ស៊ីរី៖ការវាយប្រហាររបស់ទ័ពអាកាសអ៊ីស្រាអែលលើដែនដីស៊ីរី គឺជាបទឧក្រិដ្ឋ
នៅថ្ងៃអាទិត្យ ទី៧ ធ្នូ កងទ័ពអ៊ីស្រាអែលបានបើកការវាយប្រហារផ្លូវអាកាសលើប្រទេសស៊ីរី ដោយធ្វើការទម្លាក់គ្រាប់បែកចំនួន ២គ្រាប់លើតំបន់ក្បែរទីក្រុងដាម៉ាស់។ ប្រភពស៊ីរីបានបញ្ជាក់ថា ការវាយប្រហារនោះមិនបានបណ្តាលឲ្យបាត់បង់ជីវិតមនុស្សទេ តែបានបំផ្លាញទ្រព្យសម្បត្តិយ៉ាងដំណំ។ រដ្ឋាភិបាលស៊ីរីបានបញ្ចេញប្រតិកម្មខ្លំាងៗដោយបានចាត់ទុកទង្វើអ៊ីស្រាអែលថា ជាឧក្រិដ្ឋកម្មប្រឆំាងនឹងអធិបតេយ្យរបស់សស៊ីរី និងថា ជាទង្វើមួយជួយគំាទ្រក្រុមឧទ្ទាម និងក្រុមជីហាតនៅក្នុងប្រទេសស៊ីរី។
ចុះផ្សាយនៅថ្ងៃ៖
ស្តាប់ - ០១:៥៦
យោងតាមសេចក្តីជូនដំណឹងរបស់កងទ័ពស៊ីរីដែលផ្សព្វផ្សាយតាមទូរទស្សន៍ក្នុងស្រុកឲ្យដឹងថា ទ័ពអាកាសអ៊ីស្រាអែលបានទម្លាក់គ្រាប់បែកលើតំបន់សន្តិសុខចំនួន ២កន្លែងក្បែរទីក្រុងដាម៉ាស គឺតំបន់ឌីម៉ាស និងតំបន់អាកាសយានដ្ឋានអន្តរជាតិទីក្រុងដាម៉ាសនារសៀលថ្ងៃអាទិត្យ ទី៧ ធ្នូ។ កម្មវត្ថុរបស់ទ័ពអាកាសអ៊ីស្រាអែល គឺសំដៅកម្ទេចឃ្លំាស្តុកអាវុធរបស់ទាហានស៊ីរីនៅក្បែរអាកាសយានដ្ឋាន និងទីតំាងទាហានស៊ីរីនៅតំបន់ឌីម៉ាស។ ស្នូរសំឡេងផ្ទុះ លាយឡំនឹងផ្សែងខ្មួលខ្មាញ់ត្រូវបានគេឃើញតាមរយៈទូរទស្សន៍របស់ចលនា Hezbollah លីបង់។ បើយោងតាមក្រុមអ្នកសង្កេតការណ៍សិទ្ធិមនុស្សនៅស៊ីរីឲ្យដឹងថា គេបានឮស្នូរសំឡេងផ្ទុះមិនតិចជាង ១០ដង ទេនៅក្បែរទីក្រុងដាម៉ាស។ យ៉ាងណាក៏ដោយ ប្រភពយោធាស៊ីរីបានបញ្ជាក់ថា ការវាយប្រហារនោះមិនបានបណ្តាលឲ្យបាត់បង់ជីវិតមនុស្សទេ តែបានបំផ្លាញទ្រព្យសម្បតិ្ត ក៏ដូចជាហេដ្ឋារចនាសម្ព័ន្ធជាច្រើនកន្លែង។
នៅយប់ថ្ងៃអាទិត្យ ទី៧ ធ្នូ ក្រសួងការបរទេសស៊ីរីបានបញ្ជាក់ថា រដ្ឋាភិបាលស៊ីរីបានធ្វើសំណើទៅកាន់លោកអគ្គលេខាធិការអង្គការសហប្រជាជាតិបាន គីមូន និងក្រុមប្រឹក្សាសន្តិសុខឲ្យដាក់ទ័ណ្ឌកម្មប្រឆំាងអ៊ីស្រាអែល។ ទន្ទឹមគ្នានេះ ក្រសួងការបរទេសស៊ីរីថែមទំាងបានចាត់ទុកទង្វើរបស់អ៊ីស្រាអែលថា ជាបទឧក្រិដ្ឋកម្មប្រឆំាងនឹងអធិបតេយ្យរបស់ប្រទេសស៊ីរី។ ចំណែកស្ថាប័នកងទ័ពស៊ីរីបានបន្ថែមថា ការដែលអ៊ីស្រាអែលបានវាយប្រហារលើកម្លំាងរដ្ឋាភិបាលស៊ីរីពេលនេះ ជាភស្តុតាងមួយដែលបញ្ជាក់ពីការគំាទ្ររបស់អ៊ីស្រាអែលចំពោះក្រុមឧទ្ទាម ក៏ដូចជាក្រុមជីហាតនៅស៊ីរី។
នៅខាងអ៊ីស្រាអែលឯណោះវិញ មកដល់ពេលនេះ ទីក្រុងហ៊្សេរុយសាឡិមនៅមិនទាន់បានបញ្ចេញប្រតិកម្មផ្លូវការណាមួយនៅឡើយទេ។ នេះមិនមានអ្វីគួរឲ្យភ្ញាក់ផ្អើលឡើយ ព្រោះវាជាទម្លាប់សព្វមួយរបស់អ៊ីស្រាអែលដែលព្យាយាមមិននិយាយអ្វីទំាងអស់។ បើយោងតាមប្រភពព័ត៌មានបរទេស តំាងពីថ្ងៃផ្ទុះវិបត្តិស៊ីរីមក ទ័ពអាកាសអ៊ីស្រាអែលបានវាយប្រហារជាច្រើនដងលើទីតំាងយោធារបស់ស៊ីរីក្នុងទឹកដីស៊ីរី តែអ៊ីស្រាអែលបន្តបិទមាត់ជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ