Pokemon Go៖ ល្បែងគ្រោះថ្នាក់ និងឥតប្រយោជន៍ របស់មនុស្សសម័យទំនើប?
ចុះផ្សាយនៅថ្ងៃ៖
ស្តាប់ - ០៦:២៨
ពីសប្តាហ៍កន្លងមកនេះ ពិភពលោកទាំងមូលបានរំជើបរំជួល មិនមែនដោយសារសង្រ្គាម រឺគ្រោះមហន្តរាយធម្មជាតិអ្វីទេ តែគឺដោយសារល្បែងលេងនៅលើទូរស័ព្ទមួយឈ្មោះថា Pokemon Go។ ល្បែង ដែលប្រើប្រាស់បច្ចេកវិទ្យាកំណត់ទីតាំងភូមិសាស្រ្តពិតៗ របស់អ្នកលេង ដោយបន្ថែមរូបតុក្តាPokemon នៅក្នុងទូរស័ព្ទ ដើម្បីឲ្យអ្នកលេងដេញតាមចាប់នៅគ្រប់ទីកន្លែង បានធ្វើឲ្យយុវវ័យ និងក្មេងៗជាច្រើនជ្រួលជ្រើម ភ្នែកសំឡឹងមើលទូរស័ព្ទ ភ្លឹកភ្លាំង បាត់បង់ស្មារតី។ មានយោបល់ផ្សេងៗគ្នា ទាក់ទិននឹងល្បែងនេះ ដែលសម្រាប់មនុស្សមួយចំនួន គឺជាល្បែងដែលគ្មានប្រយោជន៍ ហើយមិនត្រឹមតែប៉ុណ្ណោះគឺវាអាចបង្កគ្រោះថ្នាក់ជាច្រើនជំពូក។
ល្បែងPokemon Go គឺជាការច្នៃប្រឌិតដ៏អស្ចារ្យរបស់មនុស្សលោក ដែលបានលាយបច្ចេកវិទ្យាទំនើបក្នុងទូរស័ព្ទ ជាមួយនឹងទិដ្ឋភាពពិតជាក់ស្តែង ដែលនៅជុំវិញអ្នកលេងល្បែងនេះម្នាក់ៗ។ សម្រាប់យុវវ័យពេញនិយម ដែលចូលចិត្តទូរស័ព្ទទំនើបៗ ល្បែងវីដេអូហ្គេមនានា វាគឺជារឿងមួយអស្ចារ្យខ្លាំងណាស់។ ល្បែងនេះ បានចាប់ផ្តើមបើកឲ្យអ្នកប្រើប្រាស់ទាញយកមកលេងបាននៅលើទូរស័ព្ទដៃ ដែលប្រើប្រព័ន្ធ iOS និងប្រព័ន្ធ Android ដំបូងគេបំផុត នៅប្រទេសអូស្ត្រាលី សហរដ្ឋអាមេរិក និងណូវ៉ែល ហ្សេឡង់ កាលពីថ្ងៃទី៧កក្កដា។
ល្បែងហ្គេមទូរស័ព្ទ ផ្អើលពិភពលោក៖
គ្រាន់តែក្នុងសហរដ្ឋអាមេរិកមួយ មានអ្នកទាញយកល្បែងនេះមកលេងក្នុងទូរស័ព្ទ ដល់ទៅ៧លាន៥សែននាក់ ក្នុងរយៈពេលមិនដល់២សប្តាហ៍ផង។ នៅសហរដ្ឋអាមេរិកដដែល ក្នុងមួយថ្ងៃ ក្រុមហ៊ុនដែលផលិតល្បែងនេះអាចរកចំណូលបាន១លាន៦សែនដុល្លារ ដោយសារតែល្បែងដ៏ល្បីនេះ។ ក្រុមហ៊ុនApple បានបញ្ជាក់ថា ចាប់តាំងពីApple Store ត្រូវបានបង្កើតមក មានតែល្បែង Pokemon Go នេះទេដែលមានមនុស្សទាញយកច្រើនជាងគេបង្អស់ ក្នុងពេលដ៏ខ្លីបែបនេះ។
ទន្ទឹមពេលដែលល្បែងPokemon Goនេះកំពុងធ្វើឲ្យយុវជនក្មេងៗ ឈ្លក់វង្វេង ប៉ុន្តែមតិសាធារណៈមួយចំនួនធំ កំពុងតែធ្វើការចោទសួរអំពីផលប៉ះពាល់ នៃល្បែងដ៏សែនគ្រោះថ្នាក់នេះ។ តើអ្វីទៅជាល្បែងPokemon Go?
សម្រាប់អ្នកដែលនិយមចូលចិត្តល្បែងហ្គេម គឺគេស្គាល់យ៉ាងច្បាស់នូវរូបតុក្តា Pokemon ដ៏ល្បីរបស់ជប៉ុនក្នុងទសវត្សឆ្នាំ៩០។ ល្បែងPokemon Go ថ្មីនេះ គឺជាលទ្ធផល នៃការសហការគ្នារវាងក្រុមហ៊ុនអាមេរិកឈ្មោះ Niantic ដែលមានជំនាញខាងកំណត់ភូមិសាស្ត្រ Google Map និងក្រុមហ៊ុនជប៉ុនពីរ គឺក្រុមហ៊ុន Nintendo និងក្រុមហ៊ុន Pokemon Company ដែលជាម្ចាស់តុក្តាPokemon។
Pokemon Go គឺជាល្បែងហ្គេមក្នុងទូរស័ព្ទ ដែលប្រើប្រាស់ប្រព័ន្ធកំណត់ទីតាំងភូមិសាស្ត្រ Géolocalisation ដែលអ្នកប្រើប្រាស់អាចមើលឃើញរូបភាពពិតនៃទីតាំងភូមិសាស្ត្ររបស់ខ្លួន នៅក្នុងទូរស័ព្ទពេលកំពុងតែលេងល្បែងនេះ។ របៀបលេង គឺអ្នកលេង ត្រូវតាមចាប់ តុក្តាPokemon ដែលអាចលេចចេញរូបរាង្គ នៅតាមទីតាំងភូមិសាស្ត្រនានា មិនថានៅតាមផ្លូវ នៅតាមទីសួនសាធារណៈ នៅលើដើមឈើ រឺនៅក្នុងទឹក ជាដើម។ ពេលដែលឃើញ រូបតុក្តាPokemon នៅកន្លែងណា អ្នកលេងត្រូវតែរត់ទៅឲ្យដល់កន្លែងនោះដើម្បីចាប់ យកពន្ទុ ដោយគ្រាន់តែទាញសញ្ញានៅលើទូរស័ព្ទ ទៅដាក់ពីលើតុក្តា។
មានន័យថា អ្នកលេងម្នាក់ៗត្រូវតែសម្លឹងមើលទូរស័ព្ទខ្លួន ដើម្បីតាមចាប់តុក្តា Pokemon។ ទោះក្នុងកាលៈទេសៈរឺទីតាំងណាក៏ដោយ អ្នកលេងដែលងប់ងុល ត្រូវហ៊ានហក់ទៅចាប់តុក្តានេះ ដើម្បីបានពិន្ទុ ឡើងទៅវគ្គបន្ត។ មិនត្រឹមតែប៉ុណ្ណោះ រូបតុក្តាPokemonមួយ ដែលលេចខ្លួននៅទីតាំងមួយ អាចមើលឃើញដោយមនុស្សច្រើននាក់។ ដូច្នេះអ្នកលេងទាំងអស់ ត្រូវតែប្រញ៉ាយដណ្តើមគ្នាដើម្បីចាប់ឲ្យបានមុនគេ។
ឈ្លក់វង្វេង នឹងការតាមចាប់តុក្តាPokemon លែងមើលផ្លូវ៖
ស្តាប់មួយភ្លែត វាហាក់ដូចជាសប្បាយ តែការពិត ល្បែងនេះបង្កប់ដោយគ្រោះថ្នាក់ សម្រាប់អ្នកលេងម្នាក់ៗ។ នេះហើយជាការព្រួយបារម្ភ។ អាជ្ញាធរប្រទេសជាច្រើន ចាប់ផ្តើមមានការព្រួយបារម្ភពីកត្តាសុវត្ថិភាព ដោយសារតែល្បែងនេះ អាចធ្វើឲ្យអ្នកលេងម្នាក់ៗឈ្លក់វង្វេង ភ្នែកសម្លឹងមើលតែទូរស័ព្ទ ដើម្បីផ្ទៀចតាមចាប់តុក្តាPokemon នៅពេលដែលពួកគេកំពុងដើរ រឺកំពុងតែបើកយានយន្តជាដើម។ អាជ្ញាធរ អេស្ប៉ាញ ក៏ដូចជាអាជ្ញាធរបារាំង បានអំពាវនាវ ឲ្យអ្នកលេងមានការប្រុងប្រយ័ត្ន ដើម្បីចៀសវាងគ្រោះថ្នាក់ជាយថាហេតុ។ ប្រទេសខ្លះ ដូចជាឥណ្ឌូណេស៊ីជាដើម បានថែមទាំងហាមឃាត់ មិនឲ្យល្បែងនេះមានសិទ្ធិធ្វើអាជីវកម្មក្នុងប្រទេសខ្លួនទៀតផង។
នៅសហរដ្ឋអាមេរិក មានករណីគ្រោះថ្នាក់ជាច្រើន បានកើតឡើងដោយសារតែល្បែងចំកួតនេះ។ យុវជនម្នាក់ បើកឡានបណ្តើរ ភ្នែកសំឡឹងរកមើលតុក្តាPokemon ក្នុងទូរស័ព្ទបណ្តើរ បានជ្រុលចង្កូត ទៅបុករថយន្តដែលចតនៅតាមផ្លូវ។ បុរសម្នាក់ កំពុងតែបើកឡានតាមផ្លូវ ស្រាប់តែឈប់ង៉ក់កណ្តាលផ្លូវ រួចស្ទុះចេញមកក្រៅ រត់ឆ្លងថ្នល់ទៅម្ខាងទៀត ដើម្បីតាមចាប់តុក្តា Pokemon ដោយគ្មានញញើតនឹងគ្រោះថ្នាក់។ នៅកាណាដា យុវជនពីរនាក់ បានដើរឆ្លងព្រំដែនពីកាណាដា មកអាមេរិក ដោយមិនដឹងខ្លួន និងដោយខុសច្បាប់ ដោយសារតែវក់វីនឹងការតាមប្រម៉ាញ់ តុក្តាPokemon។
រឿងគួរឲ្យហួសចិត្តមួយទៀត គឺក្មេងស្រីជំទង់ម្នាក់នៅអាមេរិក បានតស៊ូដើរកាត់កំពតព្រៃ ផ្លោះរបងឆ្លងទឹក ដើម្បីតាមចាប់តុក្តា Pokemon រហូតទាល់តែបានប្រទះនឹងសាកសពមនុស្សម្នាក់ ដែលអណ្តែតក្នុងទឹក។ នៅអាមេរិកដែរ បុរសម្ចាស់ផ្ទះម្នាក់ មានការភ្ញាក់ផ្អើលដោយឃើញមនុស្សរត់ចូលក្នុងផ្ទះខ្លួន ដោយសារតែប្រព័ន្ធGoogle Map បានផ្តល់រូបភាពដោយភ័នច្រឡំ ថាជាវិហារកាតូលិក។
ទិន្ន័យផ្ទាល់ខ្លួនក្នុងគណនីGoogle របស់អ្នកប្រើប្រាស់ ត្រូវបើកចំហរដោយសេរី៖
ក្រៅតែបញ្ហាសុវត្ថិភាពផ្លូវកាយ មតិជាច្រើនបានចោទសួរពីកត្តាសុវត្ថិភាព ទាក់ទិននឹងការការពារទិន្ន័យផ្ទាល់ខ្លួន របស់អ្នកលេងម្នាក់ៗ នៅលើបណ្តាញអ៊ីនធើនែត។ ល្បែង Pokemon Go តម្រូវឲ្យអ្នកលេង ត្រូវបើក រឺភ្ជាប់គណនីGoogle ជាចាំបាច់។ ដូច្នេះមានន័យថា ក្រុមហ៊ុនដែលជាអ្នកចាត់ចែងដំណើរការនៃល្បែងនេះ អាចប្រមូលទិន្ន័យទាំងស្រុង ពីគណនីរបស់អ្នកប្រើម្នាក់ៗ មិនថានៅក្នុងអាស័យដ្ឋានអ៊ីម៉ែល រឺមួយក៏រាល់បំលាស់ទីទៅណាមកណា របស់អ្នកប្រើប្រាស់។ បន្ទាប់មកទៀត ទិន្ន័យផ្ទាល់ខ្លួនទាំងនោះ អាចត្រូវបានលក់បន្ត ទៅឲ្យក្រុមហ៊ុនឯកជនផ្សេងទៀត ដែលត្រូវការវា ដើម្បីការផ្សាយពាណិជ្ជកម្មជាដើម។
តំណាងរាស្ត្រអាមេរិកម្នាក់ បានផ្ញើរលិខិតចំហរមួយ ទៅកាន់ក្រុមហ៊ុន Niantic ដើម្បីឲ្យក្រុមហ៊ុននេះ ពន្យល់អំពីចំណាត់ការក្នុងការការពារទិន្ន័យផ្ទាល់ខ្លួនរបស់អ្នកលេងម្នាក់ៗ។ រហូតមកដល់ពេលនេះក្រុមហ៊ុនមិនទាន់បានឆ្លើយតបទេ។ អ្នកនយោបាយ និងអ្នកការពារសិទ្ធិ ទូទាំងពិភពលោក មានការព្រួយបារម្ភខ្លាំងណាស់។
គ្រាន់តែចាប់ផ្តើមចេញឲ្យប្រើប្រាស់ភ្លាម ពាក្យចចាមអារ៉ាម បានលេចឮថា ល្បែងនេះ នឹងអនុញ្ញាតិឲ្យក្រុមហ៊ុនNiantic ចូលទៅលុកលុយដល់ក្នុងគណនីGoogle ផ្ទាល់ខ្លួនទាំងស្រុង។ ទើបតែកាលពីចុងសប្តាហ៍មុននេះ អ្នកជំនាញវិស្វករដែលតម្លើងហ្គេមនេះ បានសារភាពហើយបានប្រកាសថា ពួកគេទើបតែធ្វើការកែប្រែលើចំណុចខ្លះ ដើម្បីកាត់បន្ថយមិនឲ្យល្បែងនេះ ចូលទៅលុកលុយទិន្ន័យផ្ទាល់ខ្លួនរបស់អ្នកប្រើ ខ្លាំងហួសហេតុពេក។ ទោះជាយ៉ាងណា ល្បែងនេះនៅតែអនុញ្ញាតិឲ្យគេចូលទៅក្នុងអាស័យដ្ឋានអ៊ីម៉ែលរបស់អ្នកប្រើបានដដែល។
សប្បាយ ប្រយ័ត្នក្លាយជាទុក្ខ៖
ទោះបើប្រឈមមុខ នឹងចំណុចអវិជ្ជមានទាំងអស់នេះក្តី តាមការរំពឹងទុក ចំនួនអ្នកលេងអាចនឹងកើនឡើងដល់២៤លាននាក់ ដល់ដំនាច់ខែកក្កដា។ ការកម្សាន្តវាជាសិទ្ធិរបស់មនុស្សម្នាក់ៗ តែការកម្សាន្តដែលប្រកបដោយគ្រោះថ្នាក់ ដល់អ្នកដ៏ទៃ និងផ្ទាល់ខ្លួនឯង គួរណាតែត្រូវប្រុងប្រយ័ត្ន។
ល្បែងកំសាន្តតាមទំនៀមទំលាប់របស់ប្រជាជននីមួយៗ ដែលប្រកបដោយការចែករំលែកចំណេះដឹង រួមគ្នាសើចសប្បាយជុំគ្នា រវាងមិត្តភ័ក្ត ក៏ដូចជាមនុស្សទាំងពួង មានសព្វមិនខ្វះ។ តែល្បែងPokemon Go ដែលធ្វើឲ្យមនុស្សឈ្លក់វង្វេងតែម្នាក់ឯង នៅនឹងមុខកញ្ចក់ទូរស័ព្ទ ហើយថែមទាំងអាចនាំគ្រោះថ្នាក់មកដល់ខ្លួន គឺជាល្បែងមួយដែលឥតប្រយោជន៍ជាទីបំផុត។
ការរីកចំរើន ផ្នែកបច្ចេកវិទ្យារបស់មនុស្សសម័យទំនើប មិនប្រកដថាសុទ្ធតែល្អទាំងអស់ទេ។ បច្ចេកវិទ្យាខ្លះធ្វើឲ្យមនុស្សភ្លេចគិតពីខ្លឹមសារសំខាន់ នៃជីវិតរស់នៅប្រចាំថ្ងៃក៏មាន បើសិនអ្នកប្រើវាមិនចេះពិចារណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ