អ៊ុយក្រែនបានចាប់ផ្តើមបាញ់សាកល្បងមីស៊ីលខ្លួននៅក្បែរទឹកដីគ្រីមេ ដែលបង្កយ៉ាងខ្លាំងកំហឹងម៉ូស្គូ
ថ្ងៃព្រហស្បត៏ម្សិលមិញ សម្រាប់រយៈពេលពីរថ្ងៃ អ៊ុយក្រែនបានធ្វើប្រតិបត្តិការបាញ់សាកល្បងមីស៊ីលប្លែកៗនៅក្បែរទឹកដីគ្រីមេដែលញ៉ាំងឲ្យម៉ូស្គូផ្ទុះឆេះជាកំហឹង ទាល់តែបានពង្រាយទៅហើយនាវាចម្បាំងខ្លួន ក្នុងលំហសមុទ្រខ្មៅ ជាប់នឹងទាបកោះនេះ សម្រាប់បាញ់កំទេចមីស៊ីលទាំងនោះបើវាពាំនាំជាគ្រោះថ្នាក់ដល់រុស្ស៊ី។ ទាបកោះគ្រីមេក្នុងឆ្នាំ២០១៤ ត្រូវបានរុស្ស៊ីបញ្ចូលមកជាដែនដីខ្លួន ទាំងផ្តាច់វាចេញពីរដ្ឋអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ការដែលអ៊ុយក្រែននាំអាទិបាញ់សាកល្បងមីស៊ីលនេះ គឺរឹតតែបន្តឹងថែមទៀតភាពតានតឹងជាមូយរុស្ស៊ី ខណៈដែលការពិភាក្សាចរចាគ្នា រវាងប្រទេសទាំងពីរ ដោយមានបារាំងនិងអាល្លឺម៉ង់ជាសាក្សី ហាក់បីធ្លាក់ក្នុងភាពទ័លច្រកទៅហើយ។ នៅមិនទាន់រកឃើញដំណោះស្រាយអ្វីណាឡើយ ទាំងសម្រាប់វិបត្តិនយោបាយបង្កឡើងដោយការវត្តមានប្រដាប់អាវុធ នៃពួកឧទ្ទាមផ្តាច់ទឹកដីរុស្សីនិយម នៅតំបន់ខាងកើតអ៊ុយក្រែន តាំងពីឆ្នាំ២០១៤មក។
“ការបាញ់សាកល្បងនេះ ធ្វើឡើងគឺដោយស្របនឹងច្បាប់អន្តរជាតិ“សេចក្តីនេះថ្លែងតាមកាណាល់ទូរទស្សន៍១១២ ដោយនាយទាហានអ៊ុយក្រែនម្នាក់ លោកVladimir Krizanovsky។
គាត់លំអិតថា ការធ្វើតេស្តបាញ់សាកល្បងនោះប្រព្រឹត្តទៅ នៅចម្ងាយមិនដល់ទាំង៣០គ.ម.ផងពីដែនអាកាសគ្រីមេ។ ដូច្នេះ គ្មាននរណាអាចរិះគន់អ៊ុយក្រែនឡើយ។
ចំណែកក្រសួងការពារជាតិរុស្ស៊ីចោទក្រុងគៀវថាស្វែងរកលេសបង្កឡើងជា“ស្ថានការណ៍នាំឲ្យក្នក់ក្នាញ់មួម៉ៅ”ម៉្លោះហើយបានជាម៉ូស្គូដាក់ឲ្យប្រចាំការនៅគ្រីមេ គឺប្រព័ន្ធការពារដែនអាកាស ទាំងនៅលើដីផង ទាំងលើផ្ទៃទឹកសមុទ្រផង សម្រាប់គ្រាអាសន្ន នេះបើតាមការចុះផ្សាយនៃមធ្យោបាយឃោសនាមហាជនរុស្ស៊ី។ តាមទីភ្នាក់ងារពត៌មាន RIA Novosti ដែលយោងទៅលើប្រភពយោធា នាវាចម្បាំងរុស្ស៊ីផងទាំងឡាយត្រូវបានដាក់ឲ្យប្រុងជើងព្រួលទៅហើយ ក្នុងលំហសមុទ្រ នៅប៉ែកខាងលិចពីទាបកោះគ្រីមេ។ ក្នុងករណីអាសន្នកើតឡើង ដោយមកពីអ៊ុយក្រែនបាញ់សាកល្បងមីស៊ីលខ្លួន ប្រព័ន្ធការពារដែនអាកាសដែលប្រចាំការលើដី បូកផ្សំជាមួយជាមួយនាវាចម្បាំងរុស្ស៊ីទាំងនោះ នឹងបង្កើតឡើងជាខែលមិនអាចជ្រៀតចូលបានឡើយដោយមីស៊ីលខ្មាំង។
ជាការកត់សម្គាល់ អ៊ុយក្រែននិងសហគមន៍អន្តរជាតិជាទូទៅ មិនទទួលស្គាល់ទេ ការភ្ជាប់យកទឹកដីគ្រីមេរបស់អ៊ុយក្រែនដោយរុស្ស៊ី ក្នុងឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ