អ.ស.បចង់ឲ្យតុលាការក្រុងឡាអេស៊ើបអង្កេតលើការរំលោភសិទ្ធិមនុស្សនៅកូរ៉េខាងជើង
នៅថ្ងៃចន្ទនេះ ក្រុមស៊ើបអង្កេតរបស់អ.ស.ប បានចេញផ្សាយលទ្ធផលនៃការស៊ើបអង្កេតលើករណីរំលោភសិទ្ធិមនុស្ស នៅក្នុងប្រទេសកូរ៉េខាងជើង ដោយបានធ្វើការសន្និដ្ឋានថា មេដឹកនាំកូរ៉េខាងជើងគួរតែត្រូវប្រឈមមុខនឹងការជំនុំជម្រះ នៅក្នុងតុលាការព្រហ្មទណ្ឌអន្តរជាតិ ជុំវិញឧក្រិដ្ឋកម្មប្រឆាំងមនុស្សជាតិ ដែលប្រព្រឹត្តទៅលើប្រជាជនខ្លួនឯង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
“ការរំលោភសិទ្ធិមនុស្សធ្ងន់ធ្ងរ ទូលំទូលាយ និងមានលក្ខណៈជាប្រព័ន្ធ បាន និងកំពុងត្រូវបានប្រព្រឹត្តដោយស្ថាប័ន និងមន្រ្តីកូរ៉េខាងជើង” នេះគឺជាសេចក្តីសន្និដ្ឋាន របស់គណៈកម្មការស៊ើបអង្កេតលើកូរ៉េខាងជើង ដែលត្រូវបានបង្កើតឡើង ដោយក្រុមប្រឹក្សាសិទ្ធិមនុស្សអ.ស.ប កាលពីខែមីនា ឆ្នាំ២០១៣កន្លងទៅ។
នៅក្នុងដំណើរការស៊ើបអង្កេតក្នុងរយៈពេលជិតមួយឆ្នាំកន្លងទៅនេះ ក្រុមស៊ើបអង្កេតអ.ស.ប ដែលអាជ្ញាធរក្រុងព្យុងយ៉ាងមិនអនុញ្ញាតឲ្យចូលទៅស៊ើបអង្កេតដល់ក្នុងប្រទេសកូរ៉េខាងជើង បានប្រមែរប្រមូលភស្តុតាង តាមរយៈការសាកសួរជនភៀសខ្លួនកូរ៉េខាងជើង ដែលកំពុងរស់នៅក្នុងប្រទេសកូរ៉េខាងត្បូង និងជប៉ុន។
គណៈកម្មការស៊ើបអង្កេតបានបង្ហាញនូវលទ្ធផលស៊ើបអង្កេតរបស់ខ្លួន ក្នុងរបាយការណ៍មួយ ចេញផ្សាយ នៅថ្ងៃចន្ទ ដោយបានសន្និដ្ឋានថា មានករណីរំលោភសិទ្ធិមនុស្សជាច្រើន នៅកូរ៉េខាងជើង ដែលគេអាចរាប់បញ្ចូលជាឧក្រិដ្ឋកម្មប្រឆាំងមនុស្សជាតិ រួមមាន ឃាតកម្ម ការសម្លាប់ផ្តាច់ពូជ ការធ្វើទារុណកម្ម ការធ្វើទុក្ខបុកម្នេញដោយហេតុផលនយោបាយ សាសនា ឬជាតិសាសន៍ ការបង្អត់អាហារ ព្រមទាំងទង្វើអមនុស្សធម៌ជាច្រើនផ្សេងទៀត។
កូរ៉េខាងជើងវិញ តាមរយៈស្ថានទូត ប្រចាំនៅទីក្រុងហ្សឺណែវ បានបដិសេធយ៉ាងដាច់អហង្ការនូវអ្វី ដែលមានចែងក្នុងរបាយការណ៍ស៊ើបអង្កេតនេះ។
នៅក្នុងរបាយការណ៍នេះ គណៈកម្មការស៊ើបអង្កេតអ.ស.បក៏បានលើកឡើងជាអានុសាសន៍ផងដែរថា ក្រុមប្រឹក្សាសន្តិសុខអ.ស.ប គួរតែចេញសេចក្តីសម្រេចមួយបញ្ជូនសំណុំរឿងកូរ៉េខាងជើងទៅតុលាការព្រហ្មទណ្ឌអន្តរជាតិក្រុងឡាអេ ឬក៏បង្កើតតុលាការអន្តរជាតិពិសេសមួយ ដើម្បីស៊ើបអង្កេត និងជំនុំជម្រះលើករណីរំលោភសិទ្ធិមនុស្ស នៅកូរ៉េខាងជើង។
ក៏ប៉ុន្តែ មន្រ្តីការទូតអ.ស.បម្នាក់បានប្រាប់ទីភ្នាក់ងារព័ត៌មានរ៉យទ័រថា ការបញ្ជូនសំណុំរឿងកូរ៉េខាងជើងទៅកាន់តុលាការព្រហ្មទណ្ឌអន្តរជាតិ គឺជារឿងដែលពិបាកនឹងធ្វើទៅរួច ដោយសារតែចិន ដែលជាសម្ព័ន្ធមិត្តរបស់កូរ៉េខាងជើង ជាសមាជិកអចិន្រ្តៃយ៍ ដែលមានសិទ្ធិវ៉េតូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ