ការប្រយុទ្ធទល់នឹងកំណែទម្រង់ប្រព័ន្ធចូលនិវត្តន៍ឈានមកដល់ដំណាក់ការចុងក្រោយ
សប្តាហ៍សង្គមកិច្ចដ៏រំជើបរំជួល នៅប្រទេសបារាំងចាប់ផ្តើមជាមួយការប្រយុទ្ធជានិច្ចទល់នឹងកំណែ ទម្រង់ប្រព័ន្ធចូលនិវត្តន៍ប្រាថ្នាចង់បានដោយរដ្ឋាភិបាលដែលត្រូវ បានព្រឹទ្ធសភាអនុម័ត នៅថ្ងៃសុក្រ២២តុលា។ សប្តាហ៍ថ្មីនៃកំណែននេះនឹងត្រូវកត់សំគាល់ដោយបាតុកម្មថ្មីៗ ដោយការបន្តកូដកម្មនិងដោយកង្វះប្រេងឥន្ធនៈ។ សហជីពនានាអំពាវនាវឱ្យប្រារព្ធទិវាសកម្មភាពថ្មីនៅថ្ងៃព្រហស្បតិ៍ ២៨តុលាខាងមុខនេះជាថ្ងៃបន្ទាប់ពីរដ្ឋសភាប្រហែលជានឹងអនុម័តកំណែ ទម្រង់ប្រព័ន្ធចូលនិវត្តន៍។ប៉ុន្តែ សម្ពាធនៃបាតុកម្មនៅតាមផ្លូវនឹងមិនធ្លាក់ចុះឡើយ។ អន្តរសហជីពនៅតែកេណ្ឌគ្នីគ្នាយ៉ាងហោចណាស់រហូតដល់ការប្រកាសឱ្យ ប្រើច្បាប់ស្តីពីកំណែទម្រង់នេះប្រមើលទុកនៅពាក់កណ្តាលខែ វិច្ឆិកាក្រោយនេះ។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុន រតនា
ដោយមានប្រជាប្រិយភាពធ្លាក់ចុះទាបបំផុតដល់២៩% -ស្របតាមការស្ទង់មតិ លោកប្រធានាធិបតីNicolas Sarkozyកំពុងប្រឈមមុខនឹងវិបត្តិដ៏ធ្ងន់ធ្ងរបំផុត ចាប់តាំងពីបានជាប់ឆ្នោតនៅឆ្នាំ២០០៧មក។គាត់រំពឹងទៅលើវិស្សមកាលនៃសិស្សានុសិស្សនិងការពន្លឿនប្រតិទិននីតិបញ្ញត្តិ ដើម្បីបន្ទន់បន្សោយកំណែនមុននឹងរុះរើគណៈរដ្ឋមន្ត្រីរបស់គាត់។
លោកប្រធានាធិបតីលេងធំក្នុងចន្លោះពេល១៨ខែទៀតពីការបោះឆ្នោតជ្រើសរើសប្រធានាធិបតីគឺគាត់បានចាត់ទុកកំណែទម្រង់នេះដែលលើកអាយុតិចបំផុតសំរាប់ចូលនិវត្តន៍ពី៦០ទៅ៦២ឆ្នាំថាជាអាទិភាពមួយនៃដំណាច់អាណត្តិរបស់គាត់និងជានិមិត្តរូបនៃការសន្យារបស់គាត់ថានឹងផ្លាស់ប្តូរប្រទេសបារាំង។
ទីប្រឹក្សាខាងសង្គមកិច្ចរបស់លោកSarkozy គឺលោកRaymond Soubie បានយល់ឃើញថា នឹងគ្មានទេ ទោះជាអ្នកឈ្នះក្តី ទោះជាអ្នកចាញ់ក្តី ក្នុងការកាច់កុងគ្នានេះ។ កំណែទម្រង់នេះនឹងដំណើរការទៅ គឺជាជ័យជំនះមួយសំរាប់ប្រទេសបារាំងនិងប្រជាជនបារាំង។
ប្រសិនបើសហជីពនានានៅតែរក្សាគំនាប នោះរដ្ឋាភិបាលនឹងពុំចុះញ៉មឡើយ។កំណែទម្រង់ប្រព័ន្ធចូលនិវត្តន៍ប្រហែលជានឹងត្រូវរដ្ឋសភាអនុម័តជាស្ថាពរនៅពាក់កណ្តាលសប្តាហ៍នេះ។
ប៉ុន្តែ សំរាប់សហជីពនានា ដរាបណាក្រិត្យស្តីពីកំណែទម្រង់ប្រព័ន្ធចូលនិវត្តន៍នឹងពុំទាន់ត្រូវបានចុះហត្ថលេខាដោយលោកប្រធានាធិបតីសាធារណរដ្ឋទេ នោះរាល់អ្វីៗអាចនឹងកើតមាន។ សហជីពនានានឹងបញ្ចេញកម្លាំងខ្លួនទាំងអស់ នៅក្នុងការកាច់កុងគ្នាចុងក្រោយ មុនការប្រកាសឱ្យប្រើច្បាប់ស្តីពីកំណែទម្រង់នេះ ប្រមើលទុកនៅពាក់កណ្តាលខែវិច្ឆិកាក្រោយនេះ។ សម្ពាធនៅក្នុងវិស័យថាមពលនឹងត្រូវរក្សាទុកហើយទិវាសកម្មភាពដទៃទៀតត្រូវបានគ្រោងទុកគឺពួកនិស្សិតនឹងចេញដើរធ្វើបាតុកម្មនៅតាមផ្លូវ នៅថ្ងៃអង្គារស្អែក២៦តុលា មុនការប្រារព្ធទិវាសកម្មភាពទូទាំងប្រទេសជាតិ នៅថ្ងៃព្រហស្បតិ៍២៨តុលាខាងមុខដែលនឹងត្រូវបន្តដោយទិវាសកម្មភាពមួយទៀតនៅថ្ងៃ៦វិច្ឆិកា។
នៅថ្ងៃអាទិត្យម្សិលមិញ ប្រទេសបារាំងបានស្គាល់កង្វះប្រេងឥន្ធនៈ។កន្លែងចាក់សាំងចំនួន១/៤ នៅប្រទេសបារាំង គ្មានសាំងសំរាប់ចាក់ឱ្យទេ។សហភាពឩស្សាហកម្មប្រេងកាតបារាំងព្រួយបារម្ភនឹងការអាចធ្លាក់ចុះដុនដាបនៃស្ថានភាពនៅថ្ងៃចន្ទ២៥តុលានេះ ដោយហេតុការឈប់ស្ងៀមទាំងបង្ខំនៃពួកអ្នកបើកឡានសាំងសំរាប់ដឹកយកទៅឱ្យហាងចាក់សាំង។
ស្របតាមក្រសួងហិរញ្ញវត្ថុបារាំងចុះផ្សាយដោយកាសែតLe Figaro ចេញនៅថ្ងៃចន្ទនេះ សេដ្ឋកិច្ចបារាំងខាតបង់ប្រាក់ពី២០០ ទៅ៤០០លានអឺរ៉ូសំរាប់ទិវាកូដកម្មមួយថ្ងៃៗ។កូដកម្មនិថបាតុកម្ម៨ថ្ងៃរៀបចំធ្វើដោយសហជីពនានាបានធ្វើឱ្យសេដ្ឋកិច្ចបារាំងខាតបង់ប្រាក់ប្រមាណជា៣០០០លានអឺរ៉ូរួចទៅហើយ ដោយពុំគិតដល់ការចុះដុនដាបនៃរូបភាព ឬកេរ្តិ៍ឈ្មោះប្រទេសបារាំងដែលគេពុំអាចគិតថ្លៃបានសោះឡើយ។រីឯក្រុមហ៊ុនអាកាសចរណ៍បារាំងAir France ខាតបង់យ៉ាងតិច៥លានអឺរ៉ូ ក្នុងមួយថ្ងៃនៃកូដកម្ម និងបាតុកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ