លោកស្រីTheresa Mayទស្សនកិច្ចអារ៉ាប៊ីសាអូឌីត ស្វែងរកប្រយោជន៍សេដ្ឋកិច្ចអោយអង់គ្លេស
នៅថ្ងៃអង្គារនេះ នាយករដ្ឋមន្ត្រីអង់គ្លេស លោកស្រី Theresa May បានធ្វើដំណើរទៅដល់ទីក្រុងរីយ៉ាត ប្រទេសអារ៉ាប៊ី សាអូឌីត។ ទិសដៅនៃទស្សនកិច្ចនេះ គឺស្វែងរកផល ប្រយោជន៍សេដ្ឋកិច្ចអោយអង់គ្លេស ក្នុងពេលអង់គ្លេសត្រូវចាកចេញពីសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
តាមកម្មវិធីនៃទស្សនកិច្ច នៅអារ៉ាប៊ីសាអូឌីត នាយករដ្ឋមន្ត្រីអង់គ្លេស តេរេសា មៃ ជួប ព្រះមហាក្សត្រ និងព្រះរាជបុត្រស្នងរាជ បូករួមនឹងថ្នាក់ដឺកនាំអារ៉ាប៊ីសាអូឌីតផងដែរ។ នាយករដ្ឋមន្ត្រីអង់គ្លេស និងមេដឹកនាំអារ៉ាប៊ីសាអូឌីត ត្រូវពិភាក្សាពីបញ្ហាសន្តិសុខ រឺការប្រយុទ្ធប្រឆាំងភេរវកម្ម។ តែប្រធានបទចំបងនៃទស្សនកិច្ចរបស់លោកស្រីតេរេសា មៃ គឺផ្តោតទៅលើការវិនិយោគ ដើម្បីស្វែងរកប្រយោជន៍អោយអង់គ្លេស ពេលអង់គ្លេសចាកចេញពីសហភាពអឺរ៉ុប
អង់គ្លេសមិនសូវស្ងប់ចិត្តទេ ដែលបានបោះឆ្នោតដើរចេញពីអឺរ៉ុប ព្រោះអង់គ្លេសត្រូវខាតប្រយោជន៍ច្រើន។ ដូច្នេះពេលនេះ អង់គ្លេសខំស្វែងរកការវិនិយោគពីបណ្តាប្រទេសអារ៉ាប់ ដោយសន្យាការពារសន្តិសុខពួកគេ ជាថ្នូរនឹងការវិនិយោគពីប្រទេសទាំងនោះវិញ។ កាលពីចុងខែមីនាមុននេះ ប្រទេសកាតាសន្យាវិនិយោគបន្ថែម៥ ៨០០លានអឺរ៉ូ នៅអង់គ្លេស។
សម្រាប់លោកស្រីតេរេសា មៃ អារ៉ាប៊ី សាអូឌីត ជាដៃគូសំខាន់ ក្នុងការចូលរួមជំរុញសេដ្ឋកិច្ចអង់គ្លេស។ លោកស្រីមៃប្រហែលមិននិយាយពីបញ្ហាសិទ្ធិមនុស្សនៅយេម៉ែន ជាមួយក្រុងរីយ៉ាតទេ។ ២ឆ្នាំមកនេះ អារ៉ាប៊ីសាអូឌីត បានធ្វើអន្តរាគមន៍យោធា នៅយេម៉ែន។ នៅអង់គ្លេស ក្រុមអ្នកប្រឆាំងនឹងអន្តរាគមន៍យោធានេះ បូករួមក្រុមប្រឆាំងការនាំចេញអាវុធអោយអារ៉ាប៊ីសាអូឌីត បានធ្វើសកម្មភាពតវ៉ាជាខ្លាំង។ លោកចេរេមី ខប៊ីន ជាមេដឹកនាំបក្សការងារ បានទាមទារអោយអង់គ្លេសបញ្ឈប់ភ្លាមៗ នូវការនាំចេញអាវុធទៅអោយអារ៉ាប៊ី សាអូឌីត។ ២ឆ្នាំមកនេះ ការនាំចេញអាវុធទៅអោយក្រុងរីយ៉ាត បានផ្តល់ថវិកាប្រមាណ៣ពាន់៨៦០លានអោយរដ្ឋាភិបាលក្រុងឡុងដ៏។ តែអន្តរាគមន៍យោធារបស់អារ៉ាប៊ីសាអូឌីត នៅយេម៉ែនបានបង្កអោយមានជនស៊ីវិលស្លាប់សន្ធឹកសន្ធាប់។
ក្នុងស្រុកអង់គ្លេស កន្លងមក មានបាតុករប្រឆាំងអន្តរាគមន៍យោធារបស់អារ៉ាប៊ី សាអូឌីត បានគប់ពងមាន់ ទៅលើមន្ត្រីអារ៉ាប៊ីសាអូឌីត ម្នាក់ ដែលជាអ្នកនាំពាក្យក្រុមសម្ព័ន្ធអារ៉ាប់ នៅយេម៉ែន។ មុនលោកស្រីតេរេសា មៃ ទៅទស្សនកិច្ចនៅក្រុងរីយ៉ាត រដ្ឋាភិបាលអង់គ្លេសបានចេញមុខសូមទោស ចំពោះហេតុការណ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ