ថ្ងៃផ្តាច់ព្រ័ត្រនៃការសាងគ្រឹះ “កិច្ចព្រមព្រៀង” ស្តីពីអាកាសធាតុ
សន្និសីទអង្គការសហប្រជាជាតិ ស្តីពីអាកាសធាតុ នៅទីក្រុងវ៉ាសូវី ត្រូវបិទបញ្ចប់នៅល្ងាចថ្ងៃសុក្រនេះ បន្ទាប់ពីក្រុមអ្នកចរចា និងតំណាងប្រទេសជាសមាជិកទាំង១៩៥ បានជួបពិភាក្សាគ្នាអស់រយៈពេល១៥ថ្ងៃ។ រដ្ឋមន្ត្រីប្រទេសនីមួយៗបានមកចូលរួមប្រជុំក្នុងថ្ងៃចុងក្រោយជាបន្តបន្ទាប់ តាំងពីពុធនិងព្រហស្បតិ៍មក ប៉ុន្តែក្រុមអង្គការក្រៅរដ្ឋាភិបាល ONG បានធ្វើពហិការដើរចេញ ដើម្បីបរិហារភាពយឺតយាវ និងភាពស្មុគស្មាញនៃកិច្ចចរចា។
ចុះផ្សាយនៅថ្ងៃ៖
ស្តាប់ - ០២:១៨
បន្ទាប់ពីក្រុមអង្គការក្រៅរដ្ឋាភិបាលបានកន្ទ្រាក់ទ្វារដើរចេញពីតុប្រជុំ នៅរសៀលថ្ងៃព្រហស្បតិ៍ម្សិលមិញ ក្រុមអ្នកចរចាបានធ្វើការពេញមួយយប់ ដើម្បីធ្វើយ៉ាងណាឱ្យថ្ងៃសុក្រនេះអាចដំណើរកិច្ចប្រជុំប្រកបដោយលទ្ធផល ពោលគឺមានអត្ថបទជាមូលដ្ឋានគ្រឹះនៃកិច្ចព្រមព្រៀងបឋម ក្រោយសន្និសីទ១៥ថ្ងៃ។ អត្ថបទគ្រឹះ ដែលនឹងត្រូវលាតត្រដាងធ្វើជាផែនទីចង្អុលផ្លូវ សម្រាប់ឱ្យប្រទេសជាសមាជិកទាំង១៩៥ សម្រេចរកឱ្យឃើញនៅឆ្នាំ២០១៥ នូវកិច្ចព្រមព្រៀងកំរិតការឡើងកម្តៅនៃភពផែនដី។ ប៉ុន្តែគេត្រូវពុះជ្រែកឧបសគ្គដ៏ច្រើនសន្ធឹកសន្ធាប់ទៀត។
បញ្ហាហិរញ្ញវត្ថុ ៖ ប្រទេសកំពុងអភិវឌ្ឍន៍ ទទួលបានថវិកាតែ ១០០លានដុល្លារ ពីប្រទេសនៅអឺរ៉ុប ដើម្បីទៅសម្របសម្រួលប្រឈមទប់ផលវិបាកបង្កឡើងដោយប្តូរផ្លាស់អាកាសធាតុ។ មិនមែន១ពាន់លានដុល្លារប្រចាំឆ្នាំ ដូចដែលបានសន្យាកាលពីឆ្នាំ២០០៩ទេ។
ដើម្បីឱ្យសន្និសីទក្រុងវ៉ាសូវី ជាអ្នកផ្តល់សន្ទុះដល់កិច្ចព្រមព្រៀងឆ្នាំ២០១៥ ត្រូវតែប្រទេសទាំងអស់សន្យាកាត់បន្ថយការបញ្ចេញឧស្ម័នផ្ទះកញ្ចក់។ គ្រប់គ្នាបានព្រមគោរពជាគោលការណ៍តែគ្មាន ផ្តល់ពេលវេលាឬរបៀបកាត់បន្ថយសោះ។ ឧបសគ្គដែលទម្លាយមិនចេញជាប្រវត្តិសាស្ត្រនោះគឺ ការចោទប្រកាន់ដាក់គ្នាទៅវិញទៅមក រវាងប្រទេសអភិវឌ្ឍន៍ និងប្រទេសកំពុងលូតលាស់ខ្លាំង។ ក្រុមប្រទេសប្រេស៊ីល អាហ្វ្រិកខាងត្បូង ឥណ្ឌានិងចិន បានទន្ទេញដដែលមិនព្រមទទួលយកកិច្ចព្រមព្រៀងចុះថ្លៃ ដែលប្រទេសមហាអំណាចមានឧស្សាហកម្មជឿនលឿនខ្លាំងចង់តែផ្តល់មេរៀនដល់អ្នកថ្មី តែខ្លួនឯងមិនទាំងអនុវត្តបានផង។
ចំណុចខ្ទាស់ខ្លាំងមួយទៀត គឺការផ្តល់ហិរញ្ញប្បទានដល់ប្រទេសក្រីក្រ ដែលទាមទារឱ្យមានយន្តការហិរញ្ញវត្ថុសម្រាប់ប្រឈមនឹងគ្រោះធម្មជាតិ ប៉ុន្តែប្រទេសអ្នកមានជាពិសេសសហរដ្ឋអាមេរិកបានបដិសេធយ៉ាងដាច់ខាត។
នេះជាអ្វីដែលសន្និសីទត្រូវសម្រេចឱ្យបាននៅចុងក្រោយ។ ហើយការបិទបញ្ចប់អាចនឹងពន្យារពេលដល់យប់ជ្រៅ ឬរហូតដល់ថ្ងៃសៅរ៍នេះទៀតក៏ថាបាន។ អ្វីជាលទ្ធផលជាក់ស្តែង គឺជាផ្លូវការបារាំងនឹងក្លាយជាម្ចាស់ផ្ទះរៀបចំសន្និសីទឆ្នាំ២០១៥ ដែលមហិច្ឆតារកឱ្យឃើញកិច្ចព្រមព្រៀងទប់ស្កាត់ការឡើងកម្តៅនៃភពផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ