លោកហោ ណាំហុង៖ UN អាចនឹងរកផែនទីកម្ពុជាមិនទាន់ឃើញ!
ផែនទីដែលលោកនាយករដ្ឋមន្ត្រីហ៊ុន សែន បានស្នើសុំខ្ចីពីអង្គការសហប្រជាតិ ដើម្បីយកមកផ្ទៀងផ្ទាត់ជាមួយនិងផែនទី ដែលប្រើក្នុងការកំណត់បង្កោលព្រំដែនកម្ពុជា-វៀតណាម នៅមិនទាន់រកឃើញនៅឡើយនោះទេ។ នេះបើតាមការបញ្ជាក់របស់លោកហោ ណាំហុង រដ្ឋមន្ត្រីការបរទេសកម្ពុជា នៅរសៀលថ្ងៃទី ១៥ កក្កដានេះ នៅឯទីស្តីការក្រសួង ក្នុងរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
លោកហោ ណាំហុង រដ្ឋមន្ត្រីក្រសួងការបរទេសកម្ពុជា បានលើកឡើងថា អង្គការសហប្រជាតិមិនទាន់ឆ្លើយតមនឹងការស្នើសុំផែនទីយកមកផ្ទៀងផ្ទាត់នោះទេ ហើយថាតាមប្រភពមិនផ្លូវការផែនទីកម្ពុជា ក៏នៅមិនទាន់រកឃើញផងដែរ។
សំលេងលោកហោ ណាំហុង
ការស្នើសុំផែនទីប្រទេសកម្ពុជានៅពេលនេះ ត្រូវបានធ្វើឡើងបន្ទាប់ពីកម្ពុជាមានបញ្ហាព្រំដែនយ៉ាងតានតឹងជាមួយនិងប្រទេសវៀតណាម នៅតាមបណ្តាខេត្តជាប់ព្រំដែនមួយចំនួន ដូចជាការជីកស្រះទឹកនៅក្នុងខេត្តរតនគិរី ការធ្វើផ្លូវក្នុងខេត្តស្វាយរៀង និងការសាងសង់ប៉ុស្តិ៍យោធាក្នុងស្រុកកោះធំ ខេត្តកណ្តាលជាដើម។
បន្ទាប់ពីកើតមានបញ្ហាអស់ទាំងនេះមកកម្ពុជាបានធ្វើកំណត់ទូត និងកោះប្រជុំជាច្រើនលើកច្រើនសារ ជាមួយនិងភាគីវៀតណាម ប៉ុន្តែវៀតណាមមិនបានចេញកំណត់ទូតឆ្លើយតបនិងកម្ពុជាវិញនោះទេ ដោយគ្រាន់តែសន្យាថានឹងបញ្ចប់រាល់សកម្មភាពបំពានអស់ទាំងនោះ។
សូមរំលឹកជូនថា កាលពីដើមខែកក្កដាកន្លងទៅនេះ លោកហ៊ុន សែន បានស្នើសុំខ្ចីផែនទីកម្ពុជា ដែលដាក់តម្តល់នៅអង្កការសហប្រជាជាតិកាលពីឆ្នាំ ១៩៦៤ ដោយអតីតព្រះមហាក្សត្រ នរោត្តម សីហនុ ដែលជាផែនទី Bonne ខ្នាត ១/១០០.០០០ ពីលោកអគ្គលេខាធិការអង្គការសហប្រជាជាតិបាន គីមូន យកមកផ្ទៀងផ្ទាត់ជាមួយនិងផែនទី ដែលប្រើក្នុងការកំណត់បង្កោលព្រំដែនកម្ពុជា-វៀតណាម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ