អង់គ្លេសប្រាប់ឲ្យពលរដ្ឋត្រៀមខ្លួន បើគ្មានកិច្ចព្រមព្រៀងពាណិជ្ជកម្មសេរី ជាមួយសហភាពអឺរ៉ុប
ថ្ងៃព្រហស្បតិ៍ ទី២៣សីហា រដ្ឋាភិបាលអង់គ្លេស បានប្រកាសឯកសារគោលការណ៍ចំនួន២៥ច្បាប់ ប្រាប់ពលរដ្ឋរបស់ខ្លួន ពីករណីត្រូវអនុវត្តនិងត្រៀមខ្លួនទុក នៅក្នុងករណីប្រសិនបើអង់គ្លេសដកខ្លួនចេញពីសហភាពអឺរ៉ុបភ្លាម ហើយនិងគ្មានកិច្ចព្រមព្រៀងពាណិជ្ជកម្មសេរី ជាមួយគ្នាទេ។ គោលការណ៍ណែនាំទាំង២៥នេះ គឺផ្អែកមួយនៃគោលការណ៍បច្ចេកទេសទាំង៨០ឯកសារ ដែលអង់គ្លេសត្រូវផ្សាយជាបន្តបន្ទាប់ រហូតដល់ដាច់ខែកញ្ញា សម្រាប់ជូនដំណឹងដល់ប្រជាជនរបស់ខ្លួន។
ចុះផ្សាយនៅថ្ងៃ៖
គោលការណ៍ណែនាំនេះ ចេញដោយរដ្ឋមន្ត្រីអង់គ្លេសទទួលបន្ទុកកិច្ចការចរចាជាមួយសហភាពអឺរ៉ុប ដែលមានគោលដៅបំភ្លឺដល់ពលរដ្ឋអង់គ្លេស ក្រុមហ៊ុនរកស៊ីឯកជន និងអ្នកមានសញ្ជាតិអង់គ្លេស ដែលកំពុងរស់នៅ និងធ្វើការនៅទឹកដីសហភាពអឺរ៉ុប។ ទី១ត្រូវដឹងច្បាស់ថា ក្រោយការដើរចេញជាផ្លូវរបស់អង់គ្លេស នៅឆ្នាំក្រោយនេះ រាល់ការប្រើប្រាស់កាត់គណនីធនាគារ នឹងត្រូវចំណាយថ្លៃច្រើនជាងមុន។
រឿងឯកសារពន្ធគយ ច្បាស់ជានឹងច្រើនក្រាសក្រែល ដែលចាំបាច់អាជ្ញាធរគយ ត្រូវប្រើពេលច្រើន សម្រាប់ត្រួតពិនិត្យ ឆែកឆេរនៅតាមព្រំដែន។ ឯការទិញទំនិញពីក្រៅប្រទេសតាមរយៈអ៊ីនធឺនែត ត្រូវស៊ីពេលយូរជាងមុន ហើយទំនិញនឹងយឺតយ៉ាវជាងមុន ទម្រាំបានបញ្ចូនដល់អ្នកបញ្ជាទិញ។ ហេតុដូច្នេះហើយ ទើបរដ្ឋមន្ត្រីអង់គ្លេសទទួលបន្ទុកកិច្ចការចាកចេញពីសហភាពអឺរ៉ុប បានដាស់តឿនដល់ផ្នែករកស៊ីឯកជន និងផ្នែកហិរញ្ញវត្ថុ ត្រូវត្រៀមខ្លួនឲ្យហើយ។ ម្យ៉ាង ផ្នែកធនគារអង់គ្លេស ក៏ត្រូវបង្កើតស្ថាប័នាសាខារបស់ខ្លួន ឬក៏ត្រូវរកដៃគូនៅអឺរ៉ុបឲ្យហើយ។
ក៏ប៉ុន្តែ ផ្នែកចំណីអាហារ និងថ្នាំពេទ្យ អង់គ្លេសនៅរក្សាការនាំចូល ដោយមានត្រួតពិនិត្យខ្លះ តែមិនតឹងតែងពេកទេ។ ហើយ អង់គ្លេស នៅតែបន្តជួយផ្នែកមនុស្សធម៌មួយចំនួន ជាមួយនឹងគម្រោងមនុស្សធម៌របស់សហភាពអឺរ៉ុប។
ជារួម កិច្ចការចរចាគ្នារវាងសហភាពអឺរ៉ុបនិងអង់គ្លេស គឺសម្រេចបានស្ទើរតែ៨០ភាគរយហើយ នៅឡើយតែ រឿងកិច្ចព្រមព្រៀងពាណិជ្ជកម្មសេរី តែប៉ុណ្ណោះ ដែលមានភាពចម្រូងចម្រាស់ខ្លាំងជាងគេ។ ជាហេតុអាចឲ្យគេគិតថា អង់គ្លេស អាចនឹងដកខ្លួនចេញដាច់សហភាពអឺរ៉ុប ដោយគ្មានកិច្ចព្រមព្រៀងពាណិជ្ជកម្មសេរី ផងក៏មិនដឹង។ ទោះយ៉ាងណាក្តី រដ្ឋមន្ត្រីអង់គ្លេសទទួលបន្ទុកកិច្ចការចរចា សង្ឃឹមថានឹងមានការព្រមព្រៀមសមស្របណាមួយសម្រាប់ភាគីទាំងពីរ។
សូមជ្រាបថា នៅឆ្នាំ២០១៦ អង់គ្លេស បានបោះឆ្នោតប្រជាមតិចាកចេញពីសហភាពអឺរ៉ុប។ ការចរចាចេះតែបន្តមានរហូតមក។ អង់គ្លេសនឹងដើរចេញជាផ្លូវការតែម្តង នៅចុងខែមីនា ឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ