ជំនួបកំពូលអង្គការសហប្រតិបត្តិការសៀងហៃ
ថ្ងៃនេះ ក្នុងរដ្ឋធានីប្រទេស Ouzbekistan ជាថ្ងៃបើកជំនួបកំពូល នៃ “អង្គការសហប្រតិបត្តិការក្រុងសៀងហៃ “ ហៅកាត់ថា OCS ដោយមានការចូលរួមនៃលោកប្រមុខរដ្ឋរុស្ស៊ីDmitri Medvedev លោកប្រធានាធិបតីចិន Hu Jintao និងមេដឹកនាំនៃ៤ប្រទេសទៀត ជា សមាជិកពេញសិទ្ធិអង្គការនេះ គឺ Kazakhstan Kirghizistan Tadjikistan និង Ouzbekistan ព្រមទាំង បណ្តាតំណាងរបស់រដ្ឋសង្កេតការណ៍ គឺឥណ្ឌា ប៉ាគីស្តង់ អៀរ៉ង់ ម៉ុងហ្គោលី និងក្នុងឋានៈជាភ្ញៀវ គឺប្រធានាធិបតីអាហ្វហ្កានិស្តង់ និងទួរគ្មេនិស្តង់។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីម៉ូស្គូ
ប្រធានបទសំខាន់ៗនៃជំនួបនេះ តាមដែលវិមានក្រឹមឡាំងជូនជាដំណឹង គឺអំពី ៖
- បញ្ហាបង្កើនតទៅទៀត ប្រសិទ្ធិភាពនៃសហប្រតិបត្តិការ ក្នុងក្របខ័ណ្ឌ OCS
- បញ្ហាពង្រឹងសន្តិសុខតំបន់
- បញ្ហាប្រយុទ្ធរួមគ្នាទល់នឹងអំពើភេរវកម្ម និងពួកជ្រុលនិយម
- បញ្ហាប្រយុទ្ធទល់នឹងឧក្រិដ្ឋកម្មឆ្លងដែន ប្រយុទ្ធទល់នឹងចរាចរណ៍គ្រឿងញៀន
រួចក្នុងឋានៈជាតុល្យាការមួយដ៏ចំបង គឹការអនុម័តយក “ ឯកសារស្តីអំពីរបៀបរបបសំរាប់ទទួលប្រទេសនេះ ឬនោះ ចូលជាសមាជិកថ្មីរបស់អង្គការ OCS “។
ការដែលជំនួបកំពូលលើកនេះ វាប្រព្រឹត្តទៅនៅក្រុងTachkent រដ្ឋធានី Ouzbekistan មកពីក្នុងឆ្នាំ២០១០នេះ គឺ Ouzbekistan នេះឯង ដែលបំពេញមុខងារជាប្រធាន OCS ដើម្បីបន្ទាប់មកបន្តវេននេះ ទៅ Kazakhstan ក្នុងឆ្នាំក្រោយ ឆ្នាំ២០១១ ដែលជាខួប១០ឆ្នាំរបស់ OCS តែម្តង។តាមពិត អង្គការនេះបានលេចចេញជារូបរាង តាំងពីថ្ងៃ ២៦មេសា ឆ្នាំ១៩៩៦ម៉្លេះ កាលដែល នៅក្រុងសៀងហៃ មានប្រមុខនៃ ៥រដ្ឋបានចុះហត្ថលេខាលើ “ កិច្ចព្រមព្រៀងស្តីអំពីការពង្រឹងជំនឿទុកចិត្តគ្នា ក្នុងវិស័យយោធានៅត្រង់តំបន់ព្រំដែនរួម ព្រំដែនដែលនៅខាងម្ខាងគឺ ចិន នៅខាងម្ខាងទៀត គឺអតីតសាធារណរដ្ឋសូវៀត Russie Kazakhstan Kirghizistan Tadjikistanតាមរយៈកិច្ចព្រមព្រៀងនេះ មានលេចចេញមកជា សម្ពន្ធនយោបាយឈ្មោះថា “ បញ្ចប្រទេសក្រុងសៀងហៃ “ ដែលតាំងគោលដៅធំចំបង គឺធានាឲ្យមានស្ថិរភាពនៅតាមបណ្តោយព្រំដែននោះ។
បន្តិចម្តងៗ សម្ពន្ធនោះ ក៏ដុះដាលលយចេញផុតពី បរិវេណនៃសហប្រតិបត្តិការតែអន្តរព្រំដែនប៉ុណ្ណោះ។ លុះក្នុងឆ្នាំ២០០០ សម្ពន្ធ “បញ្ចប្រទេសក្រុងសៀងហៃ” ក៏ប្រែក្លាយទៅជា “វេទិកាក្រុងសៀងហៃ”។ រួចទើបនៅថ្ងៃ១៤មិថុនាឆ្នាំ២០០១ទេតើ ដែលក្នុងជំនួបកំពូលនៅក្រុងសៀងហៃ មានរដ្ឋ Ouzbekistan បានភ្ជាប់ខ្លួនទៅនឹងវេទិកានេះដែរ ទាល់តែនៅថ្ងៃបន្ទាប់មក គឺថ្ងែ១៥មិថុនាឆ្នាំ២០០១ មានប្រមុខនៃ ៦រដ្ឋទៅហើយ បានចុះហត្ថលេខាលើ៖“ សេចក្តីប្រកាស ស្តីអំពីការបង្កើតឡើង ជាអង្គការសហប្រតិបត្តិការក្រុងសៀងហៃ ហៅកាត់ថា OCS។ អង្គការនេះក៏បើកចំហ សំរាប់ទទួលប្រទេសនានានៅជិតខាង ឲ្យមានស្ថានភាពជាសមាជិកសង្កេតការណ៍របស់ខ្លួន។ ឧទាហរណ៍ ក្នុងឆ្នាំ ២០០៤ គឺបានទទួលប្រទេស Mongolie ក្នុងឆ្នាំ ២០០៥ បានទទួល ឥណ្ឌា អៀរ៉ង់ ប៉ាគីស្តង់ ជាសមាជិកសង្កេតការណ៍។ រួចក្នុងឆ្នាំ ២០១០នេះ មាន២ប្រទេស បានក្លាយទៅជាដៃគូសន្ទនារបស់ OCS ពោលគឺ ប្រទេសសេរីលង្កា និង Bielorussie។
ក្នុងផ្ទៃនៃអំពើភេរវកម្ម ដែលជាគ្រោះថ្នាក់ដល់សន្តិសុខខ្លួន អង្គការ OCS តែងធ្វើសមយុទ្ធប្រឆាំងភេរវកម្មជារឿយៗ យ៉ាងហោចណាស់គឺ២ឆ្នាំម្តង ហើយក្នុងឆ្នាំ២០១០នេះ វានឹងប្រព្រឹត្តទៅនៅលើដែនដី Kazakhstan។កាលពីឆ្នាំ២០០៦ អង្គការបានប្រកាសអំពីផែនការប្រយុទ្ធនឹងពួក Mafia អន្តរជាតិខាងជួញគ្រឿងញៀន។
ក្នុងខែមីនាឆ្នាំ ២០០៩ នៅម៉ូស្គូ មានប្រព្រឹត្តទៅ សន្និសីទអន្តរជាតិចាត់ចែងឡើងដោយ OCS ដោយមានការចូលរួមរបស់សហភាពអឺរ៉ុប និង បក្សសម្ពន្ធ OTAN ជុំវិញស្ថានការណ៍ នៅ Afghanistan និងឥទ្ធិពល ដែលវាជះទៅលើប្រទេសជិតខាង។
មិនតែប៉ុណ្ណោះ OCS ក៏លើកជាអាទិភាពខ្លួន គឺទិសដៅនៃសហប្រតិបត្តិការសេដ្ឋកិច្ច បែបយ៉ាងអភិវឌ្ឍន៍ហេដ្ឋារចនាសម្ពន្ធដឹកជញ្ជូន វិស័យថាមពល វិស័យទូរគមនាគមន៍ វិស័យឧស្ម័ន ប្រេងកាត វិស័យកសិកម្ម។ល។ ចាប់ពីឆ្នាំ ២០០៤មក អង្គការ OCS មានលេខាធិការដ្ឋានខ្លួន ប្រចាំនៅក្រុង Pekin។
អង្កការOCS ដោយបូកទាំង ប្រទេសជាសមាជិកសង្កេតកាណ៍ផង មានដែនដីលាតសន្ធឹង ពីមហាសមុទ្ទ Atlantique រហូតដល់មហាសមុទ្ទ Pacifique និងពីសមុទ្ទទឹកកកនៅឧត្តរ ដល់សមុទ្ទឥណ្ឌា នៅទក្សិណ។ មានដល់៦១% នៃផ្ទៃក្រឡាទ្វីប Europe និង Asie ឬ១/៤ នៃដីគោកក្នុងលោក។ ចំណែកបណ្តាជនគឺដល់ ២.៩០០លាននាក់ ឫ សឹងពាក់កណ្តាល។ រីឯសក្តានុពលសរុបនៃសេដ្ឋកិច្ច គឺមានទំហំដល់ ៤៥% នៃទីផ្សារពិភពលោក។
ជំនួបកំពូលលើកនេះត្រូវអនុម័តយក “ ឯកសារស្តីអំពីរបៀបរបបសំរាប់ទទួលប្រទេសនេះ ឬនោះ ចូលជាសមាជិកថ្មីរបស់អង្គការ OCS “។ ស្របនឹងលក្ខណៈវិនិច្ឆ័យក្នុងរបៀបរបបនោះ បើប្រទេសណាជាប់ក្នុងទណ្ឌកម្មរបស់ អ.ស.ប. គឺមិនអាចត្រូវទទួលឲ្យចូលជា សមាជិកពេញលក្ខណៈរបស់ OCS ឡើយ។ តាមដែលកាសែតរុស្ស៊ីឈ្មោះ Kommersant លេខថ្ងៃនេះចុះផ្សាយដោយយោងទៅលើ ប្រភពការទូតដែលច្បាស់ការណ៍ រុស្ស៊ី និងចិន ដែលម្សិលមិញបានបោះឆ្នោតនៅឯក្រុមប្រឹក្សាសន្តិសុខអ.ស.ប. ដាក់ទណ្ឌកម្មអៀរ៉ង់ ទាមទារឲ្យបញ្ចូលលក្ខណៈវិនិច្ឆ័យបែបនេះ ទៅក្នុងឯកសារដែលត្រូវអនុម័តយក។ កាសែតនោះថែមទាំងលំអិតឲ្យដឹងទៅផងថា “ ក្រុង Teheranតាមខ្សែរយៈការទូត បានផ្ញើទៅគ្រប់ទាំង ៦រដ្ឋ OCS នូវលិខិតសុំឲ្យអញ្ជើញលោកប្រធានាធិបតីអៀរ៉ង់ Ahmedinejad ទៅចូលរួមក្នុងជំនួបកំពូលនៅក្រុងTachkent ប៉ុន្តែ លទ្ធផលដែលមាននាំឲ្យគាត់ខកចិត្តសោះ ដ្បិតមានតែ Tadjikistan មួយប៉ុណ្ណោះ ដែលបានគាំទ្រអៀរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ