លោកសុនឆ័យសួរនាំលោកឡេងប៉េងឡុង ជុំវិញចំនួនបុគ្គលិកនិងបញ្ហាគ្រួសារនិយមនៅរដ្ឋសភា
ក្នុងនាមគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម ឬគណៈកម្មការទី២ នៃរដ្ឋសភា លោក សុន ឆ័យ ដែលជាអនុប្រធានគណៈកម្មការនេះ បានជួបប្រជុំជាលើកដំបូងជាមួយលោក ឡេង ប៉េងឡុង អគ្គលេខាធិការរដ្ឋសភា នាព្រឹកថ្ងៃទី១០មីនានេះ នៅរដ្ឋសភា។ ក្នុងកិច្ចប្រជុំដោយបិទទ្វារប្រហែលជា ២ ម៉ោង លោកសុនឆ័យ បានសួរនាំលោកឡេងប៉េងឡុង អំពីការចំណាយលើការទិញសម្ភារៈ ចំនួនបុគ្គលិកដ៏ច្រើន និងបញ្ហាគ្រួសារនិយមនៅរដ្ឋសភា។ រាល់បញ្ហាមិនប្រក្រតី ដែលលោកសុនឆ័យ ចោទសួរ និងទាមទាររកឯកសារបញ្ជាក់ទាំងនោះ មិនត្រូវបានលោកអគ្គលេខាធិការ ផ្តល់ឲ្យនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
តាមពិតទៅ លោកជាមយៀប ក្នុងនាមជាប្រធានគណៈកម្មការទី២ បានចេញលិខិតកោះអញ្ជើញអគ្គលេខាធិការរដ្ឋសភា លោក ឡេងប៉េងឡុង ឲ្យចូលឆ្លើយបំភ្លឺពីលទ្ធកម្មសាធារណៈនៅរដ្ឋសភា នាព្រឹកថ្ងៃទី១០មីនានេះ។ ប៉ុន្តែលោកជាមយៀប អ្នកតំណាងរាស្ត្រគណបក្សប្រជាជនកម្ពុជា បានផ្តល់សិទ្ធិឲ្យលោក សុន ឆ័យ អនុប្រធានគណៈកម្មការទី២ និងជាអ្នកតំណាងរាស្ត្រមកពីគណបក្សសង្គ្រោះជាតិ ដើម្បីដឹកនាំកិច្ចប្រជុំ និងសួរដេញដោលលោកអគ្គលេខាធិការរដ្ឋសភា។
ការចំណាយលើការទិញសម្ភារៈនៅរដ្ឋសភា ត្រូវបានលើកឡើង។ លោកសុនឆ័យ អះអាងថា ការចំណាយ និងគម្រោងទិញសម្ភារៈឧបករណ៍ប្រើប្រាស់នៅរដ្ឋសភា ថ្លៃហួសហេតុ ដូចជា ចំណាយលើសេវាកម្ម ១១,៥ លានដុល្លារ ក្នុងមួយឆ្នាំ និងគម្រោងចំណាយលើការទិញឧបករណ៍ការពាររន្ទះ មួយគ្រឿងថ្លៃ ១២.០០០ ដុល្លារ សាងសង់ ក្លោងទ្វារ និងដងទង់ជាតិ ជាដើម។
ចំនួនបុគ្គលិកនៅរដ្ឋសភា ក៏ត្រូវលោក សុន ឆ័យ អះអាងថា សព្វថ្ងៃ មានជាង ១៣០០ នាក់ និងបញ្ហាគ្រួសារនិយមរបស់លោក មិត្ត ការ៉េន អគ្គលេខាធិការរងរដ្ឋសភា បានកាន់តំណែងជាអ្នកកាន់លុយ និងធ្វើសវនកម្ម នៅរដ្ឋសភា ក៏ត្រូវបានលើកឡើងក្នុងកិច្ចប្រជុំ នៅព្រឹកមិញផងដែរ។
ក្នុងកិច្ចប្រជុំ លោកសុនឆ័យ បានអះអាងថា លោកបានបញ្ជាក់ទៅកាន់អគ្គលេខាធិការរដ្ឋសភាថា “អំពើលួចថវិកាជាតិ ជាអំពើឧក្រិដ្ឋ។ ការតែងតាំងបុគ្គលិក ដោយជាគ្រួសារ ឬដោយសំណូក នៅក្នុងតួនាទី ជាអំពើឧក្រិដ្ឋ មានចែងក្នុងក្រមព្រហ្មទណ្ឌ។
លោក សុន ឆ័យ បញ្ជាក់ថា កិច្ចប្រជុំ នាព្រឹកមិញ មិនទាន់ដោះស្រាយបញ្ហាខាងលើ នៅឡើយទេ។ មូលហេតុ មកពីលោក ឡេងប៉េងឡុង មិនព្រមផ្តល់ឯកសារដល់គណៈកម្មការទី២រដ្ឋសភាឡើយ។
លោក ឡេង ប៉េងឡុង ពេលដើរចេញពីបន្ទប់ប្រជុំ បានបដិសេធ មិនផ្តល់សម្ភាសន៍ ដល់អ្នកកាសែតទេ។ ប៉ុន្តែលោកសុនឆ័យ បានប្រាប់ថា ក្នុងកិច្ចប្រជុំ លោក ឡេង ប៉េងឡុង មិនហ៊ានឆ្លើយពន្យល់អ្វីទេ អំពីការចំណាយរបស់រដ្ឋសភា។ តែលោក ឡេង ប៉េងឡុង បានសន្យាចំពោះមុខគណៈកម្មការទី២រដ្ឋសភាថា នឹងទៅពិគ្រោះយោបល់ជាមួយប្រធានរដ្ឋសភា ពាក់ព័ន្ធនឹងការស្នើសុំឯកសារ និងបញ្ជីចំណាយរបស់រដ្ឋសភា។ការចំណាយ និងអ្វីៗទាំងអស់ ដែលលោកអគ្គលេខាធិការ អះអាងថា មានការឯកភាពពីប្រធានរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ