អាវុធនុយក្លេអ៊ែរក្នុងពិភពលោកថយចុះ តែក្នុងចង្វាក់យឺតយ៉ាវ
វិទ្យាស្ថានស្រាវជ្រាវសន្តិភាពអន្តរជាតិក្រុងស្តុកខុល Stockholm ហៅកាត់ថា Sipri បានប្រាប់នៅថ្ងៃចន្ទនេះថា បរិមាណអាវុធនុយក្លេអ៊ែរក្នុងពិភពលោកមានការថយចុះ ប៉ុន្តែការថយចុះនេះមានចង្វាក់យឺតយ៉ាវ ប្រៀបនឹងឆ្នាំមុនៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
វិទ្យាស្ថានស្រាវជ្រាវសន្តិភាពអន្តរជាតិក្រុងស្តុកខុល Stockholm ហៅកាត់ថា Sipri បានចេញរបាយការណ៍ប្រចាំឆ្នាំ បង្ហាញពីការថយចុះនៃអាវុធនុយក្លេអ៊ែរក្នុងពិភពលោក ក្នុងរយៈពេល៥ឆ្នាំចុងក្រោយនេះ។
យោងតាមរបាយការណ៍វិទ្យាស្ថានស៊ីព្រី ក្នុងឆ្នាំ២០១៤នេះ ក្បាលនុយក្លេអ៊ែរក្នុងពិភពលោកមានសរុប ១ម៉ឺន៦ពាន់៣រយគ្រាប់ គឺតិចជាងកាលពីឆ្នាំ២០១៣។ ឆ្នាំ២០១៣ក្បាលនុយក្លេអ៊ែរ មាន១ម៉ឺន៧ពាន់២រយ៧០គ្រាប់។ ហើយឆ្នាំ២០១១វិញ ក្បាលនុយក្លេអ៊ែរមានរហូតដល់ ២ម៉ឺន៥រយ៣០គ្រាប់។ ឆ្នាំ២០១០ ក្បាលនុយក្លេអ៊ែរមាន២ម៉ឺន២ពាន់៦០០គ្រាប់។ ប៉ុន្តែ មើលតាមតួលេខ ការថយចុះនេះ មានចង្វាក់យឺតយ៉ាវ។
ការថយចុះអាវុធនុយក្លេអ៊ែរបានស្តែងឡើងតាមរយៈការខិតខំរបស់រុស្ស៊ី និងអាមេរិក។ គិតក្នុងដើមឆ្នាំនេះ អាមេរិកមានក្បាលនុយក្លេអ៊ែរ៧ពាន់៣រយគ្រាប់ ឯរុស្ស៊ីមាន៨ពាន់គ្រាប់។ អាវុធនុយក្លេអ៊ែរប្រទេសទាំង២ បញ្ចូលគ្នា មានបរិមាណ៩៣ភាគរយនៃអាវុធនុយក្លេអ៊ែរពិភពលោក។
ដោយឡែក ការថយចុះនៃអាវុធនុយក្លេអ៊ែរ ក្នុងពិភពលោក មិនបានបង្ហាញថា ប្រទេសមហាអំណាចនុយក្លេអ៊ែរបានប្រឹងប្រែងកាត់បន្ថយនុយក្លេអ៊ែរក្នុងស្រុកទេ។ ជាក់ស្តែង អាវុធនុយក្លេអ៊ែររបស់បារាំងនិងអង់គ្លេស ក្នុងឆ្នាំនេះ មានបរិមាណថេរ មិនប្រែប្រួល គឺបារាំងមានក្បាលនុយក្លេអ៊ែរ៣០០គ្រាប់ ឯអង់គ្លេសមាន២២៥គ្រាប់។ ចិន ឥណ្ឌា និងប៉ាគីស្ថានវិញរឹតតែបង្កើនការផលិតអាវុធនុយក្លេអ៊ែរបន្ថែមទៀត។ រីឯអ៊ីស្រាអែលប្រហែលជានៅចាំមើលស្ថានភាពអ៊ីរ៉ង់ ដើម្បីផលិតអាវុធនុយក្លេអ៊ែរបន្ថែម។
ក្នុងឆ្នាំ២០១៤នេះ ចិនមានក្បាលនុយក្លេអ៊ែរ២៥០គ្រាប់ ឥណ្ឌាមានពី៩០ទៅ១១០គ្រាប់ ប៉ាគីស្ថានមានពី១០០ទៅ១២០គ្រាប់ ហើយអ៊ីស្រាអែលមាន៨០គ្រាប់។ ដោយឡែក អ្នកជំនាញរំពឹងថា ជាមួយបរិមាណធាតុភ្លុយតូនីញ៉ូមរបស់កូរ៉េខាងជើង កូរ៉េខាងជើងអាចផលិតក្បាលនុយក្លេអ៊ែរបានពី៦ទៅ៨គ្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ