សហភាពអឺរ៉ុបជំរុញអោយអង់គ្លេសឆាប់ធ្វើនិតិវិធីចេញពីអឺរ៉ុប
បន្ទាប់ពីពលរដ្ឋអង់គ្លេសបោះឆ្នោតអោយអង់គ្លេសដកខ្លួនពីអឺរ៉ុបមក មេដឹកនាំស្ថាប័នអឺរ៉ុបធំៗបានជំរុញអោយអង់គ្លេសប្រញាប់ប្រញាល់ធ្វើនិតិវិធីចរចាដកខ្លួនពីអឺរ៉ុបអោយបានឆាប់ៗ។ អឺរ៉ុបសោកស្តាយដែលអង់គ្លេសសម្រេចដើរចេញ តែគូសបញ្ជាក់ថា គោរពតាមការសម្រេចរបស់ពលរដ្ឋអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
ក្រោយការប្រកាសលទ្ធផលប្រជាមតិ នៅអង់គ្លេស នៅថ្ងៃសុក្រ២៤មិថុនានេះ ប្រធានស្ថាប័នអឺរ៉ុបធំៗ ដូចជាប្រធានក្រុមប្រឹក្សាអឺរ៉ុប លោក ដូណាល់ ថាស្ក ប្រធានគណៈកម្មការអឺរ៉ុប លោកហ្សង់ក្លូត យ៉ុងកឺ ប្រធានសភាអឺរ៉ុបលោកម៉ាទីន ស្ហ៊ូល និងប្រធានសហភាពអឺរ៉ុប លោកម៉ាក រូត មិនបង្អង់យូរទេ បាននាំគ្នាជំរុញអង់គ្លេសអោយប្រញាប់រៀបចំនិតិវិធីចាកចេញអោយឆាប់ៗតែម្តង។
សហភាពអឺរ៉ុបមិនចង់អោយអង់គ្លេសពន្យារពេលយូរ ព្រោះខ្លាចមានភាពមិនច្បាស់លាស់ណាមួយកើតឡើង។ មូលហេតុ គឹថា នាយករដ្ឋមន្ត្រីអង់គ្លេស ដាវីត កាមេរ៉ន ដែលបានគាំទ្រអោយអឺរ៉ុបបន្តស្ថិតនៅសហភាពអឺរ៉ុប បានប្រកាសលាលែងពីតំណែងជានាយករដ្ឋមន្ត្រី ចាប់ពីខែតុលាទៅ។ ទំរាំមេដឹកនាំអង់គ្លេសថ្មី ចូលកាន់កាប់អំណាចបន្តពីលោកកាមេរ៉ន ដើម្បីរៀបចំនិតិវធីចាកចេញពីអឺរ៉ុប គឺអឺរ៉ុបត្រូវចាំរហូតដល់ខែតុលា។ ការចរចាពីនិតិវិធីនេះទៀតសោត ក៏អាចត្រូវចំណាយពេលលើសពី២ឆ្នាំដែរ។
ដោយឡែក អង់គ្លេសនៅតែជាសមាជិកអឺរ៉ុបនៅឡើយ រហូតដល់និតិវិធីចរចាធ្វើចប់សព្វគ្រប់ ទើបអង់គ្លេសអស់ឈ្មោះជាសមាជិកអឺរ៉ុប។
មើលទៅ មេដឹកនាំស្ថាប័នអឺរ៉ុបចង់ប្រាប់ទាំងពលរដ្ឋអង់គ្លេស ទាំងក្រុមប្រឆាំងនយោបាយអឺរ៉ុបថា បើពួកគេសម្រេចចាកចេញពីអឺរ៉ុបហើយ ពួកគេមិនត្រូវរួញរាទេ នាំតែរញ៉េរញ៉ៃវែងឆ្ងាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ