យុវនារីដ៏អាថ៌កំបាំងម្នាក់នៅជាប់លោកគឹម ជុងអ៊ុនជានរណា?
អ្នកឯកទេសផ្នែកកូរ៉េខាងជើង កំពុងតែចោទសួរ អំពីអត្តសញ្ញាណយុវនារីម្នាក់ដែលមានវត្តមានជាប់ជានិច្ចនឹងប្រមុខដឹកនាំកូរ៉េខាងជើងលោក គឹមជុងអ៊ុន ថាតើនារីនោះជានរណា? ជាប្អូនស្រីឬមួយក៏ជាស្រីកំណាន់ចិត្តរបស់លោក គឹម ជុងអ៊ុន?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅថ្ងៃអាទិត្យម្សិលមិញ ទូរទស្សន៍កូរ៉េខាងជើង បានផ្សព្វផ្សាយបង្ហាញរូបភាពជាច្រើនរបស់យុវនារីមួយរូបដែលអង្គុយជាប់ក្បែរប្រមុខដឹកនាំថ្មីកូរ៉េខាងជើងលោក គឹម ជុងអ៊ុន នៅក្នុងពិធីសំដែងគារវកិច្ចមួយចំពោះវិញ្ញាណក្ខន្ធសពលោក គឹម អ៊ីលស៊ុង។ លោកគឹម អ៊ីលស៊ុង ដែលត្រូវជាជីតារបស់គឹមជុងអ៊ុននិងក៏ជាស្ថាបនិកប្រទេសកូរ៉េខាងជើង ដែលបានទទួលអនិច្ចកម្មនៅឆ្នាំ១៩៩៤។ យុវនារីដដែលនេះ ដែលមានអាយុប្រមាណជា២០ឬ៣០ឆ្នាំប្រកបដោយសម្លៀកបំពាក់ព័ណ៌ខ្មៅសុទ្ធនិងមានសក់ខ្លី ត្រូវបានគេឃើញជាថ្មីទៀតនៅក្បែរលោកគឹមជុងអ៊ុន ក្នុងពិធីប្រគំវង់តន្ត្រីជាតិមួយកាលពីថ្ងៃសុក្រសប្តាហ៍មុន។
មធ្យោបាយឃោសនាមហាជនកូរ៉េខាងត្បូង ខ្លះបាន ប៉ាន់ស្មានថា នារី ដែលមានវត្តមាននៅជិតលោក គឹម គឺជាប្អូនស្រីរបស់គាត់ឈ្មោះ Yo-Long ។ នាងនេះ ក៏ប្រហែលជា ធ្លាប់ធ្វើការសិក្សា ជាមួយគឹមជុងអ៊ុនដែរ នៅប្រទេសស្វីសជំនាន់ឆ្នាំ៩០។ កាសែតកូរ៉េខាងត្បូងខ្លះទៀត បាននិយាយ យ៉ាងសាមញ្ញថា “នាងនោះគឺជាភរិយាគឹម ជុងអ៊ុន”។ យោងតាម ទិនានុប្បវត្តិ កូរ៉េខាងត្បូង ឈ្មោះ Joong Ang Ilbo នារីដែលនៅជាប់ជានិច្ចជាមួយលោក គឹម-ជុងអ៊ុន អាចជានាង Hyon Song-Wol ដែលជាអ្នកចម្រៀងដ៏ល្បីឈ្មោះម្នាក់នៅកូរ៉េខាងជើងនិងក៏អាចជាសង្សាររបស់លោកគីមដែរ ។
នារីរូបនេះ លែងបញ្ចេញមុខ ជាសាធារណៈតាំងពីឆ្នាំ២០០៦ម្ល៉េះ មុននឹងចាប់លេចមុខសាជាជាថ្មីនៅខែមីនាឆ្នាំ២០១២ ដោយមានផ្ទៃពោះផង។
នាងជាមិត្តនារី របស់គឹមជុងអ៊ុនតាំងពីវ័យជំទង់ ហើយ ពាក្យចចាមអារ៉ាមមួយ ដែលលេចឮនៅក្នុងរង្វង់ឥស្សរជនកូរ៉េខាងជើងក៏បញ្ជាក់ថា នាង Hyonនេះ ក៏ជាសង្សារ លោកគឹមជុងអ៊ុនដែរ- នេះជាការបញ្ជាក់បន្ថែមរបស់កាសែតJoong Ang Ilbo ។
ក៏ប៉ុន្តែ លោក Yang Moo-Jin វិញ ដែលធ្វើការនៅសាកលវិទ្យាល័យនៃទីក្រុង សេអ៊ូល ផ្នែក សិក្សា អំពីកូរ៉េខាងជើង - បានគូសបញ្ជាក់ថា “គេពុំអាចជឿថាយុវនារី ដ៏អាថ៌កំបាំងរូបនេះ អាចជាសង្សារប្រមុខដឹកនាំកូរ៉េខាងជើងបានឡើយ។ លោក Yang Moo-Jin-បានរំលឹកជាថ្មីទៀតថា តាំងពីយូរយារមកហើយ-គេកម្រឃើញមានភរិយា នៃប្រមុខដឹកនាំកូរ៉េខាងជើងណាមួយ បង្ហាញមុខជាសាធារណៈឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ