុនឥណ្ឌូណេស៊ី ក្នុងសំណុំរឿងភ្លើងឆេះព្រៃដែលបំពុលបរិស្ថាន រៀងរាល់ឆ្នាំ នៅតាមបណ្តាប្រទេសអាស៊ីអាគ្នេយ៍មួយចំនួន។ សិង្ហបុរីមិនលុបចោលការផ្តឹងប្តល់នេះ តាមការទាមទាររបស់ឥណ្ឌូណេស៊ីទេ។ ទំនាក់ទំនងរវាងប្រទេសទាំង២កាន់តែតានតឹងនឹងគ្នា ចាប់ពីខែឧសភាមក ក្រោយសិង្ហបុរីចេញដីកា ចាប់ខ្លួនប្រធានសហគ្រាសឥណ្ឌូណេស៊ីមួយរូប ពីបទភ្លើងព្រៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១០
រឿងភ្លើងឆេះព្រៃបំពុលបរិស្ថាននៅតាមប្រទេសមួយចំនួននៅអាស៊ីអាគ្នេយ៍ មានដើមហេតុមកពីឥណ្ឌូណេស៊ី។ រៀងរាល់ឆ្នាំ ឥណ្ឌូណេស៊ីដុតព្រៃ ដើម្បីធ្វើចំការ បង្កើនការដាំដុះដូងប្រេង។
បញ្ហាបានផ្ទុះឡើងដល់កម្រិតធ្ងន់ នៅឆ្នាំ២០១៥មុននេះ ពេលផ្សែងភ្លើងបានរាលដាលទៅបំពុលដល់ម៉ាឡេស៊ី សិង្ហបុរី និងតំបន់មួយចំនួននៅប្រទេសថៃ។ សាលារៀនជាច្រើនបានបិទទ្វារ ហើយមនុស្សរាប់ពាន់នាក់បានធ្លាក់ខ្លួនឈឺ។
សិង្ហបុរីបានសម្រេចប្តឹងក្រុមហ៊ុនឥណ្ឌូណេស៊ីចំនួន៦ ស្របតាមច្បាប់សិង្ហបុរី។ យោងតាមរដ្ឋាភិបាលឥណ្ឌូណេស៊ី សិង្ហបុរីក៏បានគំរាមប្តឹងក្រុមហ៊ុនឥណ្ឌូណេស៊ីផ្សេងៗទៀត ដែលអាចជាប់ពាក់ព័ន្ធនឹងសំណុំរឿងនេះដែរ។
យោងតាមរដ្ឋធម្មនុញ្ញសិង្ហបុរី ក្រុមហ៊ុនសិង្ហបុរី រឺក៏ក្រុមហ៊ុនបរទេសដែលបង្កផលប៉ះពាល់បរិស្ថាន ត្រូវទទួលពិន័យជាទឹកប្រាក់ ប្រហែល១សែនដុល្លារសិង្ហបុរី ត្រូវនឹង៧៤០០០ ដុល្លារអាមេរិក។ ក្រសួងបរិស្ថានឥណ្ឌូណេស៊ីបានប្រតិកម្មថា សិង្ហបុរីមិនអាចជាន់លើវិស័យច្បាប់ឥណ្ឌូណេស៊ី ដូច្នេះបានទេ។ ឥណ្ឌូណេស៊ីលើកឡើងថា បញ្ហាភ្លើងឆេះព្រៃនេះ ត្រូវតែដោះស្រាយតាមបែបផែនអាស៊ានទើបជាការត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ