ការលក់ឡានតូយ៉ូតានៅចិនកំពុងធ្លាក់ដាំដូង បន្ទាប់ពីផ្ទុះជម្លោះដណ្តើមកោះ
ការលក់ឡានតូយ៉ូតា និងឡានម៉ាករបស់ជប៉ុនផ្សេងទៀត នៅក្នុងទីផ្សារចិន បានធ្លាក់ដាំដូង កាលពីខែកញ្ញាកន្លងទៅនេះ ក្រោយពីផ្ទុះជម្លោះដណ្តើមកោះរវាងចិន និងជប៉ុន។ នេះបើយោងតាមទីភ្នាក់ងារសារព័ត៌មានរ៉យទ័រ។ ក្នុងពេលដែលឡានជប៉ុនលក់មិនសូវដាច់ ការលក់ឡានផ្សេងទៀត ក្រៅពីម៉ាករបស់ជប៉ុន បានកើនឡើង។
ចុះផ្សាយនៅថ្ងៃ៖
ស្តាប់ - ០២:០១
ចាប់តាំងពីផ្ទុះមានជម្លោះដណ្តើមកោះ នៅពាក់កណ្តាលខែកញ្ញាមក នៅចិន កន្លែងតាំងលក់ឡានជប៉ុនក៏លែងសូវមានមនុស្សមកមើល ហើយការលក់ដូរក៏ធ្លាក់ចុះខ្លាំង។
នៅក្នុងខែកញ្ញានេះ ការលក់ឡានតូយ៉ូតានៅចិនបានធ្លាក់ចុះប្រមាណជា ៣៥% បើប្រៀបធៀបនឹងខែសីហា មុនពេលផ្ទុះជម្លោះដណ្តើមកោះ ហើយបើធៀបនឹងខែកញ្ញាឆ្នាំមុនវិញ គឺធ្លាក់ចុះប្រមាណជា ៤០%។ ក្រៅពីតូយ៉ូតា ឡានជប៉ុនផ្សេងទៀត ដូចជា Mazda, Honda និង Nissan ជាដើម ក៏សុទ្ធតែពិបាកលក់ចេញដូចគ្នាដែរ។ កាលពីម្សិលមិញ ក្រុមហ៊ុន Mazda បានប្រកាសឲ្យដឹងថា ការលក់ឡាន Mazda នៅចិន សម្រាប់ខែកញ្ញាកន្លងទៅនេះ បានធ្លាក់ចុះជាង ១ភាគ៣ បើធៀបនឹងខែកញ្ញា ឆ្នាំទៅមិញ។
ក្នុងអំឡុងពេលនេះ ឡានម៉ាកផ្សេង កំពុងតែទាញយកផលចំណេញពីការធ្លាក់ចុះរបស់ឡានជប៉ុន។ ឡានអាល្លឺម៉ង់ រួមមាន Volkswagen, Audi, BMW និង Mercedes សុទ្ធតែលក់ដាច់ជាងមុន (ខ្លះកើនឡើង ១០%, ខ្លះ ២០% ហើយខ្លះទៀតរហូតដល់ ៥៥%)។
ម្ចាស់ហាងលក់ឡាននៅចិន ក៏បានអះអាងផងដែរថា កាលពីពេលកន្លងទៅ បើទោះបីជាមានផ្ទុះចលនាប្រឆាំងជប៉ុនយ៉ាងណាក៏ដោយ ក៏ឡានម៉ាករបស់ជប៉ុន រួមមាន តូយ៉ូតា នីសាន់ ឡិចស៊ីស និងហុងដា ជាដើម នៅតែអាចលក់ចេញ ដោយមិនចោទជាបញ្ហាប៉ុន្មានទេ។ ប៉ុន្តែ លើកនេះ ការលក់ឡានជប៉ុន គឺមានការពិបាកខ្លាំង ខុសពីលើកមុនៗ ដែលគួរឲ្យព្រួយបារម្ភ។ អ្វីដែលកាន់តែគួរឲ្យបារម្ភទៅទៀតនោះ គឺនៅត្រង់ថា ពេលនេះ ទោះបីជាអ្នកមិនមានគំនិតស្អប់ជប៉ុន ក៏មិនហ៊ានជិះឡានជប៉ុនដែរ ដោយសារតែមើលឃើញក្នុងចលនាបាតុកម្មប្រឆាំងជប៉ុនកន្លងមក ក្រុមបាតុករចិនបាននាំគ្នាវាយកម្ទេចឡានដែលជាម៉ាករបស់ជប៉ុន ហើយពេលខ្លះ សូម្បីតែអ្នកបើក ឬអ្នកជិះ ដែលជាជនជាតិចិន ក៏ត្រូវបាតុករវាយដែរ។
ចិន គឺជាទីផ្សារដ៏ចម្បងមួយ សម្រាប់ឡានជប៉ុន។ ដូច្នេះ ប្រសិនបើប្រជាជនចិននៅតែបន្តធ្វើពហិការមិនទិញឡានជប៉ុនបែបនេះតទៅទៀត វាប្រាកដជានឹងធ្វើឲ្យប៉ះពាល់ដល់ប្រាក់ចំណូលរបស់ក្រុមហ៊ុនឡានជប៉ុន។ ក៏ប៉ុន្តែ ចិនក៏អាចនឹងទទួលរងនូវផលវិបាកនេះមួយផ្នែកដែរ ពីព្រោះថា នៅពេលលក់មិនសូវដាច់ ក្រុមហ៊ុនឡានជប៉ុននឹងកាត់បន្ថយសកម្មភាពផលិតនៅចិន ដែលនឹងធ្វើឲ្យកម្មករចិនត្រូវបាត់បង់ការងារធ្វើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ