ស៊ីម៉ាក់រកឃើញនាវាដឹកគ្រាប់លិចសម័យលន់ នល់ នៅកំពង់ឆ្នាំង
ក្រុមអ្នកដោះមីនរបស់ស៊ីម៉ាក់បានរកឃើញគ្រាប់កាំភ្លើងធុនធ្ងន់ដែលលិចជាមួយនាវាក្នុងសម័យលន់ នល់ ក្នុងទន្លេសាប កាលពីចុងសប្តាហ៍មុន។ គ្រាប់មិនទាន់ផ្ទុះចំនួន៧៦៥គ្រាប់ ត្រូវបានរកឃើញនៅក្នុងភូមិសាស្ត្រខេត្តកំពង់ឆ្នាំង។ នេះជាលើកទីមួយហើយដែលគ្រាប់មិនទាន់ផ្ទុះធុនធ្ងន់ ទ្រង់ទ្រាយធំត្រូវបានរកឃើញនៅក្នុងបាតទន្លេសាប ហើយស៊ីម៉ាក់អះអាងថា អាចនៅមានគ្រាប់មិនទាន់ផ្ទុះជាច្រើនទៀតនៅបាតទន្លេសាបនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
គ្រាប់ធុនធ្ងន់មិនទាន់ផ្ទុះចំនួន៧៦៥គ្រាប់ត្រូវបានក្រុមភ្នាក់ងារដោះមីនស៊ីម៉ាក់រកឃើញនៅបាតទន្លេសាប ក្នុងភូមិសាស្ត្រខេត្តកំពង់ឆ្នាំងកាលពីចុងសប្តាហ៍កន្លងទៅនេះ។ គ្រាប់ទាំងនោះដែលមានទំងន់សរុបជាង៤តោន រួមមាន៖ គ្រាប់ផ្លោងធុន១០៥មម គ្រាប់ត្បាល់៨១មម និង៦០មម។
លោកហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ (CMAC) បានថ្លែងថា ស៊ីម៉ាក់ធ្វើប្រតិបត្តិការនេះយ៉ាងប្រយ័ត្នប្រយែងតាមបច្ចេកទេស។ ហើយករណីនេះ មានលក្ខណៈស្មុគស្មាញដោយសារតែបរិមាណនៃគ្រាប់មិនទាន់ផ្ទុះដែលត្រូវបានរកឃើញនេះ មានទំហំធំ ហើយនៅក្រោមទឹកទៀត។ ទោះយ៉ាងណាក្តី លោកហេង រតនា អះអាងថា នៅមានគ្រាប់មិនទាន់ផ្ទុះច្រើនទៀត អាចកំពុងស្ថិតនៅបាតទន្លេសាបនេះ។
ការរកឃើញគ្រាប់មិនទាន់ផ្ទុះនៅក្នុងនាវាដែលលិចក្នុងសម័យលន់ នល់ បានកើតឡើងពីការផ្តល់ព័ត៌មានពីប្រជាជន និងឯកសារមួយចំនួន ដែលបង្ហាញថា ផ្លូវទឹកក្នុងខេត្តកំពង់ឆ្នាំង គឺជាផ្លូវយុទ្ធសាស្ត្រក្នុងការដឹកជញ្ជូនគ្រាប់ និងសព្វាវុធក្នុងសម័យលន់ នល់ និងសម័យខ្មែរក្រហម។
យោងតាមការបញ្ជាក់របស់អគ្គនាយកស៊ីម៉ាក់ គ្រាប់ផ្លោងមិនទាន់ផ្ទុះដែលទើបតែរកឃើញនេះ នឹងមិនអាចយកទៅប្រើប្រាស់ជាអាវុធបានឡើយ។
ការសម្អាតមីន និងគ្រាប់មិនទាន់ផ្ទុះនៅក្រោមទឹក ដែលជាសំណល់សង្គ្រាមនោះ គឺជាផ្នែកមួយនៃបេសកកម្មរបស់ស៊ីម៉ាក់។ កាលពីឆ្នាំ២០១០កន្លងទៅ ក្រុមភ្នាក់ងារសម្អាតមីនស៊ីម៉ាក់ ធ្លាប់បានធ្វើប្រតិបត្តិការសម្អាតគ្រាប់មិនទាន់ផ្ទុះនៅក្រោមទឹក ដែលត្រូវបានរកឃើញនៅក្នុងបឹងគ្រំ ក្នុងស្រុកល្វាឯម ខេត្តកណ្តាល។ ហើយកាលពីដើមឆ្នាំ២០១១នេះ ប្រតិបត្តិការសម្អាតគ្រាប់មិនទាន់ផ្ទុះនៅក្រោមទឹកក៏ត្រូវបានធ្វើនៅបឹងក្អែក ខេត្តព្រៃវែងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ