សង្រ្គាមស៊ីរីកំពុងឈានចូលដល់ដំណាក់កាលដ៏គ្រោះថ្នាក់
ចុះផ្សាយនៅថ្ងៃ៖
អស់រយៈពេលប៉ុន្មានឆ្នាំមកហើយ ដែលសង្រ្គាមស៊ីរីបានក្លាយជាសមរភូមិនៃការប្រឈមមុខដាក់គ្នាដោយប្រយោល រវាងរុស្ស៊ី និងសហរដ្ឋអាមេរិក។ នៅក្នុងពេលបច្ចុប្បន្ននេះ ការប្រឈមមុខដាក់គ្នារវាងមហាអំណាចទាំងពីរបានកើនឡើងកាន់តែខ្លាំង ក្រោយពីអាមេរិកបានបាញ់ទម្លាក់យន្តហោះចម្បាំងស៊ីរី និងដ្រូនអ៊ីរ៉ង់ បង្កឲ្យរុស្ស៊ីផ្ទុះកំហឹង ហើយប្រកាសចាត់ទុកយន្តហោះចម្បាំងទាំងអស់របស់អាមេរិក និងសម្ព័ន្ធមិត្ត ដែលហោះក្នុងដែនអាកាសរបស់ស៊ីរីថាជាការគំរាមកំហែង និងជាចំណុចស៊ីប។ ការរាលដាលនៃជម្លោះនេះកំពុងតែធ្វើឲ្យសង្រ្គាមស៊ីរីត្រូវធ្លាក់ចូលទៅក្នុងដំណាក់កាលមួយដ៏សែនគ្រោះថ្នាក់។
តាមការពិត សង្រ្គាមស៊ីរីគឺជាទីលាននៃការប្រឈមមុខដាក់គ្នាប្រកបដោយគ្រោះថ្នាក់ តាំងពីយូរណាស់មកហើយ ដោយសារតែវាជាសង្រ្គាមដែលមានតួអង្គពាក់ព័ន្ធច្រើនប្រទាក់ក្រឡាគ្នាដ៏សែនស្មុគស្មាញ។
នៅក្នុងនោះគេសង្កេតឃើញមានម្ខាង រុស្ស៊ី និងអ៊ីរ៉ង់ ដែលគាំទ្រលោកបាស្ហា អាល់អាសាដ ចំណែកឯសហរដ្ឋអាមេរិក និងប្រទេសសម្ព័ន្ធមិត្តលោកខាងលិច ព្រមទាំងប្រទេសអារ៉ាប់មួយចំនួន គាំទ្រក្រុមឧទ្ទាម។ ក៏ប៉ុន្តែ នៅក្នុងក្រុមឧទ្ទាមស៊ីរីនេះទៀតសោត ក៏មានបែងចែកជាក្រុមផ្សេងៗគ្នាច្រើន ដែលបង្កើតឲ្យមានការប្រឈមមុខដាក់គ្នា រវាងប្រទេសសម្ព័ន្ធមិត្តអាមេរិកគ្នាឯង ជាពិសេស គឺរវាងតួកគី និងអាមេរិក ដោយសារតែអាមេរិកបានផ្តល់គ្រឿងសព្វាវុធទៅឲ្យក្រុមឧទ្ទាមគួឌីស្ថានស៊ីរី តែតួកគីចាត់ទុកក្រុមឧទ្ទាមគួឌីស្ថាននេះថាជាក្រុមភេរវជន។ ចំណែកឯអារ៉ាប៊ីសាអ៊ូឌីត និងកាតា ដែលសុទ្ធសឹងតែជាសម្ព័ន្ធមិត្តរបស់អាមេរិក ក៏កំពុងតែឈ្លោះគ្នាខ្លាំង ដោយសារតែទំនាក់ទំនងជាមួយនឹងអ៊ីរ៉ង់។
បូកបន្ថែមពីលើនេះទៅទៀត គឺមានក្រុមជីហាតរដ្ឋអ៊ីស្លាម ដែលគ្រប់គ្នាសុទ្ធតែប្រកាសយកជាគូសត្រូវដែលត្រូវកម្ចាត់ ក៏ប៉ុន្តែ ម្ខាងៗផ្តល់អាទិភាពខុសគ្នា។ ទោះជាយ៉ាងណា គេសង្កេតឃើញថា កន្លងមក ការកំណត់យកក្រុមជីហាតរដ្ឋអ៊ីស្លាមជាសត្រូវរួមនេះហើយ ដែលបើទោះបីជាមានអាទិភាពខុសគ្នា តែបានជំរុញឲ្យរុស្ស៊ី និងសហរដ្ឋអាមេរិកសហការគ្នាខ្លះ នៅក្នុងប្រតិបត្តិការក្នុងទឹកដីស៊ីរី។
ប៉ុន្តែ អ្វីៗត្រូវប្រែប្រួលនៅក្នុងរយៈពេលប៉ុន្មានថ្ងៃចុងក្រោយនេះ ដោយប្រទេសនីមួយៗបាននាំគ្នាបង្កើនប្រតិបត្តិការយោធានៅស៊ីរី ដោយមិនញញើតនឹងប្រឈមមុខនឹងការប៉ះទង្គិចគ្នា។ កាលពីថ្ងៃអាទិត្យ អាមេរិកបានបាញ់ទម្លាក់យន្តហោះស៊ីរី នៅក្បែរទីក្រុងរ៉ាខា ដែលជាមូលដ្ឋានធំរបស់ក្រុមជីហាតរដ្ឋអ៊ីស្លាមនៅស៊ីរី (នៅប៉ែកខាងជើងស៊ីរី)។ នៅថ្ងៃជាមួយគ្នានោះ អ៊ីរ៉ង់បានប្រើមីស៊ីលរយៈចម្ងាយមធ្យមបាញ់ទៅលើទីតាំងមួយទៀតរបស់ក្រុមជីហាតរដ្ឋអ៊ីស្លាម នៅប៉ែកខាងកើតប្រទេសស៊ីរី។ ពីរថ្ងៃក្រោយមកទៀត គឺនៅថ្ងៃអង្គារ អាមេរិកបានបាញ់ទម្លាក់ដ្រូនរបស់អ៊ីរ៉ង់ នៅប៉ែកខាងត្បូងប្រទេសស៊ីរី។
អាមេរិកបានធ្វើការពន្យល់ថា ការណ៍ដែលខ្លួនបាញ់ទម្លាក់យន្តហោះចម្បាំងរបស់រដ្ឋាភិបាលស៊ីរី និងដ្រូនរបស់អ៊ីរ៉ង់ គឺដោយសារតែយន្តហោះចម្បាំង និងដ្រូននេះធ្វើសកម្មភាពដែលបង្កនូវការគំរាមកំហែងដល់កងកម្លាំងដែលជាសម្ព័ន្ធមិត្តអាមេរិក។ ក៏ប៉ុន្តែ រុស្ស៊ីវិញបានហៅសកម្មភាពរបស់អាមេរិកថាជាការឈ្លានពានទៅលើស៊ីរីដែលជារដ្ឋអធិបតេយ្យ។ រុស្ស៊ីក៏បានប្រកាសផងដែរថានឹងផ្តាច់រាល់ការទាក់ទងជាមួយកងកម្លាំងអាមេរិកនៅស៊ីរី ហើយថា រាល់យន្តហោះចម្បាំងរបស់អាមេរិក និងសម្ព័ន្ធមិត្ត ដែលហោះហើរនៅក្នុងដែនអាកាសស៊ីរី ចាប់ពីទន្លេអឺហ្វ្រាតទៅទិសខាងលិច នឹងត្រូវចាត់ទុកជាចំណុចស៊ីប។
បើគេសង្កេតមើលជារួមទៅ គេឃើញថា ការប្រឈមមុខដាក់គ្នានៅស៊ីរី នៅពេលនេះ គឺកើតឡើងនៅជុំវិញតំបន់ ដែលជាទីតាំងរបស់ក្រុមជីហាតរដ្ឋអ៊ីស្លាម ហើយវាកើតឡើង នៅក្នុងពេលដែលក្រុមជីហាតរដ្ឋអ៊ីស្លាមនេះកំពុងតែធ្លាក់ចុះទន់ខ្សោយ។ នៅពេលនេះ ប្រទេសនីមួយៗនាំគ្នាផ្តោតកម្លាំងសម្រុកចូលមកកន្លែងតែមួយ តែមិនមែនចូលមកក្នុងគោលដៅរួមដៃគ្នាកម្ចាត់ក្រុមជីហាតរដ្ឋអ៊ីស្លាមនោះទេ គឺដើម្បីប្រជែងគ្នាកាន់កាប់ចំណែកដែនដី ដែលវាយយកបានពីក្រុមជីហាត។
គេមិនត្រូវភ្លេចទេថា សង្រ្គាមនៅស៊ីរីនៅពេលនេះ គឺមានទាំងសង្រ្គាមប្រឆាំងនឹងក្រុមជីហាតរដ្ឋអ៊ីស្លាម និងសង្រ្គាមស៊ីវិល រវាងរដ្ឋាភិបាល និងក្រុមឧទ្ទាម។ នៅក្នុងពេលបច្ចុប្បន្ននេះ អាមេរិកនិងសម្ព័ន្ធមិត្តកំពុងផ្តោតអាទិភាពខ្ពស់ ទៅលើការប្រយុទ្ធប្រឆាំងនឹងក្រុមជីហាត ក៏ប៉ុន្តែ នៅក្រោយពេលដែលក្រុមជីហាតត្រូវគេកម្ចាត់ចេញពីស៊ីរី អាទិភាពអាចនឹងត្រូវបង្វែរទៅខាងកងកម្លាំងរបស់លោកបាស្ហាអាល់អាសាដវិញម្តង។
ដូច្នេះ សម្រាប់រុស្ស៊ីនិងអ៊ីរ៉ង់ ដែលគាំទ្ររដ្ឋាភិបាលរបស់លោកអាសាដ ក៏ដូចជាអាមេរិកដែលគាំទ្រក្រុមឧទ្ទាម ការពង្រីកដែនដីដែលខ្លួនកាន់កាប់ វាគឺជាយុទ្ធសាស្រ្តដ៏សំខាន់មួយ ដើម្បីយកប្រៀបលើគូសត្រូវនៅក្នុងសង្រ្គាមស៊ីវិល ហើយកាន់តែសំខាន់ជាងនេះទៅទៀត តំបន់ដែលស្ថិតក្រោមការកាន់កាប់របស់ក្រុមជីហាតរដ្ឋអ៊ីស្លាមនៅក្នុងពេលបច្ចុប្បន្ននេះ ក៏ជាតំបន់យុទ្ធសាស្រ្តដ៏សំខាន់ផងដែរ ពីព្រោះវាជាតំបន់ដែលសម្បូរប្រេង។
នៅក្នុងបរិបទនៃការប្រជែងខាងយុទ្ធសាស្រ្តសង្រ្គាមនេះហើយ ដែលប្រទេសជាគូប្រជែងត្រូវប្រឈមមុខដាក់គ្នាខ្លាំង ដោយពិបាកនឹងចៀសរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ