ICIJ បរិហាពីភាពខ្វះចន្លោះដ៏គ្រោះថ្នាក់ នៃការត្រួតពិនិត្យឧបករណ៍ផ្សាំក្នុងខ្លួនមនុស្ស
ឧបករណ៍សិប្បនិម្មិត ដែលគ្រូពេទ្យដាក់ផ្សាំក្នុងខ្លួនមនុស្ស ដើម្បីជួយព្យាបាល ឬជួយសម្រួលជិវិតប្រចាំថ្ងៃ របស់អ្នកជំងឺ កំពុងស្ថិតនៅក្នុងរឿងអាស្រូវមួយដ៏ធំ បន្ទាប់ពីសម្ព័ន្ធអន្តរជាតិនៃអ្នកសារព័ត៌មានស៊ើបអង្កេត បានចេញរបាយការណ៍មួយ កាលពីថ្ងៃអាទិត្យកន្លងទៅ ថាឧបករណ៍ទាំងនោះ ភាគច្រើន មិនបានទទួលការត្រួតពិនិត្យគុណភាព និងប្រសិទ្ធភាពឲ្យបានត្រឹមត្រូវទេ។ អ្នកជំងឺ ដែលបានស្លាប់ បានកើនឡើងរាប់ម៉ឺននាក់ ក្នុងរវាង១០ឆ្នាំចុងក្រោយនេះ ដោយសារតែឧបករណ៍ផ្សាំសិប្បនិម្មិតទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ជាមួយនឹងវិទ្យាសាស្ត្រផ្នែកពេទ្យ ដែលកាន់តែរីកចំរើន ឧបករណ៍ផ្សាំ ជាច្រើនប្រភេទ ត្រូវបានគ្រូពេទ្យ ដាក់ផ្សំក្នុងរាងកាយ មនុស្សដើម្បីជួយព្យាបាល ឬក៏ជួយសម្រួលដល់ការរស់នៅប្រចាំថ្ងៃរបស់អ្នកជំងឺ ដែលត្រូវការវា។ ឧបករណ៍ទាំងនោះ មានជាអាទិ៍ដូចជា៖ កងដាក់ក្នុងស្បូនដើម្បីពន្យាកំណើត ម៉ាស៊ីនជួយសំរួលដំណើរលោតរបស់បេះដូង ម៉ាស៊ីនចាក់បញ្ចូលសារធាតុអាំសូលីនសម្រាប់អ្នកជំងឺទឹកនោមផ្អែម សុដន់សិប្បនិម្មិត ឬក៏ឧបករណ៍អបឆ្អឹងសន្លាក់ស្មា ឬឆ្អឹងសន្លាក់ជង្គង់ជាដើម។ ការប្រើប្រាស់ ឧបករណ៍ផ្សាំទាំងនេះ បានកើនឡើងកាន់តែខ្លាំង ក្នុងរវាង១០ឆ្នាំចុងក្រោយនេះ។
ក៏ប៉ុន្តែ គុណភាព និងប្រសិទ្ធិភាពនៃឧបករណ៍ផ្សាំទាំងនេះ កំពុងតែចោទជាបញ្ហា គួរឲ្យព្រួយបារម្ភបំផុត។ សម្ពន្ធ័អន្តរជាតិនៃអ្នកសារព័ត៌មានស៊ើបអង្កេត ហៅកាត់ថា ICIJ បានប្រមូលទិន្នន័យពីបណ្តាក្រុមអ្នកកាសែត២៥០នាក់ នៅតាមប្រទេស៣៦ ទើបតែបានចេញរបាយកណ៍សន្និដ្ឋានមួយ ដែលបង្ហាញថា ការត្រួតពិនិត្យគុណភាពនៃឧបករណ៍ទាំងនោះ គឺធ្វើឡើង ក្នុងលក្ខខណ្ឌដ៏ងាយស្រួលបំផុត។ ជាទូទៅ ផលិតផលឧបករណ៍សិប្បនិម្មិតទាំងនោះ បានទទួលសិទ្ធិអនុញ្ញាតឲ្យធ្វើចរាចរណ៍លើទីផ្សារយ៉ាងធូររលុង ដោយពុំបានឆ្លងកាត់ការធ្វើតេស្ត៍ ឲ្យបានម៉ត់ចត់ទេ។ នៅតាមប្រទេសខ្លះ គឺសហគ្រាសផលិតឧបករណ៍ផ្សាំសិប្បនិម្មិតនោះ បានប្រើប្រាស់លុយដើម្បីទិញការអនុញ្ញាតទៀតផង។
របាយការណ៍ បានលើកឡើងអំពីការកើនឡើង នូវករណីមិនប្រក្រតី ឬគ្រោះថ្នាក់ដែលកើតមាន ក្រោយការវះកាត់ដាក់បញ្ចូលឧបករណ៍ផ្សាំសិប្បនិម្មិត នៅរវាង១០ឆ្នាំចុងក្រោយនេះ។ នៅសហរដ្ឋអាមេរិក មានករណីស្លាប់ ចំនួន៨២០០០នាក់ករណី និងមានរបួស ប្រមាណ១លាន៧សែននាក់ រាប់គិតពីឆ្នាំ២០០៧មក។ នៅបារាំងវិញ យោងតាមតួលេខប្រមូលបាន ដោយក្រុមអ្នកស៊ើបអង្កេតរបស់កាសែតLe Monde បានឲ្យដឹងថា ករណីគ្រោះថ្នាក់បង្កឡើងដោយការវះកាត់ដាក់ឧបករណ៍ផ្សាំសិប្បនិម្មិតគ្រប់ប្រភេទ បានកើនឡើង១គុណជា២ ក្នុងរវាង១០ឆ្នាំ ដែលសរុបមកគឺមានទាំងអស់ ប្រមាណ១៥៨០០០ករណី។ ការសែតLe Monde បានទាញសញ្ញាអាសន្នថា អាជ្ញាធរសុខាភិបាលបារាំង មានការធ្វេសប្រហែសខ្លាំងណាស់ ក្នុងការតាមដានលើគុណភាព ប្រសិទ្ធិភាព និងគ្រោះថ្នាក់ នៃឧបករណ៍ផ្សាំសិប្បនិម្មិតនីមួយៗ។
ដោយឡែក ក្នុងចំណោមផលិតផលឧបករណ៍ផ្សាំសិប្បនិម្មិតទាំងអស់ គឺផលិតផលម៉ាក Medtronic របស់អាមេរិក ដែលចោទជាបញ្ហាញឹកញាប់បំផុត។ ចន្លោះពីឆ្នាំ២០០៨ ដល់២០១៧ ផលិតផលម៉ាកនេះ បានទំនងជាបណ្តាលឲ្យអ្នកជំងឺស្លាប់ ចំនួន៩៣០០នាក់ និងករណីគ្រោះថ្នាក់ជិត៣សែនករណី។ យោងតាមរបាយការណ៍ដដែល មិនថា នៅជប៉ុន នៅកាណាដា នៅន័រវែស ឬអូស្ត្រាលី អាជ្ញាធរប្រទេសទាំងនេះ សុទ្ធតែបានកត់សម្គាល់ដូចគ្នាថា ឧបករណ៍ផ្សាំសិប្បនិម្មិតម៉ាក Medtronic របស់អាមេរិកនេះ គឺមានជាប់ពាក់ព័ន្ធនឹងករណីស្លាប់អ្នកជំងឺ ឬគ្រោះថ្នាក់ច្រើនជាងគេបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ