រដ្ឋាភិបាលនឹងសិក្សាលម្អិតពីផលប៉ះពាល់គម្រោងវារីអគ្គិសនីជាយអារ៉ែង
ក្រសួងរ៉ែនិងថាមពល នៅល្ងាចថ្ងៃសៅរ៍ម្សិលមិញ បានចេញលិខិតបំភ្លឺមួយអំពីគម្រោងអភិវឌ្ឍទំនប់វារីអគ្គិសនីជាយអារ៉ែងក្នុងខេត្តកោះកុង។ ជាការបំភ្លឺតបទៅនឹង លិខិតរបស់លោកស្រី តែ ច័ន្ទមនី ប្រធានទីស្តី គណៈកម្មការទី៣ នៃរដ្ឋសភា។ ក្នុងលិខិតនោះ ក្រសួងរ៉ែនិងថាមពល បានបំភ្លឺថា ពិតមែនតែគម្រោងវារីអគ្គិសនី ជាយអារ៉ែង មានអានុភាពដំឡើងត្រឹម១០៨មេហ្គាវ៉ាត់ ប៉ុន្តែវាអាចដំណើរការស្ទើរពេញមួយឆ្នាំ និងផ្តល់ថាមពលច្រើនជាងវារីអគ្គិសនីកំចាយ។
ចុះផ្សាយនៅថ្ងៃ៖
ស្តាប់ - ០២:១៨
លិខិតឆ្លើយបំភ្លឺ ចុះថ្ងៃទី២៧កញ្ញា ក្រសួងរ៉ែនិងថាមពល បានបញ្ជាក់ថា គម្រោងសាងសង់វារីអគ្គិសនីជាយអារ៉ែង មានតាំងពីឆ្នាំ១៩៧០មកម្ល៉េះ ហើយ រដ្ឋាភិបាលបច្ចុប្បន្ន គ្រាន់តែសិក្សាបន្តតែប៉ុណ្ណោះ។
ក្រសួងរ៉ែនិងថាមពល បង្ហាញថា គម្រោងអភិវឌ្ឍន៍វារីអគ្គិសនីជាយអារ៉ែង មានអានុភាព១០៨មេហ្គាវ៉ាត់ ប៉ុន្តែវារីអគ្គិសនីនេះ អាចដំណើរការស្ទើរពេញមួយឆ្នាំ ដែលបរិមាណថាមពលផលិតប្រចាំឆ្នាំ មានរហូតដល់៥៩៥លានគីឡូវ៉ាត់ម៉ោង។ គម្រោងនេះ អាចផ្តល់ថាមពលច្រើនជាងវារីអគ្គិសនីកំចាយ ដែលផលិតបានតែ៤៩៨លានគីឡូវ៉ាត់ម៉ោង តែប៉ុណ្ណោះ។
បើតាមលិខិតនោះ គម្រោងអភិវឌ្ឍន៍វារីអគ្គិសនីជាយអារ៉ែង គឺកំពុងស្ថិតនៅក្នុងដំណាក់កាលសិក្សានៅឡើយទេ។ ក្រសួងរ៉ែនិងថាមពល ក៏បានបង្ហាញលទ្ធផលនៃការសិក្សាពីផលប៉ះពាល់បរិស្ថាននិងសង្គម ជំហានដំបូង ដោយបញ្ជាក់ថា ចំពោះផ្ទៃដីនិងព្រៃឈើជាង១០ម៉ឺនហិកតានៅតំបន់ជាយអារ៉ែង ផ្ទៃដីដែលប្រើសម្រាប់អាងទឹករបស់គម្រោងវារីអគ្គិសនី គឺប្រមាណជិត១ម៉ឺនហិកតាតែប៉ុណ្ណោះ ហើយក្រៅពីប្រើប្រាស់ គឺត្រូវអភិរក្ស ថែទាំ និងដាំឈើឡើងវិញ ដើម្បីរក្សានិរន្តរភាពនៃសក្កានុពលទឹកភ្លៀងនិងប្រព័ន្ធអេកូឡូស៊ី។
ចំណែកការប៉ះពាល់ដល់សព្វព្រៃនិងមច្ឆជាតិវិញ ក្រសួងរ៉ែនិងថាមពល បានរកឃើញនៅ ក្នុងការសិក្សាជំហានដំបូង ថា មានបក្សី១១៣ប្រភេទ ថនិកសត្វ៥៣ប្រភេទ ល្មូន៣១ប្រភេទ និងមច្ឆជាតិ៤៣ប្រភេទ។ ក្រសួងក៏បានបញ្ជាក់ថានឹងសិក្សាលម្អិតនៅជំហានបន្ទាប់ទៀត ដើម្បីរកវិធីអភិរក្សនិងកាត់បន្ថយផលប៉ះពាល់ ឲ្យនៅតិចតួចបំផុត ហើយថា អ្នកសិក្សាជំហានបន្ទាប់ទាំងនោះ កំពុងព្យាយាមចូលទៅសិក្សាលម្អិតនៅតំបន់អារ៉ែង។
លោក អាឡិច ហ្គនសាឡេ ឌេវីដសុន (Alex Gonzalez-Davidson) ប្រធានអង្គការចលនាមាតាធម្មជាតិ ដែលជាអង្គការការពារធម្មជាតិមួយ ទាមទារឲ្យបញ្ឈប់គម្រោងសាងសង់ទំនប់វារីអគ្គីសនីនៅតំបន់អារ៉ែង បានសម្តែងការស្វាគមន៍ចំពោះការឆ្លើយបំភ្លឺជាផ្លូវការរបស់ក្រសួងរ៉ែនិងថាមពល។ លោក អាឡិច បានប្រាប់វិទ្យុបារាំងអន្តរជាតិ ថា នេះជាលើកទីមួយហើយ ដែលក្រសួងចេញមុខបកស្រាយពាក់ព័ន្ធរឿងតំបន់អារ៉ែង ហើយថា លិខិតបំភ្លឺនេះ គឺជាអាវុធមួយ សម្រាប់លោកតស៊ូជាមួយក្រុមហ៊ុនចិន ស៊ីណូហាដ្រូ (Shynohydro)។ ទោះយ៉ាងណាក៏ដោយ ប្រធានអង្គការចលនាមាតាធម្មជាតិរូបនេះ ចង់ឲ្យរដ្ឋាភិបាលពិគ្រោះយោបល់ជាមួយសហគមន៍ និងសង្គមស៊ីវិល ដើម្បីកាត់បន្ថយហានិភ័យ នៅតំបន់អារ៉ែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ