លោកដូណាល់ត្រាំជាកាលានុវត្តភាពសម្រាប់គម្រោងបង្កើតកងទ័ពរួមអឺរ៉ុប ?
ចុះផ្សាយនៅថ្ងៃ៖
នៅសល់តែប៉ុន្មានថ្ងៃមុនពេលស្បថចូលកាន់តំណែងជាប្រធានាធិបតីអាមេរិក លោក ដូណាល់ ត្រាំ បានធ្វើការវាយប្រហារខ្លាំងៗទៅលើសម្ព័ន្ធមិត្តដ៏ចាស់ឆ្នាំរបស់អាមេរិក គឺសហភាពអឺរ៉ុប និងបក្សសម្ព័ន្ធអូតង់។ ការណ៍ដែលអនាគតប្រធានាធិបតីអាមេរិក ធ្វើការបរិហាររិះគន់សម្ព័ន្ធមិត្តគ្នាឯង ព្រមពេលនឹងការលើកសរសើររុស្ស៊ីដែលជាគូប្រជែងបែបនេះ បានធ្វើឲ្យបណ្តាមេដឹកនាំមួយចំនួននៅអឺរ៉ុប បង្ហាញនូវការមិនសប្បាយចិត្ត និងក្តីព្រួយបារម្ភ អំពីអនាគតនៃទំនាក់ទំនងអាមេរិក-អឺរ៉ុប ជាពិសេស ចំពោះភាពប្តូរផ្តាច់របស់អាមេរិក ក្នុងការការពារអឺរ៉ុបពីគូសត្រូវ។ ក៏ប៉ុន្តែ ក្នុងពេលជាមួយគ្នា គេក៏សំឡឹងឃើញដែរថា នយោបាយរបស់លោកដូណាល់ត្រាំអាចនឹងជាកត្តាដ៏សំខាន់មួយ ជំរុញឲ្យអឺរ៉ុបរួបរួមគ្នា នៅក្នុងការធ្វើសមាហរណកម្មវិស័យការពារជាតិ ដើម្បីកាត់បន្ថយការពឹងផ្អែកលើអាមេរិក។
អស់រយៈពេល ៦០ឆ្នាំមកហើយ ដែលសហភាពអឺរ៉ុបបានចាប់កំណើតឡើង ដោយបានធ្វើសមាហរណកម្មពេញលេញនៅក្នុងវិស័យជាច្រើន រាប់ចាប់តាំងពីខាងផ្នែកសេដ្ឋកិច្ច នយោបាយ ប៉ូលិសនិងយុត្តិធម៌ ក៏ប៉ុន្តែ មានវិស័យដ៏សំខាន់មួយ ដែលសហភាពអឺរ៉ុបតែងតែទទួលបរាជ័យមិនអាចធ្វើសមាហរណកម្មបាន គឺវិស័យការពារជាតិ។ ការប៉ុនប៉ងបង្កើតកងទ័ពរួមសម្រាប់អឺរ៉ុបបានចាប់ផ្តើមឡើង តាំងពីឆ្នាំ១៩៥០ ក៏ប៉ុន្តែ ត្រូវជាប់គាំង ចាប់តាំងពីរដ្ឋសភាបារាំងបានបដិសេធមិនផ្តល់សច្ចាប័នលើសន្ធិសញ្ញាស្តីពីការបង្កើតសហគមន៍ការពារជាតិអឺរ៉ុប កាលពីឆ្នាំ១៩៥៤។
មានកត្តាជាច្រើន ដែលធ្វើឲ្យសហភាពអឺរ៉ុបមិនអាចធ្វើសមាហរណកម្មក្នុងវិស័យកងទ័ពដូចវិស័យផ្សេងទៀតបាន។ ការប្រកាន់នយោបាយអធិបតេយ្យនិយម ដូចជា បារាំង និងអង់គ្លេស ជាដើម ដែលមិនចង់ប្រគល់អំណាចទ័ពរបស់ខ្លួនទៅឲ្យសហភាពអឺរ៉ុប គឺជាកត្តាមួយ ក៏ប៉ុន្តែ កត្តាកាន់តែសំខាន់ជាងនេះទៅទៀត គឺវត្តមានរបស់អូតង់។
ប្រទេសស្ទើរតែទាំងអស់ ដែលជាសមាជិកសហភាពអឺរ៉ុប គឺជាសមាជិកបក្សសម្ព័ន្ធអូតង់។ បច្ចុប្បន្ន នៅក្នុងចំណោមប្រទេសសមាជិកសហភាពអឺរ៉ុបទាំង ២៨ មាន ២២ប្រទេស ជាសមាជិកអូតង់ ហើយនៅក្នុងចំណោមនោះ មានប្រទេសភាគច្រើនលើសលុបគិតថា ការបង្កើតកងទ័ពអឺរ៉ុប មិនមែនជារឿងចាំបាច់នោះទេ ពីព្រោះថា អឺរ៉ុបមានកងទ័ពរួមមួយរួចទៅហើយ គឺអូតង់ ហើយលើសពីនេះទៅទៀត នៅក្នុងអូតង់ គឺមានសហរដ្ឋអាមេរិក ដែលជាមហាអំណាចយោធាលំដាប់កំពូលនៅលើពិភពលោក។
និយាយសរុបដោយខ្លីមកវិញ បណ្តាប្រទេសសមាជិកសហភាពអឺរ៉ុបមិនសូវខ្វល់ខ្វាយពីការធ្វើសមាហរណកម្មវិស័យការពារជាតិ គឺដោយសារតែគេដាក់ក្តីរំពឹងលើកិច្ចការពារពីសំណាក់សហរដ្ឋអាមេរិក។ ក៏ប៉ុន្តែ ក្តីរំពឹងនេះកំពុងតែក្លាយទៅជាក្តីបារម្ភ នៅក្រោយការជាប់ឆ្នោតរបស់លោកដូណាល់ត្រាំ។
គេសង្កេតឃើញថា ចាប់តាំងពីក្នុងអំឡុងយុទ្ធនាការឃោសនាបោះឆ្នោត រហូតដល់ក្រោយពេលឈ្នះឆ្នោត ហើយជិតដល់ពេលស្បថចូលកាន់តំណែង លោកដូណាល់ត្រាំតែងតែថ្លែងរិះគន់បក្សសម្ព័ន្ធអូតង់ ហើយក្នុងពេលជាមួយគ្នា លើកសរសើរលោកពូទីនប្រធានាធិបតីរុស្ស៊ី ដែលបច្ចុប្បន្ន ត្រូវបានបណ្តាប្រទេសអឺរ៉ុបចាត់ទុកជាការគំរាមកំហែងដ៏ធំមួយខាងផ្នែកសន្តិសុខជាតិ។
កាលពីដំបូង ការរិះគន់របស់លោកដូណាល់ត្រាំ ទៅលើបក្សសម្ព័ន្ធអូតង់ គឺផ្តោតជាពិសេស ទៅលើការណ៍ដែលអាមេរិកជាអ្នករ៉ាប់រងការចំណាយច្រើនហួសហេតុ ចំណែកឯប្រទេសផ្សេងទៀតនៅអឺរ៉ុបគិតតែផ្តេកផ្តួលលើអាមេរិក ហើយមិនបង្កើនការចំណាយខាងផ្នែកការពារជាតិរបស់ខ្លួន។ តាមការពិត នេះមិនមែនជារឿងថ្មីនោះទេ។ សហរដ្ឋអាមេរិក ទាំងនៅក្រោមអាណត្តិប្រធានាធិបតីមុនៗ តែងតែជំរុញឲ្យអឺរ៉ុបបង្កើនការចំណាយការពារជាតិ ដើម្បីសម្រាលបន្ទុកអាមេរិក ហើយបណ្តាប្រទេសអឺរ៉ុបភាគច្រើន ពិតជាមិនបានបង្កើនការចំណាយការពារជាតិដល់ ២% នៃផលិតផលក្នុងស្រុកសរុប ទៅតាមកូតា ដែលបានកំណត់ដោយអង្គការអូតង់ពិតមែន។
ក៏ប៉ុន្តែ អ្វីដែលធ្វើឲ្យគេព្រួយបារម្ភខ្លាំង គឺនៅក្នុងពេលចុងក្រោយនេះ លោកដូណាល់ត្រាំ ដែលនឹងឡើងមកកាន់តំណែង នៅថ្ងៃសុក្រខាងមុខនេះ មិនត្រឹមតែរិះគន់ពីការចំណាយផ្នែកការពារជាតិរបស់ប្រទេសនៅអឺរ៉ុបនោះទេ តែបានវាយប្រហារទៅលើអត្ថិភាពនៃបក្សសម្ព័ន្ធអូតង់ដោយផ្ទាល់តែម្តង ដោយបានលើកឡើងថា អូតង់ដែលបង្កើតឡើងតាំងពីសម័យសង្រ្គាមត្រជាក់ គឺជាបក្សសម្ព័ន្ធដែលហួសសម័យលែងមានន័យ ហើយកាន់តែសំខាន់ជាងនេះទៅទៀត តបទៅនឹងសំណួរថាតើអាមេរិកនឹងជួយការពារប្រទេសសមាជិកអូតង់នៅអឺរ៉ុបខាងកើតឬទេក្នុងករណីមានការឈ្លានពានពីសំណាក់រុស្ស៊ី លោកដូណាល់ត្រាំបានឆ្លើយថា អាមេរិកនឹងចូលជួយ ប្រសិនបើប្រទេសនោះគោរពទៅតាមកាតព្វកិច្ចដែលមានចំពោះអាមេរិក។
គួរបញ្ជាក់ថា មាត្រា ៥ នៃសន្ធិសញ្ញាអូតង់ បានចែងថា ការវាយប្រហារទៅលើប្រទេសសមាជិកណាមួយ គឺមានន័យជាការវាយប្រហារលើអូតង់ទាំងមូល ហើយប្រទេសសមាជិកផ្សេងទៀតមានកាតព្វកិច្ចត្រូវតែចូលជួយ។ ការថ្លែងរបស់លោកដូណាល់ត្រាំ គឺមានន័យស្មើនឹងការច្រានចោលមាត្រា ៥ នៃសន្ធិសញ្ញាអូតង់ ដែលគេមិនធ្លាប់ដែលឃើញមានពីសំណាក់ប្រមុខដឹកនាំអាមេរិក នៅក្នុងប្រវត្តិជិត ៧០ឆ្នាំនៃការកកើតអូតង់ ហើយនេះ គឺជាការដាស់ស្មារតីប្រទេសនៅអឺរ៉ុប ឲ្យភ្ញាក់រឭកថា អឺរ៉ុបមិនអាចចេះតែបន្តពឹងផ្អែកលើកិច្ចការពារពីសំណាក់សហរដ្ឋអាមេរិកបានជារៀងរហូតនោះទេ ហើយគម្រោងធ្វើសមាហរណកម្មខាងវិស័យការពារជាតិក្នុងសហភាពអឺរ៉ុប ដែលជារឿងរសើបមិនមានអ្នកណាចង់និយាយដល់អស់រយៈពេលរាប់ទសវត្សរ៍មកហើយនោះ កំពុងតែក្លាយជាបច្ចុប្បន្នភាពឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ