សហគមន៍អន្តរជាតិមមាញឹកជួយហ្វីលីពីន ពេលអង្គការសហប្រជាជាតិបើកកិច្ចប្រជុំស្តីពីការប្រែប្រួលអាកាសធាតុ
ចុះផ្សាយនៅថ្ងៃ៖
ស្តាប់ - ០៥:៥៤
សហគមន៍អន្តរជាតិ និងអង្គការមនុស្សធម៌ផ្សេងៗកំពុងមមាញឹកដៃជើង នៅហ្វីលីពីនដើម្បីជួយសង្គ្រោះដល់ជនរងគ្រោះនៅហ្វីលីពីន។ ព្យុះហៃយ៉ានបានវាយប្រហារហ្វីលីពីនកាលពីចុងសប្តាហ៍មុន បានសម្លាប់មនុស្សជាងមួយម៉ឺននាក់។ នៅថ្ងៃចន្ទម្សិលមិញនេះ អង្គការសហប្រជាជាតិប្រាប់ថា ចំនួនអ្នកស្លាប់ដោយព្យុះហៃយ៉ាននៅហ្វីលីពីន អាចលើសពីមួយម៉ឺននាក់ទៅទៀត។ ព្យុះហៃយ៉ានបានបញ្ចប់ដំណើររបស់ខ្លួនហើយ បន្ទាប់ពីបានវាយប្រហារវៀតណាម និងចិន កាលពីថ្ងៃចន្ទម្សិលមិញ។
ស្ថានភាពនៅហ្វីលីពីនបន្ទាប់ពីព្យុះហៃយ៉ានបានបញ្ចប់ទៅ
យោងតាមអង្គការសហប្រជាជាតិ ក្រុងតាក្លូបង់ដែលស្ថិតក្នុងដំណើរនៃព្យុះហៃយ៉ានដែលបានបោកបក់ក្នុងល្បឿនជាង៣០០គីឡូម៉ែត្រក្នុងមួយម៉ោងនោះ បានរងគ្រោះខ្លាំងបំផុត គឺមានមនុស្សស្លាប់ប្រមាណជាមួយម៉ឺននាក់ឯណោះ។ ដូច្នេះ ចំនួនអ្នកស្លាប់ នៅហ្វីលីពីន អាចកើនឡើងលើសពីមួយម៉ឺននាក់ ដែលមានចែងក្នុងតួលេខរបស់អាជ្ញាធរ។
បញ្ហាចោទនៅពេលនេះ គឺថានៅក្រុងតាក្លូបង់ ដែលរងគ្រោះខ្លាំងបំផុតនោះ បន្ទាប់ពីព្យុះហៃយ៉ានបានបញ្ចប់ទៅនោះ គឺមានការលួចប្លន់មានលក្ខណៈជាទូទៅទៅហើយ។ ជនដែលរួចពីការស្លាប់ មានអស់សង្ឃឹមខ្លាំង ហើយដោយប្រឈមទៅនឹងភាពអត់អាហារ ខ្វះខាតថ្នាំពេទ្យ ដើម្បីព្យាបាលនោះ មនុស្សមួយចំនួនក៏បានចូលទៅលួចប្លន់ នៅតាមហាងទំនិញនានា។ ដើម្បីទប់ស្កាត់បញ្ហានេះ រដ្ឋាភិបាលហ្វីលីពីនបានដាក់បម្រាមគោចរ ចន្លោះពីម៉ោង១០យប់ រហូតដល់ម៉ោង៦ព្រឹក មិនអោយប្រជាជនចេញដើរផ្តេសផ្តាស។ កងទ័ពរាប់រយនាក់ត្រូវបានដាក់ពង្រាយនៅក្រុងតាក្លូបង់។ រដ្ឋាភិបាលក៏បានដាក់រថពាសដែកបួនគ្រឿងនៅទីនោះដែរ ដើម្បីកំញ៉ែងជនដែលមានបំណងលួចប្លន់។
ដោយឡែក ទាហានហ្វីលីពីនបានយកយន្តហោះទៅដឹកជនរងគ្រោះ មានកុមារ មនុស្សចាស់ និងអ្នករបួសផ្សេងៗ នាំទៅព្យាបាលនៅក្រុងម៉ានីល។
សហគមន៍អន្តរជាតិ ប្រទេសជាច្រើន និងអង្គការមនុស្សធម៌ជាច្រើនក៏បានបញ្ជូនសម្ភារៈ ជួយជាលុយកាក់ ដល់ហ្វីលីពីនផងដែរ។ ក្នុងប្រតិបត្តិការសង្គ្រោះនៅពេលនេះ គឺអង្គការមនុស្សធម៌នានា មិនចង់អោយមានការខុសឆ្គង ដូចជាកាលពីឆ្នាំ២០០៤ ពេលអាស៊ីអគ្នេយ៍ជួបមហន្តរាយដោយរលកយក្សស៊ូណាមី។ បញ្ហាកាលណោះ គឺថាអង្គការនានា បានប្រជែងគ្នាបញ្ជូនសម្ភារៈឥតប្រយោជន៍ជាច្រើនជួយជនរងគ្រោះ។ ក្នុងប្រតិបត្តិការសង្គ្រោះឆ្នាំ២០០៤ ក៏មានបញ្ហាគ្រប់គ្រងថវិកាជួយប្រទេសរងគ្រោះផងដែរ។ រហូតមកដល់ពេលនេះ ថវិកាដែលត្រូវផ្តល់ជួយសាងសង់ជួសជុលទីកន្លែងខូចខាតក៏នៅមិនទាន់ឃើញផ្តល់អោយតាមសន្យាផង។ ប្រាក់កាសជាច្រើនត្រូវចំណាយក្នុងរឿងឥតប្រយោជន៍។ ដូច្នេះ អង្គការមនុស្សធម៌ចង់ចៀសការខុសឆ្គងដដែលនេះ។
ព្យុះមហន្តរាយហៃយ៉ាន និងព្យុះដែលមានកន្លងមកក្នុងពិភពលោក អាចជាលទ្ធផលបង្កដោយការប្រែប្រួលអាកាសធាតុ?
អ្នកជំនាញឧតុនិយមនៅមិនទាន់យល់ឃើញថា ការប្រៃប្រួលអាកាសធាតុ និងការកើនឡើងសីតុណ្ហភាពនៃភពផែនដី អាចជាមូលហេតុបង្កអោយមានព្យុះហៃយ៉ាន និងព្យុះផ្សេងៗកន្លងមកទេ។
ដោយឡែក នៅខែកញ្ញា ឆ្នាំ២០១៣នេះ អ្នកជំនាញអាកាសធាតុអង្គការសហប្រជាជាតិធ្លាប់បានចេញរបាយការណ៍ថា ការប្រែប្រួលអាកាសធាតុក្នុងពិភពលោក៩៥ភាគរយ គឺបង្កដោយសារមនុស្សយើង។ គេរំពឹងក្នុងរបាយការណ៍នោះថា នៅឆ្នាំ២១០០ កំពស់ទឹកសមុទ្រអាចឡើងពី២៦សង់ទីម៉ែត្រ ដល់៨២សង់ទីម៉ែត្រឯណោះ។ ហើយសីតុណ្ហភាពអាចឡើងពី០,៣អង្សារ ដល់៤,៨អង្សារ។
ទាក់ទងនឹងការប្រែប្រួលអាកាសធាតុនេះ អង្គការសហប្រជាជាតិបានរៀបចំកិច្ចប្រជុំមួយ នៅវ៉ាសូវី ដែលមានប្រទេសជិត២០០ចូលរួម។ កិច្ចប្រជុំនេះបានធ្វើឡើងចាប់ពីថ្ងៃចន្ទម្សិលមិញមក ហើយនឹងបញ្ចប់ទៅថ្ងៃ២២វិច្ឆិកាខាងមុខ។ លោក ណាដេរ៉េវ សាណូ ជាតំណាងហ្វីលីពីនដែលបានចូលរួមសន្និសីទអង្គការសហប្រជាជាតិស្តីពីការប្រែប្រួលអាកាសធាតុ បានលើកឡើងថា គឺដោយសារតែការឡើងកំដៅសីតុណ្ហភាពនៃភពផែនដីនេះហើយ បានជាហ្វីលីពីនរងគ្រោះដោយព្យុះហៃយ៉ាន ដល់ថ្នាក់នេះ។
លោកសាណូ បានធ្វើកូដកម្មបង្អត់អាហារខ្លួនឯង ដើម្បីតវ៉ានឹងភាពអសកម្មរបស់បណ្តាប្រទេសនានា ដែលមិនព្រមចាត់វិធានការជាក់ស្តែងអ្វីទាំងអស់ ដើម្បីទប់ទល់ការប្រែប្រួលអាកាសធាតុនេះ។
ក្នុងកិច្ចប្រជុំស្តីពីការប្រែប្រួលអាកាសធាតុនេះ លោក សាណូ និងតំណាងប្រទេសផ្សេងទៀត ក៏បានសុំអោយមានវិធានការជាក់ស្តែង និងមានជាមូលនិធិច្រើនបន្ថែមទៀតជួយដល់ប្រទេសក្រីក្រ។ ព្រោះថា ប្រទេសក្រីក្រនេះហើយដែលរងមហន្តរាយធម្មជាតិច្រើនជាងគេ។
ដូច្នេះ កិច្ចប្រជុំអង្គការសហប្រជាជាតិនៅវ៉ាសូវីនេះ ត្រូវតែរកដំណោះស្រាយអោយបានឆាប់រហ័ស ព្រោះថា អ្នកដែលរងគ្រោះមុនគេនោះ គឺកូនចៅជំនាន់ក្រោយយើងនេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ