លោកស្រីអ៊ុងសានស៊ូជីសំឡឹងឃើញសិង្ហបុរីជាគំរូសម្រាប់កំណែទម្រង់នៅភូមា
ចុះផ្សាយនៅថ្ងៃ៖
ស្តាប់ - ០៤:២៤
កាលពីថ្ងៃចន្ទ ដើមសប្តាហ៍នេះ លោកស្រីអ៊ុង សានស៊ូជី ប្រមុខដឹកនាំប្រឆាំងភូមា និងជាជ័យលាភីណូបែលសន្តិភាពពិភពលោក បានបិទបញ្ចប់ដំណើរទស្សនកិច្ចរយៈពេល ៥ថ្ងៃ នៅក្នុងប្រទេសសិង្ហបុរី ដោយបានបង្ហាញនូវការកោតសរសើរ និងចង់យកគំរូពីជោគជ័យរបស់កូនប្រទេសមួយនេះ ក្នុងការធ្វើកំណែទម្រង់ និងអភិវឌ្ឍសេដ្ឋកិច្ចរបស់ខ្លួន។ ក៏ប៉ុន្តែ ក្នុងពេលដែលសិង្ហបុរីគឺជាគំរូល្អមួយខាងការអភិវឌ្ឍសេដ្ឋកិច្ច និងអភិបាលកិច្ច សិង្ហបុរីហាក់ដូចជាមិនសូវជាគំរូល្អប៉ុន្មាននោះទេ ខាងផ្នែកប្រជាធិបតេយ្យ និងសិទ្ធិសេរីភាព។
នៅក្នុងដំណើរទស្សនកិច្ចរយៈពេល ៥ថ្ងៃ នៅក្នុងប្រទេសសិង្ហបុរី លោកស្រីអ៊ុង សានស៊ូជី ប្រមុខដឹកនាំបក្សប្រឆាំងភូមា បានជួបជាមួយនឹងលោកនាយករដ្ឋមន្រ្តីលី សៀនឡុង និងថ្នាក់ដឹកនាំក្រុមហ៊ុនធំៗមួយចំនួន ព្រមទាំងបានធ្វើដំណើរទៅមើលការិយាល័យប្រឆាំងអំពើពុករលួយ ដែលល្បីឈ្មោះខាងការបង្រ្កាបអំពើពុករលួយ នៅសិង្ហបុរី។
នៅល្ងាចថ្ងៃចន្ទ នៅពេលបិទបញ្ចប់ដំណើរទស្សនកិច្ច និងមុនពេលធ្វើដំណើរត្រឡប់ទៅកាន់ប្រទេសភូមាវិញ លោកស្រីអ៊ុង សានស៊ូជី បានថ្លែងប្រាប់អ្នកសារព័ត៌មានថា ប្រជាជនភូមាជាច្រើនចង់យកគំរូតាមសិង្ហបុរី នៅក្នុងការធ្វើកំណែទម្រង់នៅភូមា។
ជាការពិតថា ជោគជ័យរបស់សិង្ហបុរី ក្នុងការអភិវឌ្ឍសេដ្ឋកិច្ច ការពង្រឹងគុណភាពនៃវិស័យអប់រំ និងការប្រយុទ្ធប្រឆាំងនឹងអំពើពុករលួយ គឺជារឿងពិតមិនអាចប្រកែកបាន។ ក្នុងរយៈពេលតែប្រមាណជា ៥០ឆ្នាំ ចាប់ពីបានទទួលឯករាជ្យពីម៉ាឡេស៊ី នៅឆ្នាំ១៩៦៥ សិង្ហបុរី បានប្រែក្លាយប្រទេសរបស់ខ្លួន ពីប្រទេសក្រីក្រ មានសេដ្ឋកិច្ចទន់ខ្សោយ ឲ្យក្លាយទៅជាប្រទេសដែលមានសេដ្ឋកិច្ចជឿនលឿនបំផុតមួយ នៅលើពិភពលោក។ សិង្ហបុរី ដែលមានផ្ទៃដីតែជាង ៧០០គីឡូម៉ែត្រក្រឡា មានប្រជាជនតែប្រមាណជាង ៥លាននាក់ ប៉ុន្តែ មានកម្លាំងសេដ្ឋកិច្ចប្រហាក់ប្រហែលនឹងប្រទេសថៃ ឬម៉ាឡេស៊ី។ បើនិយាយពីប្រាក់ចំណូលមធ្យមប្រចាំឆ្នាំរបស់ប្រជាជនវិញ សិង្ហបុរី ស្ថិតនៅលំដាប់ទី៣ បន្ទាប់ពីកាតារ និងលុចសំបួរ។
ខាងវិស័យជំនួញ និងការដឹកជញ្ជូនផ្លូវសមុទ្រ កំពង់ផែអន្តរជាតិសិង្ហបុរី គឺជាកំពង់ផែអន្តរជាតិលំដាប់ទី៣ នៅលើពិភពលោក។ ចំណែកខាងវិស័យអប់រំវិញ សកលវិទ្យាល័យជាតិសិង្ហបុរី គឺជាសកលវិទ្យាល័យដែលមានគុណភាពកម្រិតអន្តរជាតិ ហើយត្រូវបានគេចាត់ទុកក្នុងចំណោមសកលវិទ្យាល័យដែលមានកម្រិតអប់រំខ្ពស់បំផុតនៅអាស៊ី។
គឺជោគជ័យខាងការអភិវឌ្ឍសេដ្ឋកិច្ច ខាងការពង្រឹងវិស័យអប់រំ ព្រមទាំងការប្រយុទ្ធប្រឆាំងនឹងអំពើពុករលួយនេះហើយ ដែលលោកស្រីអ៊ុង សានស៊ូជី សំឡឹងឃើញចង់យកជាគំរូ នៅក្នុងការធ្វើកំណែទម្រង់ ដែលភូមាបាន និងកំពុងតែធ្វើ នៅក្រោយការបិទបញ្ចប់ការដឹកនាំតាមបែបរបបផ្តាច់ការយោធា មកជាការដឹកនាំតាមបែបស៊ីវិលវិញ។
សិង្ហបុរី ក្រៅពីជាប្រទេសដែលមានបទពិសោធន៍ និងជោគជ័យ ដែលអាចឲ្យភូមាយកគំរូតាម ក៏ជាប្រទេសដែលមានទំនាក់ទំនងយ៉ាងល្អប្រសើរមួយដែរជាមួយភូមា។ សិង្ហបុរីគឺជាប្រទេសដ៏កម្រ ដែលបានរក្សាទំនាក់ទំនងល្អជាមួយភូមា តាំងពីពេលនៅក្នុងសម័យរបបសឹក។ ចាប់តាំងពីឆ្នាំ២០០១មក ភូមាបានផ្តល់នូវការហ្វឹកហ្វឺន ទាំងខាងភាសាអង់គ្លេស ខាងផ្នែកជំនួញ ហិរញ្ញវត្ថុ និងព័ត៌មានវិទ្យាដល់មន្រ្តីរដ្ឋការភូមា។
ចាប់តាំងពីភូមាត្រូវបានសហគមន៍អន្តរជាតិបន្ធូរបន្ថយទណ្ឌកម្ម គេក៏ឃើញមានក្រុមហ៊ុនសិង្ហបុរីមិនតិចដែរ ដែលបាននាំគ្នាសម្រុកចូលទៅដាក់ទុនវិនិយោគនៅភូមា។ កាលពីឆ្នាំ២០១២កន្លងទៅ ការដោះដូរពាណិជ្ជកម្ម រវាងភូមា និងសិង្ហបុរីបានកើនឡើងរហូតដល់ទៅជាង ១ពាន់ ៤រយលានដុល្លារ ហើយសិង្ហបុរី គឺជាដៃគូពាណិជ្ជកម្មធំទី៣ របស់ភូមា។
កាលពីខែឧសភាកន្លងទៅនេះ សមាជិកសភាភូមាមួយក្រុម មានគ្នា ២៥នាក់ បានធ្វើដំណើរទៅកាន់ប្រទេសសិង្ហបុរី ដើម្បីសិក្សាយកគំរូពីសិង្ហបុរី ខាងផ្នែកអភិបាលកិច្ច ជាពិសេស ការប្រយុទ្ធប្រឆាំងនឹងអំពើពុករលួយ ក្នុងរដ្ឋបាលសាធារណៈ។ ភាពស្អាតស្អំ ក្នុងរដ្ឋបាលសាធារណៈ ដែលត្រូវបានលោកស្រីអ៊ុង សានស៊ូជី លើកសរសើរខ្លាំងដែរ ក្នុងដំណើរទស្សនកិច្ច កាលពីចុងសប្តាហ៍មុននេះ។
ក៏ប៉ុន្តែ នៅពេលដែលជើងឯកខាងប្រជាធិបតេយ្យ និងជាជ័យលាភីណូបែលសន្តិភាពពិភពលោកលើកសរសើរ និងប្រកាសចង់យកគំរូតាមសិង្ហបុរីបែបនេះ គេក៏មិនគួរភ្លេចដែរថា ក្នុងពេលដែលសិង្ហបុរីជាគំរូល្អមួយខាងការអភិវឌ្ឍសេដ្ឋកិច្ច ខាងវិស័យអប់រំ ឬខាងប្រយុទ្ធប្រឆាំងនឹងអំពើពុករលួយ ក៏ប៉ុន្តែ មិនមែនជាគំរូល្អប៉ុន្មានទេខាងលទ្ធិប្រជាធិបតេយ្យ និងសិទ្ធិសេរីភាព ជាពិសេស សិទ្ធិសេរីភាពខាងការបញ្ចេញមតិ។ ចាប់តាំងពីទទួលបានឯករាជ្យ រហូតមកទល់នឹងសព្វថ្ងៃនេះ អំណាចនៅសិង្ហបុរីស្ថិតក្នុងដៃគណបក្សតែមួយ គឺគណបក្ស People’s Action Party ដែលបង្កើតឡើងដោយលោកលី ក្វាន់យូ។ នៅឆ្នាំ២០១៣នេះ សិង្ហបុរីត្រូវបានអង្គការអ្នកសារព័ត៌មានគ្មានព្រំដែនចាត់ចំណាត់ថ្នាក់យ៉ាងទាប គឺលេខ ១៤៩ ខាងសិទ្ធិសេរីភាពខាងការបញ្ចេញមតិ ពោលគឺ ចំណាត់ថ្នាក់ប្រហែលប្រហែលនឹងប្រទេសភូមា ដែលទើបនឹងងើបចេញពីរបបយោធាផ្តាច់ការ។
ប៉ុន្តែ ទោះជាយ៉ាងណា សិង្ហបុរីនៅតែត្រូវបានសហគមន៍អន្តរជាតិទទួលស្គាល់ និងលើកសរសើរថា ជាប្រទេសនីតិរដ្ឋ ដែលគ្រប់គ្នាគោរពច្បាប់ ហើយទាំងមេដឹកនាំរដ្ឋាភិបាល និងមន្រ្តីរដ្ឋបាលសាធារណៈ ជាទូទៅ ជាអ្នកធ្វើការដោយគិតគូរដល់ផលប្រយោជន៍រួមច្រើនជាងប្រយោជន៍ផ្ទាល់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ