អ្នកអវកាសអន្តរជាតិមួយក្រុមថ្មីទើបបានទៅដល់ស្ថានីយអវកាស SSI
អវកាសយានិកមួយក្រុមថ្មី មានគ្នា៣នាក់ក្នុងនោះ គឺបុរស២នាក់ ជាតិរុស្ស៊ី ជាតិអាមេរិកាំង និងស្ត្រីអ៊ីតាលីតាមរយៈយានអវកាសរុស្ស៊ីធុន Soyouz ដែលកណ្តាលអធ្រាត្រយប់មិញបានត្រូវបង្ហោះចេញពីផែនដីទៅព្រឹកមិញ បានទៅតភ្ជាប់ប្រកបដោយសុវត្ថិភាពជាមួយនឹងស្ថានីយអវកាសអន្តរជាតិហៅកាត់ថា SSI ជាទីដែលគេនឹងស្នាក់នៅធ្វើការស្រាវជ្រាវអំឡុងពេលដល់ ១៦៩ថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
យានអវកាសរុស្ស៊ី ធុន Soyouz នេះ ដូចជាសព្វមួយដងអញ្ចឹងត្រូវបានបង្ហោះចេញពី ព្រលានអវកាសនៅលើដែនដីកាហ្សាក់ស្ថាន ដែលរុស្ស៊ី ជួលប្រើប្រាស់រហូតដល់ឆ្នាំ២០៥០ ដោយបង់ថ្លៃជួលនេះ ឲ្យទៅភាគីកាហ្សាក់ស្ថាន ១១៥លានដុល្លារ ក្នុង១ឆ្នាំៗ។
យានអវកាសនោះ ត្រូវបានបង្ហោះចេញទៅនៅម៉ោង ០១នាទីរំលងអធ្រាត្រចូលថ្ងៃ២៤ វិច្ឆិកានេះ ម៉ោងម៉ូស្គូហើយ ៥ម៉ោង៥០នាទីក្រោយមក វាបានទៅតភ្ជាប់នឹង ស្ថានីយSSI ដែលដើរតួជាមន្ទីរពិសោធន៍ប្រចាំនៅកំពស់ ៤២០គ.ម. ហោះព័ទ្ធជុំវិញផែនដី តាំងពីឆ្នាំ១៩៩៨មក។ ជាការ កត់សម្គាល់ កាលពីមុនៗយានអវកាស Soyouz ត្រូវហោះ ២ថ្ងៃ២យប់ឯណោះទម្រាំរៀបរយល្បឿននិងតារាវិថីនៃការហោះហើររបស់វា ឲ្យបានស៊ីគ្នាជាមួយនឹង ល្បឿននិងតារាវិថីនៃស្ថានីយ SSIដើម្បីអាចតភ្ជាប់គ្នាដោយសុខដុមទៅកើត។
ក្រុមអ្នកអវកាសថ្មី មានគ្នា៣នាក់គឺជាតិរុស្ស៊ីឈ្មោះ Anton Chkaplerov តំណាងឲ្យទីភ្នាក់ងារអវកាសរុស្ស៊ី Roskosmos ,ជាតិអាមេរិកាំង Terry Virts តំណាងឲ្យ ទីភ្នាក់ងារ អវកាសអាមេរិក NASA និងស្ត្រីទី១ក្នុងប្រវត្តិសាស្ត្រអ៊ីតាលី Samantha Critosforetti តំណាងឲ្យទីភ្នាក់ងារអវកាសអឺរ៉ុបពេលចូលទៅក្នុងស្ថានីយ SSI គឺបានត្រូវស្វាគមន៍ ដោយអវកាសយានិក ៣នាក់ផ្សេង ក្នុងនោះមានអ្នកអវកាសជាតិរុស្ស៊ី ជាតិអាមេរិកាំង និងស្ត្រីជាតិរុស្ស៊ីម្នាក់ដែរ ដែលកំពុងស្នាក់នៅធ្វើការនៅទីនោះបាន១ខែហើយ និងដែលត្រូវត្រឡប់មកផែនដីវិញនៅខែមីនាឆ្នាំក្រោយ។
ចំណែកក្រុមថ្មី ត្រូរស្នាក់នៅធ្វើការជិតកន្លះឆ្នាំដែរ គឺ១៦៩ថ្ងៃ ដើម្បីបំពេញការពិសោធន៍ចំនួនរាប់សឹបនិងក៏ត្រូវចេញទៅធ្វើការនៅឯភាគខាងក្រៅតែម្តងរបស់ស្ថានីយ គឺក្នុងលំហល្ហល្ហេវនៃអវកាសចំនួន២លើកទៅផង។ គេនឹងវិលមកផែនដីវិញនៅកណ្តាលខែឧសភាឆ្នាំក្រោយ។
គួរនិយាយថា តែងស្នាក់នៅធ្វើការដោយផ្លាស់វេនគ្នាក្នុងស្ថានីយ SSI គឺអ្នកអវកាសចំនួ៦នាក់ជានិច្ច។ លើកនេះ គេបាននាំទៅជាមួយទាំងចំណីអាហារថ្លៃៗ បែបយ៉ាងពងត្រីCaviar ថ្លៃដូចមាសចំនួន១៥ប្រអប់ទម្ងន់សរុបកន្លះគីឡូក្រាម។
ស្របនឹងគម្រោងដែលមានស្ថានីយអវកាស SSI ដែលបង្កើតឡើងដោយ១៦ប្រទេស ក្នុងតម្លៃ សរុប ១០០.០០០ លានដុល្លារ មានរុស្ស៊ីនិងអាមេរិកជាស្ថាបនិកគោលនឹងដំណើរការ រហូតដល់ឆ្នាំ ២០២៤ ហើយកន្លែងនិមួយៗក្នុងយានអវកាសរុស្ស៊ី ធុន Soyouz ដើម្បីហោះទៅដល់ទីនោះគឺថ្លៃ ៧០លានដុល្លារឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ