លោកត្រាំជជែកតាមទូរសព្ទជាមួយប្រធានាធិបតីតៃវ៉ាន់ ស្ទើរតែបង្កជាវិបត្តិជាមួយចិន
ចុះផ្សាយនៅថ្ងៃ៖
ស្តាប់ - ០៦:០៥
លោកដូណាល់ ត្រាំ ស្ទើរតែនឹងធ្វើអោយចិនខឹងជាមួយអាមេរិកកាន់តែខ្លាំង ដោយសារតែលោកបានជជែកតាមទូរសព្ទជាមួយនិងប្រធានាធិបតីតៃវ៉ាន់ លោកស្រី ត្សៃ អ៊ីងវេន។ ប្រឈមនឹងការរិះគន់ លោកត្រាំបានសរសេរក្នុងទំព័រទ្វីតថឺថា គឺប្រធានាធិបតីតៃវ៉ាន់ទៅវិញទេ ដែលបានទូរសព្ទមករកលោក ដើម្បីអបអរសាទរនឹងការ ដែលលោកបានជាប់ឆ្នោតជាប្រធានាធិបតីអាមេរិក។
សេតវិមានបានព្យាយាមកាត់បន្ថយភាពតានតឹងជាមួយចិន ដោយលើកឡើងថា គ្មានការផ្លាស់ប្តូរក្នុងទំនាក់ទំនងដែលអាមេរិកមាននឹងចិនយូរយារមកហើយទេ។ ថ្ងៃសៅរ៍នេះ រដ្ឋមន្ត្រីការបរទេសចិន លោកវ៉ាង យី បានប្រតិកម្មថា ការជជែកតាមទូរសព្ទនេះ មិនបានប៉ះពាល់ទៅដល់”គោលការណ៍ចិនតែមួយ” ដែលសហគមន៍អន្តរជាតិបានព្រមព្រៀងគ្នាយល់ឃើញនោះទេ។
លោកដូណាល់ ត្រាំ គូសបញ្ជាក់ថា ប្រធានាធិបតីតៃវ៉ាន់ លោកស្រីត្សៃ អ៊ីងវេន ជាអ្នកទូរសព្ទមករកលោក
ក្នុងការជជែកទូរសព្ទម្សិលមិញ លោកត្រាំ និងលោកស្រីត្សៃ បានលើកឡើង និងកត់សម្គាល់រួមគ្នា ពីទំនាក់ទំនងសេដ្ឋកិច្ច នយោបាយ និងសន្តិសុខ រវាងតៃវ៉ាន់និងអាមេរិក។ ការជជែកគ្នាបែបនេះ ត្រូវបានគេមើលឃើញថា អាចធ្វើអោយចិនខឹងអាមេរិក ពិសេសខឹងលោកដូណាល់ ត្រាំតែម្តង។
ចិនដឹងថា លោកត្រាំមិនចូលចិត្តចិនទេ។ ក្នុងការឃោសនាឆ្នោតប្រធានាធិតីនៅសហរដ្ឋអាមេរិក ដូណាល់ ត្រាំ ធ្លាប់សន្យាយកពន្ធលើទំនិញដែលនាំចូលក្នុងស្រុកអាមេរិក អោយបានដល់ទៅ៤៥ភាគរយ គឺជាតួលេខខ្ពស់។ ម្យ៉ាងទៀត ក្នុងចំណោមអ្នកជំនិតរបស់លោកត្រាំបច្ចុប្បន្ន ក៏មានអ្នកមានជំហរគាំទ្រតៃវ៉ាន់មួយចំនួនដែរ។ ពេលលោកត្រាំបានជួបប្រធានាធិបតីស៊ី ជីនពីង កន្លងមក លោកក៏បានចៀសមិននិយាយពីបញ្ហានេះទៅវិញ។ លោកស៊ី ជីនពីង បានសង្កត់ធ្ងន់ពីការគោរពគ្នាទៅវិញទៅមក ក្នុងទំនាក់ទំនងរវាងចិននិងអាមេរិក។
រឿងជជែកតាមទូរសព្ទជាមួយលោកស្រីត្សៃ អ៊ីងវេន ជាប្រធានាធិបតីតៃវ៉ាន់ ម្សិលមិញ មិនមែនជារឿងដែលលោកត្រាំធ្វើបន្ថែមភាពតានតឹងអោយចិនទេ គឺដូចដែលលោកត្រាំបានសរសេរក្នុងទ្វីតថឺអញ្ចឹង គឺប្រធានាធិបតីតៃវ៉ាន់ ជាអ្នកទូរសព្ទមករកលោកមុន។ យើងដឹងថា ទំនាក់ទំនងរវាងចិននិងអាមេរិក មានយូរយារមកហើយ គឺតាំងពីដើមទស្សវត្សឆ្នាំ១៩៧០ម្ល៉េះ។ កាលនោះ សហរដ្ឋអាមេរិកបានខិតទំនាក់ទំនងទៅរកចិន។ ទាំងបក្សសាធារណរដ្ឋដែលទើបនឹងឈ្នះឆ្នោត ទាំងបក្សប្រជាធិបតេយ្យ សុទ្ធតែគាំទ្រនូវគោលការណ៍”ចិនតែមួយ” ពោលគឺគោលការណ៍ដែលចាត់ទុកកោះតៃវ៉ាន់ ជាដែនដីរបស់ចិន។
ដោយសារតែអាមេរិកគាំទ្រគោលការណ៍នេះ និងបានខិតទៅរកចិន អាមេរិកនិងតៃវ៉ាន់បានផ្តាច់ទំនាក់ទំនងការទូតនឹងគ្នា កាលពីឆ្នាំ១៩៧៩។ ដូច្នេះ ការដែលមេដឹកនាំតៃវ៉ាន់ទូរសព្ទអបអរលោកត្រាំ ដែលត្រូវកាន់កាប់អាមេរិក នៅខែមករាឆ្នាំក្រោយនេះ គឺជារឿងពិសេស រវាងតៃវ៉ាន់ និងអាមេរិក ប្រៀបបាននឹងការដែលតៃវ៉ាន់និងអាមេរិកចងសម្ព័ន្ធការទូតនឹងគ្នាវិញដូច្នោះដែរ។
ម្សិលមិញនេះ ក៏មិនមែនត្រឹមតែទទួលទូរសព្ទពីមេដឹកនាំតៃវ៉ាន់តែម្នាក់ដែរ។ ប្រធានាធិបតីហ្វីលីពីន ឌុយទែរតេ ប្រធានាធិបតីអាហ្វហ្កានីស្ថាន ហ្កានី រឺក៏នាយករដ្ឋមន្ត្រីសិង្ហបុរី លី សៀនឡុង ក៏បានជជែកតាមទូរសព្ទជាមួយដូណាល់ ត្រាំដែរម្សិលមិញ។
សម្រាប់ចិន ការដែលប្រធានាធិបតីតៃវ៉ាន៉ទូរសព្ទទៅរកលោកត្រាំមុន គឺជាល្បិចរបស់តៃវ៉ាន់
ចិនមើលឃើញថា ខណៈលោកដូណាល់ ត្រាំ ទើបជាប់ឆ្នោតជាប្រធានាធិបតីអាមេរិក តៃវ៉ាន់ត្រូវតែព្យាយាមរកល្បិច ធ្វើយ៉ាងណាអោយតៃវ៉ាន់ខិតជិតអាមេរិករបស់លោកដូណាល់ ត្រាំ ដើម្បីអាចលើកតម្កើងមុខមាត់តៃវ៉ាន់ ក្នុងឆាកអន្តរជាតិ ប្រឈមនឹងចិន។
ចិនមិនពេញចិត្តរដ្ឋាភិបាលតៃវ៉ាន់បច្ចុប្បន្នរបស់លោកស្រី ត្សៃ អ៊ីងវេន ប៉ុន្មានទេ ព្រោះរដ្ឋាភិបាលនេះកើតចេញពីបក្សប្រឆាំងក្នុងអាណត្តិមុន។ របបដឹកនាំតៃវ៉ាន់អាណត្តិមុន របស់អតីតប្រធានាធីតីម៉ា យិងចូវ ត្រូវចិត្តចិនច្រើនជាង ព្រោះលោកម៉ា យិងចូវ មានទំនោរទៅរកចិន។
រដ្ឋមន្ត្រីការបរទេសចិន វ៉ាង យី លើកឡើងទៅអាមេរិកថា៖ គោលការណ៍ចិនតែមួយ ជាគ្រឹះនៃការអភិវឌ្ឍទំនាក់ទំនងចិន-អាមេរិក។ ចិនមិនចង់អោយមានអ្វីមួយមកបំផ្លាញគ្រឹះនយោបាយនេះទេ។
គាំទ្រ”គោលការណ៍ចិនតែមួយ”មែន តែអាមេរិកលក់អាវុធអោយតៃវ៉ាន់
ក្រោយជជែកជាមួយលោកស្រីត្សៃ អ៊ីងវេន តាមទូរសព្ទ លោកត្រាំបានលើកឡើង ពីការដែលអាមេរិកបានលក់អាវុធតម្លៃរាប់ពាន់លានដុល្លារទៅអោយតៃវ៉ាន់។ ការលក់អាវុធនេះសបង្ហាញពីជំហរបញ្ច្រាសទិសគ្នា របស់អាមេរិក ដែលតែងបង្ហាញការគាំទ្រ ”គោលការណ៍ចិនតែមួយ”។
គេអាចថា សហរដ្ឋអាមេរិកលេងខូចយូរហើយ មិនថា បក្សសាធារណរដ្ឋដែលទើបជាប់ឆ្នោត រឺក៏បក្សប្រជាធិបតេយ្យដែលជិតផុតអាណត្តិដឹកនាំទេ។ អាមេរិកចាប់ត្រីដៃ២យូរមកហើយ ពោលគឺដៃម្ខាងលក់អាវុធទៅអោយតៃវ៉ាន៉ទាំងដឹងថា តៃវ៉ាន់និងចិនមិនត្រូវគ្នា។ តែអាមេរិកអះអាងថា គឺដើម្បីការពារសន្តិសុខកោះតៃវ៉ាន់។ ដៃម្ខាងទៀតរបស់អាមេរិក គឺសម្រាប់ទំនាក់ទំនងជាមួយចិន ដែលជាមហាអំណាចនៅអាស៊ី។
ប្រសិនបើសិនលោកត្រាំ ចង់បន្ទោសរឿងលក់អាវុធអោយតៃវ៉ាន់ ក៏ពិបាកបន្ទោសដែរ ព្រោះអាមេរិកខ្លួនឯងលេងខូចយូរហើយ។ រឿងនេះលោកត្រាំក៏ប្រហែលជាអាចដឹងដែរ ព្រោះវាពាក់ព័ន្ធទាំងបក្សសាធារណរដ្ឋដែលធ្លាប់កាន់អំណាចពីមុនមកដែរ។
លោកត្រាំមានជំហរមិនច្បាស់លាស់ ក្នុងនយោបាយការបរទេស
ថ្ងៃសុក្រម្សិលមិញ ប្រធានាធិបតីហ្វីលីពីន ឌុយទែរតេ ទូរសព្ទទៅលោកត្រាំ។ លោកឌុយទែរតេប្រាប់ថា លោកត្រាំបានគាំទ្រនយោបាយប្រឆាំងគ្រឿងញៀនរបស់ហ្វីលីពីន ហើយថែមទាំងជូនពរលោកឌុយទែរតេអោយជួបជោគជ័យទៀតផង។ សប្តាហ៍នេះដែរ ក្នុងការជជែកតាមទូរសព្ទជាមួយនាយករដ្ឋមន្ត្រីប៉ាគីស្ថាន ណាវ៉ា ស្ហារីហ្វ ដូណាល់ ត្រាំ បានសរសើរមិនដាច់ពីមាត់ ថាលោកស្ហារីហ្វ អស្ចារ្យក្នុងកិច្ចការ- សរសើរថា ប្រជាជនប៉ាគីស្ថានជាប្រជាជនឆ្លាតបំផុត។ នៅមានពាក្យសរសើរច្រើនទៀត។
សូម្បីតែលោកណាហ្សាបៃយេវ ជាប្រធានាធិបតីកាហ្សាក់ស្ថាន ដែលកាន់អំណាច២៥ឆ្នាំមកហើយនោះ ក៏ត្រូវលោកត្រាំសរសើរមិនដាច់ពីមាត់ដែរ។ និយាយរួមមកវិញ លោកត្រាំសរសើរប៉ាគីស្ថានភ្លេចគិតពីទំនាក់ទំនងអាមេរិកជាមួយឥណ្ឌា។ បើលោកត្រាំជជែកជាមួយមេដឹកនាំឥណ្ឌា លោកអាចនឹងសរសើរឥណ្ឌា ភ្លេចប៉ាគីស្ថានវិញក៏ថាបាន។
នយោបាយការបរទេសបែបនេះ មិនបានឈរលើជំហរអ្វីមួយពិតប្រាកដទេ។ ហើយក៏ពិបាកនឹងយកជាការបានដែរ។ អឺរ៉ុបនិងអាស៊ីក៏កំពុងបារម្ភបញ្ហានេះ។ បក្សប្រជាធិបតេយ្យដែលជិតផុតអាណត្តិ សង្ឃឹមថា លោកត្រាំអាចនឹងតែងតាំងរដ្ឋមន្ត្រីការបរទេសអោយបានឆាប់រហ័ស ដើម្បីកុំអោយរញ៉េរញ៉ៃដូច្នេះទៀត។
មានបេក្ខជន៣រូប សម្រាប់តំណែងការបរទេសក្នុងរដ្ឋបាលរបស់លោកត្រាំ គឺមានលោក Mitt Romney ជាធ្លាប់ជាបេក្ខជនប្រធានាធិបតីឆ្នាំ២០១២ លោកDavid Petraeus ជាអតីតប្រធានសេអ៊ីអា និងលោកRudy Giuliani ជាអតីតអភិបាលក្រុងញូវយក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ