ការបង្ហោះយានអវកាសឥណ្ឌាទៅភពព្រះអង្គារនឹងជំរុញការប្រជែងផ្នែកអវកាសនៅអាស៊ី
ចុះផ្សាយនៅថ្ងៃ៖
ស្តាប់ - ០៣:៤៥
កាលពីថ្ងៃអង្គារ ឥណ្ឌាបានបាញ់បង្ហោះយានអវកាសមួយគ្រឿងឆ្ពោះទៅកាន់ភពព្រះអង្គារ។ ការបាញ់បង្ហោះត្រូវបានធ្វើឡើងដោយជោគជ័យ ក៏ប៉ុន្តែ គេត្រូវរង់ចាំជាច្រើនខែទៀតទើបអាចដឹងថា តើយានអវកាសនេះនឹងអាចធ្វើដំណើរទៅដល់ភពព្រះអង្គារដែរឬក៏យ៉ាងណា។ ប្រសិនបើបេសកកម្មនេះពិតជាទទួលបានជោគជ័យមែន ឥណ្ឌានឹងក្លាយទៅជាប្រទេសដំបូងបង្អស់ នៅក្នុងតំបន់អាស៊ី ដែលអាចបញ្ជូនយានទៅកាន់ភពព្រះអង្គារបាន ហើយនេះទំនងជានឹងធ្វើឲ្យការប្រកួតប្រជែងផ្នែកអវកាស នៅក្នុងតំបន់អាស៊ី កើតមានកាន់តែស្រួចស្រាវថែមទៀត។
រ៉ុកកែតផ្ទុកយានអវកាសឥណ្ឌាត្រូវបានបាញ់បង្ហោះប្រកបដោយជោគជ័យ កាលពីថ្ងៃអង្គារ។ យានអវកាសគ្មានមនុស្សបើកនេះនឹងត្រូវធ្វើដំណើរឆ្លងកាត់ទីអវកាស ក្នុងរយៈចម្ងាយរាប់រយលានគីឡូម៉ែត្រ និងត្រូវចំណាយពេលជិត១ឆ្នាំ ទើបទៅដល់គន្លងតារាវិថីនៃភពព្រះអង្គារ។
យានអវកាសនេះនឹងមិនធ្វើការចុះចតនៅលើដីភពព្រះអង្គារនោះទេ គឺគ្រាន់តែធ្វើដំណើរនៅក្នុងគន្លងតារាវិថី ជុំវិញភពនេះតែប៉ុណ្ណោះ។ នៅលើយានអវកាសនេះ មានបំពាក់ទៅដោយឧបករណ៍វិទ្យាសាស្រ្តមួយចំនួន ដើម្បីធ្វើការសិក្សាទៅលើបរិយាកាសជុំវិញភពព្រះអង្គារ ព្រមទាំងសិក្សាមើល ក្រែងលោមានតម្រ៉ុយនៃជីវិតនៅលើភពនេះ។
ក៏ប៉ុន្តែ អ្នកខ្លះបានចោទជាសំណួរថា តើឥណ្ឌាមានប្រយោជន៍អ្វី ដែលទៅសិក្សាពីភពព្រះអង្គារ ដែលនៅចម្ងាយរាប់រយលានគីឡូម៉ែត្រពីភពផែនដី នៅក្នុងពេលដែលប្រជាជនឥណ្ឌារាប់លាននាក់ កំពុងរស់នៅក្នុងភាពក្រីក្រសព្វថ្ងៃនេះ?
អ្នកជំនាញខាងផ្នែកអវកាសជាច្រើនយល់ថា ការណ៍ដែលឥណ្ឌាបញ្ជូនយានអវកាសទៅកាន់ភពព្រះអង្គារនៅពេលនេះ មិនសូវជាមានគោលដៅខាងផ្នែកវិទ្យាសាស្រ្តប៉ុន្មាននោះទេ ពីព្រោះថា ឧបករណ៍ដែលបំពាក់លើយានអវកាសរបស់ឥណ្ឌានេះ អាចឲ្យឥណ្ឌាសិក្សាស្វែងយល់បានតែទៅលើចំណុចដែលភាគច្រើនត្រូវបានគេសិក្សាដឹងយ៉ាងច្រើន និងបានផ្សព្វផ្សាយយ៉ាងទូលំទូលាយរួចទៅហើយ ជាពិសេស គឺការសិក្សាចេញពីទិន្នន័យផ្តល់ដោយរ៉ូបូរបស់អាមេរិក ឈ្មោះ Curiosity ដែលកំពុងស្ថិតនៅលើដីរបស់ភពព្រះអង្គារតែម្តង។
ដូច្នេះ គោលដៅធំបំផុតរបស់ឥណ្ឌា គឺមិនមែន ដើម្បីសិក្សាពីភពព្រះអង្គារនោះទេ ក៏ប៉ុន្តែ គឺដើម្បីធ្វើតេស្ត និងបង្អួតពីបច្ចេកវិទ្យាផ្នែកអវកាសឥណ្ឌាដល់ពិភពលោកបានឃើញ។ និយាយឲ្យចំ វាគឺជាផ្នែកមួយនៃការប្រកួតប្រជែងខាងផ្នែកអវកាស នៅក្នុងតំបន់អាស៊ី ជាពិសេស គឺឥណ្ឌាចង់ប្រជែងជាមួយចិន ដែលជាគូប្រជែងដ៏ធំមួយរបស់ឥណ្ឌា។
រហូតមកទល់នឹងពេលនេះ ឥណ្ឌាតែងតែដើរពីក្រោយចិន ខាងផ្នែកបច្ចេកវិទ្យាអវកាស។ ចិនបានបញ្ជូនយានគ្មានមនុស្សបើកទៅកាន់ព្រះចន្ទ តាំងពីឆ្នាំ២០០៧ ពោលគឺ ១ឆ្នាំមុនឥណ្ឌា។ ចិនបានបញ្ជូនមនុស្សទៅកាន់ទីអវកាសតាំងពីឆ្នាំ២០០៣ ក្នុងពេលដែលឥណ្ឌានៅមិនទាន់អាចធ្វើបានម្តង។ បច្ចុប្បន្ន ចិនមានបច្ចេកវិទ្យាទំនើប ក្នុងការផលិតរ៉ុកែត ដែលអាចផ្ទុកយានដែលមានទម្ងន់ធ្ងន់ជាងអ្វីដែលឥណ្ឌាអាចធ្វើបាន។
ឥណ្ឌាសំឡឹងឃើញបេសកកម្មទៅកាន់ភពព្រះអង្គារថាជាឱកាសដ៏ល្អមួយ ដើម្បីយកជ័យជម្នះលើចិនវិញ ដោយសារតែរហូតមកទល់នឹងពេលនេះចិននៅមិនទាន់អាចបញ្ជូនយានអវកាសទៅកាន់ភពព្រះអង្គារនេះបាននៅឡើយទេ។ ចិនធ្លាប់បានព្យាយាមធ្វើម្តងដែរ កាលពីឆ្នាំ២០១១ ក៏ប៉ុន្តែ ត្រូវទទួលបរាជ័យ។
ដូច្នេះ បើសិនជាយានអវកាស ដែលឥណ្ឌាបាញ់បង្ហោះកាលពីថ្ងៃអង្គារនេះ អាចធ្វើដំណើរទៅដល់គន្លងតារាវិថីនៃភពព្រះអង្គារមែន វាគឺជាមោទនភាពដ៏ធំមួយ សម្រាប់ឥណ្ឌា។ ឥណ្ឌាមិនត្រឹមតែអាចយកឈ្នះចិនតែមួយនោះទេ ក៏ប៉ុន្តែ អាចដើរមួយជំហានមុនប្រទេសណាៗទាំងអស់នៅអាស៊ី ពីព្រោះថា រហូតមកទល់នឹងពេលនេះ មិនទាន់មានប្រទេសអាស៊ីណាមួយ ដែលអាចបញ្ជូនយានអវកាសទៅដល់ភពព្រះអង្គារបាននៅឡើយទេ។ បើនិយាយនៅក្នុងទូទាំងពិភពលោកទាំងមូល មានប្រទេសតែ៣ប៉ុណ្ណោះ ដែលធ្លាប់ទទួលជោគជ័យក្នុងការបញ្ជូនយានអវកាសទៅកាន់ភពព្រះអង្គារ គឺសហរដ្ឋអាមេរិក អតីតសហភាពសូវៀត និងសហភាពអឺរ៉ុប។
ជោគជ័យរបស់ឥណ្ឌា គឺជាមោទនភាពសម្រាប់ប្រជាជនឥណ្ឌា ក៏ប៉ុន្តែ វាក៏ប្រហែលជានឹងជំរុញឲ្យការប្រកួតប្រជែងខាងផ្នែកអវកាសអាចកើតមានកាន់តែស្រួចស្រាវឡើងដែរ រវាងប្រទេសនៅអាស៊ី។ នៅអាស៊ី មានប្រទេស ៣ ដែលអាចមានការប្រកួតប្រជែងគ្នាក្នុងទីអវកាស គឺ ជប៉ុន ចិន និងឥណ្ឌា។ ក្នុងចំណោមប្រទេសទាំងបីនេះ ជប៉ុន គឺជាប្រទេសដែលមានបទពិសោធន៍ចាស់ឆ្នាំជាងគេក្នុងបច្ចេកវិទ្យាផ្នែកអវកាស។ ចិនបោះជំហានចូលទីអវកាសក្រោយជប៉ុន ក៏ប៉ុន្តែ ជាប្រទេសដែលសម្បូរលុយ ហើយដែលមិនញញើតនឹងចំណាយក្នុងការអភិវឌ្ឍកម្មវិធីអវកាស ក្នុងពេលដែលជប៉ុនមិនទាន់ងើបផុតពីវិបត្តិសេដ្ឋកិច្ច។ ចំណែកឥណ្ឌាវិញ ក្នុងពេលបច្ចុប្បន្ននេះ នៅជាប្រទេសដែលមានបច្ចេកវិទ្យាអវកាសអន់ថយនៅឡើយ បើធៀបនឹងជប៉ុន ឬចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ