អតីតនាយករដ្ឋមន្រ្តីព័រទុយហ្កាល់មានសំឡេងនាំមុខគេក្នុងការស្នងតំណែងលោកបានគីមូន
អតីតនាយករដ្ឋមន្រ្តីព័រទុយហ្កាល់ គឺជាបេក្ខជននាំមុខគេ នៅក្នុងការប្រកួតប្រជែងដណ្តើមតំណែងជាអគ្គលេខាធិការអ.ស.ប ជំនួសលោកបាន គីមូន។ នេះគឺជាលទ្ធផលនៃការបោះឆ្នោត នៅក្នុងក្រុមប្រឹក្សាសន្តិសុខអ.ស.ប កាលពីថ្ងៃព្រហស្បតិ៍ម្សិលមិញ។ ក៏ប៉ុន្តែ នេះគ្រាន់តែជាការបោះឆ្នោតជំហានដំបូងមួយប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
បេក្ខជនមាន ១២នាក់ សម្រាប់កៅអីមួយ គឺកៅអីអគ្គលេខាធិការអ.ស.ប របស់លោកបាន គីមូន ដែលត្រូវផុតអាណត្តិនៅចុងឆ្នាំនេះ។
នៅក្រោយការបោះឆ្នោតដែលរៀបចំធ្វើដោយសម្ងាត់ នៅក្នុងក្រុមប្រឹក្សាសន្តិសុខ កាលពីថ្ងៃព្រហស្បតិ៍ម្សិលមិញនេះ លោកអាន់តូនីញ៉ូ ហ្គូតេរ៉េស (Antonio Guterres) អតីតនាយករដ្ឋមន្រ្តីព័រទុយហ្កាល់ គឺជាបេក្ខជនដែលលេចធ្លោជាងគេ ដោយទទួលបានការគាំទ្រ ១២សំឡេង ក្នុងចំណោមសមាជិកក្រុមប្រឹក្សាសន្តិសុខទាំង ១៥ប្រទេស។ នៅលំដាប់ទី២ គឺអតីតប្រធានាធិបតីស្លូវេនី (Danilo Turk)។ ចំណែកឯលោកស្រីអ៊ីរីវ៉ា បូកូវ៉ា (Irina Bokova) នាយិកាអង្គការយូណេស្កូ ស្ថិតនៅលំដាប់ទី៣។
គួរបញ្ជាក់ថា ការបោះឆ្នោតនៅក្នុងក្រុមប្រឹក្សាសន្តិសុខ កាលពីថ្ងៃព្រហស្បតិ៍ម្សិលមិញនេះ គ្រាន់តែជាការបោះឆ្នោតក្រៅផ្លូវការមួយតែប៉ុណ្ណោះ។ គោលដៅ គឺចង់ជំរុញឲ្យបេក្ខជនណាដែលមានសំឡេងគាំទ្រតិចតួចជាងគេដកខ្លួនចេញពីការប្រកួតប្រជែង ដើម្បីជម្រុះបេក្ខជនឲ្យមកនៅត្រឹមចំនួនសមរម្យមួយ មុននឹងឈានទៅធ្វើការជ្រើសរើសជាចុងក្រោយ។
ដូច្នេះ អ្នកដែលទទួលបានសំឡេងគាំទ្រច្រើនជាងគេ នៅក្នុងការបោះឆ្នោតនេះ មិនមែនប្រាកដថានឹងត្រូវបានជ្រើសរើសឲ្យឡើងមកជំនួសលោកបាន គីមូននោះទេ។ ក្រុមប្រឹក្សាសន្តិសុខគ្រោងនឹងរៀបចំការបោះឆ្នោតសាជាថ្មីម្តងទៀត នៅសប្តាហ៍ក្រោយ ដើម្បីសម្រាំងបេក្ខជនបន្ថែមទៀត មុននឹងឈានទៅធ្វើការអនុម័តជ្រើសរើសបេក្ខជនផ្លូវការមួយ រួចហើយបញ្ជូនទៅឲ្យមហាសន្និបាតអ.ស.បជាអ្នកបោះឆ្នោតអនុម័តជាចុងក្រោយ នៅក្នុងអំឡុងខែកញ្ញា ឬតុលាខាងមុខនេះ។
នៅក្នុងដំណើរការជ្រើសរើសបេក្ខជនអគ្គលេខាធិការនេះ ក៏ដូចជា នៅក្នុងដំណើរការអនុម័តសេចក្តីសម្រេចផ្សេងទៀតដែរ ប្រទេសជាសមាជិកអចិន្រ្តៃយ៍ទាំង ៥ គឺរួមមាន អាមេរិក រុស្ស៊ី ចិន បារាំង និងអង់គ្លេស មានសិទ្ធិវ៉េតូ។ ដូច្នេះ អ្នកដែលអាចក្លាយជាបេក្ខជនអគ្គលេខាធិការអ.ស.ប ចាំបាច់ត្រូវតែមានការគាំទ្រពីសំឡេងភាគច្រើន ពីក្នុងចំណោមប្រទេសជាសមាជិកទាំង ១៥ ហើយដោយគ្មានសំឡេងប្រឆាំងពីប្រទេសណាមួយ ក្នុងចំណោមសមាជិកអចិន្រ្តៃយ៍ទាំង ៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ