សាច់ជ្រូកនៅចិនឡើងថ្លៃផងនិងត្រូវបង្កើនការនាំចូលផង ដោយសារជំងឺប៉េស្តជ្រូកអាហ្វ្រិក
នៅប្រទេសចិន។ ការកម្ទេចសត្វជ្រូកដោយសារជំងឺប៉េស្តជ្រូកអាហ្វ្រិក បានបង្ខំឲ្យតម្លៃសាច់ជ្រូកនៅក្នុងប្រទេសនេះ ឡើងថ្លៃយ៉ាងគំហុក។ ការផ្គត់ផ្គង់ក៏មិនគ្រប់គ្រាន់។ ចិនបានបង្កើនការនាំចូលសាច់ជ្រូកពីបរទេស ដើម្បីបំពេញតម្រូវការក្នុងស្រុក។ អ្នកជំនាញផ្នែកវិទ្យាស្ថានសាច់ជ្រូករបស់បារាំង បានព្រមានថា ស្ថានការណ៍នៅប្រទេសចិន អាចនឹងវិវត្តកាន់តែអាក្រក់ជាងនេះទៅទៀត ក្នុងអំឡុងពេលកន្លះឆ្នាំទៅមុខ។
ចុះផ្សាយនៅថ្ងៃ៖
បើតាមរបាយការណ៍ អាជ្ញាធរចិនបានកម្ទេចសត្វជ្រូកជាងមួយលានក្បាលហើយ ចាប់តាំងពីខែសីហាឆ្នាំមុន ពោលគឺនៅពេលជំងឺប៉េស្តជ្រូកឆ្លងរាតត្បាតចូលដល់ប្រទេសចិន។ យ៉ាងណាក៏ដោយ តួលេខជាក់ស្ដែងនៃចំនួនសត្វជ្រូកដែលឆ្លងជំងឺប៉េស្តជ្រូកអាហ្វ្រិក ត្រូវគេជឿថា មានច្រើនលើសនេះឆ្ងាយណាស់។
នៅក្នុងរយៈពេល៦ខែចុងក្រោយនេះ ចំនួនសត្វជ្រូកចិញ្ចឹមរបស់ចិន ថយចុះពីជិត៣៥០លានក្បាល មកនៅត្រឹមប្រមាណ២៩០លានក្បាលប៉ុណ្ណោះ។ ចំនួនសត្វជ្រូកថយចុះ ប៉ុន្តែតម្លៃកើនឡើងយ៉ាងខ្លាំង។ គ្រាន់តែនៅក្នុងខែមិថុនាកន្លងទៅថ្មីៗនេះ តម្លៃសាច់ជ្រូកនៅប្រទេសចិន កើនឡើងគុណនឹង៥។
អ្នកជំនាញនៃវិទ្យាស្ថានសាច់ជ្រូកនៅប្រទេសបារាំង លោក Jan-Peter Van Ferneij បានព្រមានថា ស្ថានការណ៍នៅប្រទេសចិន អាចនឹងវិវត្តកាន់តែអាក្រក់ជាងនេះទៅទៀត ក្នុងអំឡុងពេលកន្លះឆ្នាំទៅមុខ។ កន្លះឆ្នាំទៅមុខ ដែលតម្លៃសាច់ជ្រូក អាចហក់ឡើងខ្ពស់ជាងនេះ រហូតដល់ទៅជាង៤០ភាគរយ។ អ្នកជំនាញរូបនេះ ពន្យល់បន្តថា ឥឡូវនេះ អ្វីដែលធ្លាក់ចុះ គឺចំនួនសត្វជ្រូកចិញ្ចឹម។ បន្ទាប់មក គឺការផលិតសាច់ជ្រូក។ និងថា នៅទីបំផុត អ្វីដែលអាក្រក់នោះ គឺការបរិភោគធ្លាក់ចុះ ដែលអាចប៉ះពាល់ដល់សេដ្ឋកិច្ច។ នេះបើតាមលោក Jan-Peter Van Ferneij។
សូមជម្រាបថា ដើម្បីបំពេញតម្រូវការក្នុងស្រុក ចិនដែលជាប្រទេសទទួលទានសាច់ជ្រូកច្រើនជាងគេលើលោក បានសម្រេចបង្កើនការនាំចូលសាច់ជ្រូកពីបរទេស។ នៅក្នុងរយៈពេល៤ខែដើមឆ្នាំ២០១៩នេះ ការនាំចូលសាច់ជ្រូកពីសហភាពអឺរ៉ុបទៅកាន់ប្រទេសចិន បានកើនឡើងចំនួន៣៧ភាគរយ។ ក្រៅពីអឺរ៉ុប ប្រទេសប្រេស៊ីល ក៏បានក្លាយជាប្រភពនាំចូលសាច់ជ្រូកដ៏សំខាន់មួយរបស់ចិនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ