ប៉ូលិសយុត្តិធម៌ត្រូវបានបំពាក់បំប៉នពីស្តង់ដាប្រើប្រាស់កម្លាំង និងសិទ្ធិបន្ទាប់ពីការចាប់ខ្លួន
ការិយាល័យឧត្តមស្នងការសិទ្ធិមនុស្សអង្គការសហប្រជាជាតិប្រចាំនៅកម្ពុជា និងក្រសួងមហាផ្ទៃនៅថ្ងៃទី២៩ សីហានេះ បានរៀបចំសិក្ខាសាលារយៈពេញមួយថ្ងៃនៅសណ្ឋាគារសាន់វ៉េ ដល់មន្ត្រីនគរបាលយុត្តិធម៌នៅទូទាំងប្រទេស ឱ្យស្គាល់ពីសិទ្ធិរបស់បុគ្គលក្រោយការចាប់ខ្លួន និងស្តង់ដានៃការប្រើប្រាស់កម្លាំងរបស់ប៉ូលិសយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
សិទ្ធិនានាបន្ទាប់ពីការចាប់ខ្លួន ឬឃាត់ខ្លួន និងការប្រើប្រាស់កម្លាំងដោយមន្ត្រីនគរបាលយុត្តិធម៌គឺជារបៀបវារៈសំខាន់ចំនួន២នៅក្នុងសិក្ខាសាលារយៈពេញមួយថ្ងៃនេះ។ ថ្លែងទៅកាន់សិក្ខាកាមដែលសុទ្ធតែជាមន្ត្រីនគរបាលយុត្តិធម៌ទូទាំងប្រទេសប្រមាណជា៨០នាក់ លោកស្រី វ៉ាន់ហ៊ី លី (Wan-Hea Lee) តំណាងការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាបានថ្លែងថា សិទ្ធិរបស់បុគ្គលរងគ្រោះ និងជនល្មើសក្រោយការចាប់ខ្លួនក្តីគឺត្រូវបានធានាដោយច្បាប់។
ច្បាប់រដ្ឋធម្មនុញ្ញកម្ពុជា និងកតិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយ រួមទាំងអនុសញ្ញាប្រឆាំងនឹងការធ្វើទារុណកម្ម ដែលត្រូវបានដាក់បញ្ចូលជាផ្នែកមួយនៃច្បាប់កម្ពុជា និងបានចងកាតព្វកិច្ចមន្ត្រីនគរបាលយុត្តិធម៌។ សិទ្ធិទាំងនោះរួមមានសិទ្ធិដឹងពីមូលហេតុនៃការចាប់ខ្លួន សិទ្ធិទទួលមេធាវី និងសិទ្ធិរក្សាភាពស្ងៀមស្ងាត់ រួមទាំងសិទ្ធិមិនទទួលបានការធ្វើទារុណកម្មជាដើម។ លោកស្រីតំណាងអង្គការសហប្រជាជាតិវ៉ាន់ហ៊ី លី បានលើកឡើងថាភាគច្រើនអ្នកដែលត្រូវបានចាប់ខ្លួននៅមានការយល់ដឹងស្តីពីសិទ្ធិនេះតិចតួចនៅឡើយ។
ក្រៅពីនេះ សិក្ខាសាលាដែលមានការចូលរួមពីក្រសួងយុត្តិធម៌ គណៈមេធាវី បានផ្តោតលើស្តង់ដាច្បាប់អំពីការប្រើប្រាស់កម្លាំងរបស់មន្ត្រីប៉ូលិសយុត្តិធម៌។ មន្ត្រីប៉ូលិសដែលមានសិទ្ធិអំណាចក្នុងការអនុវត្តច្បាប់ក៏ប៉ុន្តែត្រូវតែភ្ជាប់ជាមួយទំនួលខុសត្រូវ។ ព្រោះថាមន្ត្រីប៉ូលិសក្នុងនាមជាស្ថាប័នជាតិ ត្រូវមានគណនេយ្យភាពចំពោះប្រជាជន។
អគ្គស្នងការរងនគរបាលជាតិ លោក កង សុខន បានលើកទឹកចិត្តជំរុញឱ្យមន្ត្រីនគបាលយុត្តិធម៌ទាំងអស់ត្រូវតែពង្រឹងសមត្ថភាព និងយល់ដឹងពីសិទ្ធិរបស់ជនដែលត្រូវបានចាប់ខ្លួន និងចំណេះដឹងស្តីពីការប្រើប្រាស់កម្លាំងអាវុធ ឱ្យបានសមស្របទៅតាមកាលៈទេស ដើម្បីធានាបាននូវយុត្តិធម៌ដល់ពលរដ្ឋ។
លោកមេធាវីសុខ សំអឿនដែលជាវាគ្មិនក្នុងសិក្ខាសាលានេះ បានលើកឡើងថា សង្គមកម្ពុជាមានបញ្ហាចំនួនពីរ គឺបញ្ហាផ្លូវច្បាប់ដែលនៅប្រទាំងប្រទើសនិងភាពខ្វែងគ្នា និងបញ្ហានៃការអនុវត្តច្បាប់។ សូមបញ្ជាក់ថា ប្រព័ន្ធច្បាប់កម្ពុជាត្រូវបានគេរិះគន់ថាមានភាពទន់ខ្សោយ និងមិនបានគោរពសិទ្ធិ និងផ្តល់យុត្តិធម៌ដល់ពលរដ្ឋនោះទេ។ ប៉ុន្តែលោកមេធាវី សុខ សំអឿន បានលើកឡើងថា មន្ត្រីយុត្តិធម៌កម្ពុជាបានប្រឹងប្រែងក្នុងការអនុវត្តរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ