ខ្មាន់កាំភ្លើងដែលបាញ់ប្រហារសមាជិកសភាគឺជាសកម្មជនប្រឆាំងលោកដូណាល់ត្រាំ
ខ្មាន់កាំភ្លើងដែលបាញ់ប្រហារលើសមាជិកសភាអាមេរិកមកពីគណបក្សសាធារណរដ្ឋ បណ្តាលឲ្យរបួសជាច្រើននាក់ កាលពីថ្ងៃពុធម្សិលមិញ បានស្លាប់បាត់បង់ជីវិតហើយ ក្រោយពីរងរបួសធ្ងន់ ក្នុងការបាញ់តដៃគ្នាជាមួយប៉ូលិស។ ខ្មាន់កាំភ្លើងនេះត្រូវបានគេស្គាល់អត្តសញ្ញាណថា ជាសកម្មជនប្រឆាំងនឹងលោកដូណាល់ត្រាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ខ្មាន់កាំភ្លើង មានឈ្មោះថា ចេមស៍ ហចគីនសុន (James Hodgkinson) មានវ័យ ៦៦ឆ្នាំ ហើយធ្លាប់ជាសកម្មជនគាំទ្រលោកប៊ែរនី ស៊ែនដ័រ (Bernie Sanders) នៅក្នុងអំឡុងយុទ្ធនាការឃោសនាបោះឆ្នោតប្រជែងជាមួយលោកស្រីគ្លីនតុន ដើម្បីធ្វើជាបេក្ខជនប្រធានាធិបតី សម្រាប់គណបក្សប្រជាធិបតេយ្យ។
នៅលើហ្វេសប៊ុក ចេមស៍ ហចគីនសុន តែងតែបានសរសេររិះគន់ខ្លាំងទៅលើគណបក្សសាធារណរដ្ឋ និងជាពិសេស ទៅលើលោកដូណាល់ត្រាំ។ បើតាមការឲ្យដឹងរបស់សាច់ញាតិ ចាប់តាំងពីក្រោយបោះឆ្នោតមក ចេមស៍ ហចគីនសុន តែងតែបង្ហាញពីការមិនសប្បាយចិត្តចំពោះលទ្ធផលបោះឆ្នោត ក៏ដូចជាចំពោះការដឹកនាំរបស់លោកដូណាល់ត្រាំ។
លោកប៊ែរនី ស៊ែនដ័រវិញ ក្រោយពីដឹងព័ត៌មានថា ខ្មាន់កាំភ្លើងគឺធ្លាប់ជាសកម្មជនក្នុងយុទ្ធនាការឃោសនាបោះឆ្នោតរបស់លោក ក៏បានចេញមុខភ្លាមៗ ធ្វើការបរិហាររិះគន់សកម្មភាពរបស់ខ្មាន់កាំភ្លើង ដោយលោកចាត់ទុកថា ការបាញ់ប្រហារទៅលើសមាជិកសភាមកពីគណបក្សសាធារណរដ្ឋនេះ គឺជាទង្វើដ៏គួរឲ្យស្អប់ខ្ពើម ហើយថា គ្រប់អំពើហិង្សាទាំងអស់ បើទោះបីជានៅក្នុងរូបភាពបែបណាក៏ដោយ គឺសុទ្ធតែជារឿងដែលមិនអាចទទួលយកបាន។
គួរបញ្ជាក់ថា លោកស្ទីវ ស្កាលីស សមាជិកសភាដែលរងរបួសធ្ងន់ធ្ងរ នៅក្នុងការបាញ់ប្រហារកាលពីថ្ងៃពុធម្សិលមិញ ហើយបច្ចុប្បន្នកំពុងស្ថិតក្នុងការសង្រ្គោះបន្ទាន់នៅឡើយ គឺជាឥស្សរជនមកពីគណបក្សសាធារណរដ្ឋ ដែលមានតួនាទីខ្ពស់លំដាប់ទី៣ នៅក្នុងរដ្ឋសភា។ លោកក៏ត្រូវបានគេស្គាល់ផងដែរថាជាអ្នកគាំទ្រយ៉ាងខ្លាំងក្លាបំផុតនូវសិទ្ធិរបស់ពលរដ្ឋស៊ីវិលអាមេរិក ក្នុងការកាន់កាប់អាវុធ។
ទោះជាយ៉ាងណាក៏ដោយ ក្រោយហេតុការណ៍បាញ់ប្រហារ កាលពីម្សិលមិញនេះ គ្រប់អ្នកនយោបាយទាំងអស់ ទាំងលោកដូណាល់ត្រាំ ទាំងសមាជិកសភាមកពីគណបក្សសាធារណរដ្ឋ និងទាំងសមាជិកសភាមកពីគណបក្សប្រជាធិបតេយ្យ រួមទាំងអ្នកប្រឆាំងនឹងសិទ្ធិកាន់កាប់អាវុធផង សុទ្ធតែបាននាំគ្នាបង្ហាញនូវជំហររួបរួមគ្នា ដោយម្នាក់ៗព្យាយាមចៀសវាងមិនលើកឡើងពីអ្វីដែលអាចបង្កឲ្យមានភាពចម្រូងចម្រាស។
ក្នុងពេលជាមួយគ្នា ក៏មានដែរ អ្នកដែលបង្ហាញនូវក្តីព្រួយបារម្ភ ចំពោះបរិយាកាសនយោបាយតានតឹងខ្លាំងនៅអាមេរិកសព្វថ្ងៃ ដែលទាំងអ្នកនយោបាយ និងអ្នកគាំទ្រ នាំគ្នាប្រើពាក្យសម្តីធ្ងន់ៗដាក់គ្នា ជាពិសេស តាមរយៈបណ្តាញសង្គម ដែលអាចជាបច្ច័យនាំឲ្យមានអំពើហិង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ