វិធានការចំបងៗរបស់លោកត្រាំ ប្រឆាំងបញ្ហាអន្តោប្រវេសន៍ខុសច្បាប់
ចាប់ពីថ្ងៃពុធនេះទៅ ប្រធានាធិបតីអាមេរិក ដូណាល់ ត្រាំ ត្រូវចុះហត្ថលេខាលើក្រឹត្យប្រធានាធិបតីមួយចំនួន មានទិសដៅពង្រឹងព្រំដែនអាមេរិក ប្រយុទ្ធប្រឆាំងបញ្ហាអន្តោប្រវេសន៍ខុសច្បាប់។ លោកត្រាំគ្រោងបន្ថយពាក់កណ្តាលនូវកូតាជនភៀសខ្លួន ដែលចូលមកនៅសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៣
យោងតាមសារព័ត៌មានអាមេរិក ក្រឹត្យប្រធានាធិបតីទាំងនេះមានទិសដៅកាត់បន្ថយទិដ្ឋាការដែលត្រូវផ្តល់អោយអ្នកដែលចូលទឹកដីអាមេរិក កាត់បន្ថយកូតាជនភៀសខ្លួន។ កាសែតវ៉ាស៊ីនតោន ប៉ុស្តិ៍ សរសេរថា ក្រឹត្យប្រធានាធិបតីអាមេរិក មានទិសដៅកាត់បន្ថយអ្នកដែលមានទិដ្ឋាការធ្វើ ដំណើរមកពីប្រទេសមួយចំនួន ដូចជាអ៊ីរ៉ាក់ អ៊ីរ៉ង់ អាហ្វហ្កានីស្ថាន លីប៊ី សូម៉ាលី ស៊ីរី រឺក៏យេម៉ែន។
គួររំលឹកថា មុនជាប់ឆ្នោត លោកដូណាល់ ត្រាំ ធ្លាប់សន្យាហាមឃាត់មិនអោយអ្នកកាន់សាសនាអ៊ីស្លាមចូលទឹកដីអាមេរិកទេ។ ដើម្បីពង្រឹងសន្តិសុខព្រំដែន ប្រធានាធិបតីអាមេរិកគ្រោងជ្រើសរើសឆ្មាំការពារព្រំដែន៥០០០នាក់ថែមទៀត។ ប៉ូលិសក្នុងស្រុកក៏នឹងត្រូវស្នើអោយសហការជាមួយអាជ្ញាធរសហព័ន្ធផងដែរ។
កាលពីល្ងាចថ្ងៃអង្គារ លោកត្រាំបានសរសេរក្នុងទំព័រទ្វីតថឺរបស់លោក គូសបញ្ជាក់ឡើងវិញ នូវបំណងសង់ជញ្ជាំងព្រំដែនរវាងសហរដ្ឋអាមេរិក ជាមួយម៉ិចស៊ិក។ មិនដឹងថា តើទំនាក់ទំនងម៉ិចស៊ិកនិងអាមេរិកនឹងវិវត្តន៍យ៉ាងណាទៀតទេ ព្រោះម៉ិចស៊ិកបានព្រមានរដ្ឋបាលលោកត្រាំរួចហើយ ថាម៉ិចស៊ិកនឹងដើរចេញពីតុចរចាកិច្ចព្រមព្រៀងផ្តោះប្តូរសេរីAlena។ ជាកិច្ចព្រមព្រៀងធ្វើឡើងរវាងសហរដ្ឋអាមេរិក កាណាដា និងម៉ិចស៊ិក។ លោកដូណាល់ ត្រាំ ធ្លាប់បង្ហាញបំណងចរចាកិច្ចព្រមព្រៀងនេះឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ