ឆ្នាំនេះអាចនឹងរងារខ្លាំងជាងរដូវរងារឆ្នាំកន្លងទៅ
អាកាសធាតុបានឡើងកំដៅបន្តិចឡើងវិញបន្ទាប់ពីអស់ទឹកភ្លៀងកាលពីសប្តាហ៍មុន។អវត្តមានទឹកភ្លៀងនៅដើមខែវិច្ឆិកានេះជាសញ្ញាបញ្ចប់នៃរដូវវស្សានៅប្រទេសកម្ពុជា។ហើយរដូវរងារនឹងត្រូវមកជំនួសក្នុងពេលឆាប់ៗខាងមុខ។មន្ត្រីជំនាញផ្នែកធនធានទឹកនិងឧត្តុនិយមមើលឃើញថារដូវរងារនៅឆ្នាំនេះនឹងចាប់ផ្តើមនៅពាក់កណ្តាលខែធ្នូ ហើយសីតុណ្ហភាពចុះត្រជាក់ខ្លាំងជាងឆ្នាំមុន។
ចុះផ្សាយនៅថ្ងៃ៖
ស្តាប់ - ០១:៤៦
«រដូវវស្សាបានបញ្ចប់ទាំងស្រុងហើយនៅពេលនេះ» នេះបើតាមលោក ចាន់ យុត្ថា នាយកខុទ្ទកាល័យនិងជាអ្នកនាំពាក្យក្រសួងធនធានទឹកនិងឧត្តុនិយម។ ក៏ប៉ុន្តែមិនមែនមានន័យថាអស់ភ្លៀងទាំងស្រុងទេ។ ឥទ្ធិពលមូសុងវស្សាឬមូសុងនិរតីបានបាត់ទៅហើយ ក៏ប៉ុន្តែ នៅសល់ភ្លៀងបន្តិចបន្តួចប៉ុណ្ណោះ នៅតាមតំបន់មាត់សមុទ្រ ដែលគេហៅថា Local rain។
ការបញ្ជាក់របស់មន្ត្រីជំនាញខាងឧត្តុនិយមនិងធនធានទឹកនៅពេលនេះបានធ្វើឡើងបន្ទាប់ពីទឹកភ្លៀងចុងក្រោយកាលពីពេលថ្មីៗនេះ បន្សល់ទុកនូវភាពលិចលង់ដងផ្លូវមួយចំនួនយ៉ាងចាស់ដៃដល់ប្រជាពលរដ្ឋនៅរាជធានីភ្នំពេញ។
តាមកាលវេលានៅប្រទេសកម្ពុជាបានឈានចូលរដូវរំហើយឬរដូវរងារក្នុងពេលឆាប់ៗនេះ។អ្នកនាំពាក្យក្រសួងធនធានទឹកនិងឧត្តុនិយម លោក ចាន់ យុត្ថា ឲ្យដឹងទៀតថា តាមការ ព្យាករណ៍រដូវរងារនៅឆ្នាំនេះអាចនឹងមានអាកាសធាតុត្រជាក់ជាងឆ្នាំមុនហើយរដូវរងារនឹងចាប់ផ្តើមនៅពាក់កណ្តាលខែធ្នូខាងមុខ ហើយនឹងបញ្ចប់នៅចុងខែ។
ទាក់ទងទៅនឹងកំដៅថ្ងៃដែលបានក្តៅខ្លាំងរយៈពេលប៉ុន្មានថ្ងៃកន្លងទៅនេះ ត្រូវមន្ត្រីឧត្តុនិយមពន្យល់ថាគឺដោយសារកម្ពុជាទើបតែឆ្លងផុតរដូវវស្សា។ នៅក្នុងរដូវវស្សាមូសុងនារតីឬមូសុងវស្សាមានឥទ្ធិពលខ្លាំងធ្វើឲ្យបរិយាកាសមានកំណើនខ្ពស់ និងបានបន្ថយចុះនូវសីតុណ្ហភាព។ក៏ប៉ុន្តែនៅពេលដែលមូសុងវស្សាអស់ឥទ្ធិពលទៅធ្វើឲ្យបរិយាកាសចុះទាបជាហេតុធ្វើឲ្យសីតុណ្ហភាពកើនឡើងបន្តិច។
ជាការកត់សម្គាល់ប្រទេសកម្ពុជាមិនដែលមានប្រវត្តិត្រជាក់ខ្លាំងនៅរដូវរងារ ខណៈដែលនៅតំបន់អឺរ៉ុបបានធ្លាក់ទឹកកកនៅតំណាច់ឆ្នាំចាស់នឹងដើមឆ្នាំថ្មី។ ក៏ប៉ុន្តែស្ថានភាពនៃកាធ្លាក់ភ្លៀងមិនទៀងទាត់ និងកំដៅមិនប្រក្រតីប៉ុន្មានឆ្នាំចុងក្រោយនេះត្រូវគេបន្ទោសទៅលើបំរែបំរួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ