វិបត្តិថវិកាអាមេរិក ៖ ចិនចង់ប្រែចិត្តពីប្រាក់ដុល្លារ ?
ចុះផ្សាយនៅថ្ងៃ៖
ស្តាប់ - ០៤:០១
ឧទ្យានជាតិ មណ្ឌលទេសចរណ៍ធំៗ ជាច្រើនកន្លែង នៅញូវយ៉ក ដែលបិទ តាំងពីដើមខែតុលាមក បានចាប់ផ្តើមបើកទ្វារទទួលភ្ញៀវទេសចរវិញ ពីថ្ងៃនេះ ដល់ថ្ងៃទី១៧តុលា បន្ទាប់ពីមានការព្រមព្រៀង ជាភាតរៈរវាងរដ្ឋនិងរដ្ឋ ដើម្បី ផ្តល់ហិរញ្ញវត្ថុបណ្តោះអាសន្ន ដល់តំបន់ទេសចរណ៍សំខាន់របស់អាមេរិក។ សភា និងព្រឹទ្ធសភា បានបើកសម័យប្រជុំរបស់ខ្លួន ប៉ុន្តែគ្មានទេកិច្ចព្រមព្រៀង រវាងគណបក្សសាធារណរដ្ឋ និងរដ្ឋាភិបាល ព្រោះសម្រាប់លោក អូបាម៉ា ការបង្កើនកម្រិតប្រាក់បំណុលមួយរយៈខ្លីមិនមែនជាដំណោះស្រាយប្រពៃទេ។ នៅយប់មិញលោកប្រធានាធិបតីអាមេរិក បារ៉ាក់ អូបាម៉ា និងតំណាងដៃគូពិភាក្សាបក្សសាធារណរដ្ឋ បានត្រឹមតែចាប់ផ្តើមនិយាយចូលគ្នាវិញ ប៉ុណ្ណោះ។
ប្រតិកម្មអន្តរជាតិ
វិបត្តិជាប់គាំងផ្នែកថវិកា និងភាពមិនជាក់លាក់របស់អាមេរិកនេះ ស្ថិតនៅលើបបូរមាត់អ្នកដឹកនាំសេដ្ឋកិច្ចពិភពលោក ដែលកំពុងជួបប្រជុំគ្នានៅសប្តាហ៍នេះ នៅទីក្រុងវ៉ាស៊ីនតោន នាឱកាសមហាសន្និបាទមូលនិធិរូបិយវត្ថុអន្តរជាតិ និងធនាគារពិភពលោក។ ក្រុមប្រទេសហ្សេ២០ បានអំពាវនាវឱ្យប្រទេសមហាអំណាចសេដ្ឋកិច្ចទីមួយនៅពិភពលោក អាមេរិកនេះ បញ្ចេញសកម្មភាព ជាបន្ទាន់ វិបត្តិថវិកាជាតិ ព្រោះវាបានធ្វើឱ្យសេដ្ឋកិច្ចពិភពលោកជ្រួលច្របល់។ ព្រោះថាអាមេរិកមានតួនាទីស្នូលក្នុងប្រព័ន្ធហិរញ្ញវត្ថុអន្តរជាតិ ដូច្នេះមិនត្រូវយកភាពល្បីល្បាញនេះមកធ្វើចំណាប់ថ្នូរសម្រាប់ដោះស្រាយបញ្ហាផ្ទៃក្នុងឡើយ។
ចំណែកខាងចិនវិញ តាមរយៈសារព័ត៌មាន China Daily ដែលជាការពាំពាក្យរបស់ប្រមុខដឹកនាំផង បានធ្វើអត្ថាធិប្បាយដោយប្រើពាក្យលេបខាយថា “ឈប់ធ្វើឱ្យនាវាលិច”។ សារព័ត៌មានសេដ្ឋកិច្ចបារាំង និយាយចំៗជាង នៅព្រឹកម្សិលមិញ អាមេរិកជារដ្ឋមហាគ្រោះថា្នក់របស់ពិភពលោក។ ជារួម អ្នកសារព័ត៌មននៅលើលោក យល់ស្របគ្នាជាឯកច្ឆ័ន្ទលើកង្វះភាពទទួលខុសត្រូវរបស់អ្នកនយោបាយអាមេរិក។ ហើយឥទ្ធិពលអាក្រក់នៃវិបត្តិនយោបាយអាមេរិកត្រូវជះសាយភាយដល់សេដ្ឋកិច្ចពិភពលោក ! នេះបើតាមការបរិហាររបស់លោកស្រីអគ្គនាយិកាមូលនិធិរូបិយវត្ថុអន្តរជាតិ
សេដ្ឋកិច្ច និងលុយបំណុល ចិន
ចិនមិនមែនត្រឹមព្រួយអំពីឥទ្ធិពលអាក្រក់របស់វិបត្តិថវិកាអាមេរិកមកលើសេដ្ឋកិច្ចមួយប៉ុណ្ណោះទេ តែចិនក៏ភ័យខ្លាំងដែរចំពោះទឹកប្រាក់ដ៏សន្ធឹកសន្ធាប់របស់ចិនជាប្រាក់ដុល្លារ។ ដូចរចនាបានដឹងស្រាប់ហើយថា ចិនជាប្រទេសម្ចាស់បំណុលរបស់អាមេរិកទីមួយ នាំមុខជប៉ុនទៅទៀត។ ដូច្នេះប្រសិនបើអាមេរិកធ្លាក់ដល់ថ្នាក់អត់លុយ ឬក្ស័យធនបើប្រើពាក្យបច្ចេកទេសមែននោះ នោះនឹងប៉ះពាល់យ៉ាងខ្លាំងតម្លៃនៃជាប្រាក់បំណុលជាដុល្លាររបស់ ចិនដែលមានទំហំដល់ទោប្រមាណ ១៣០០ពាន់លានដុល្លារ។
តាមការពិត មួយភាគបីនៃប្រាក់បំណុលសាធារណៈរបស់អាមេរិក មិនមែនស្ថិតក្នុងដៃជនអាមេរិកទេ។ ស្ទើរគ្រប់ប្រទេសនៅលើពិភពលោក តិចឬច្រើន មានលុយឱ្យ រដ្ឋឬឯកជន អាមេរិកខ្ចី ដោយគិតថាមានសុវត្ថិភាពជាងគេ។ ពិភពលោកទាំងមូលសុខចិត្តឱ្យអាមេរិកខ្ចីលុយ ព្រោះអាមេរិកជាមហាអំណាចសេដ្ឋកិច្ច និងយោធាទីមួយ នៅលើលោក និងក៏ព្រោះតែប្រាក់ដុល្លារ ជារូបិយបណ្ណគោលមិនអាចខ្វះបាន។ ប៉ុន្តែពេលនេះ វិបត្តិថវិកាដែលកំពុងអង្រន់ថ្នាក់ដឹកនាំនយោបាយអាមេរិក កំពុងតែធ្វើឱ្យស្តេចដុល្លារបាត់លំនឹង។
ឥទ្ធិពលនៃប្រាក់ដុល្លារ
ម្សិលម្ង៉ៃ ធនាគារកណ្តាលអឺរ៉ុប និងធនាគារកណ្តាលចិន បានចុះកិច្ចព្រមព្រៀងមួយ បើកផ្លូវឱ្យការខ្ចីប្រាក់ជាអឺរ៉ូ សម្រាប់ចិន និង យ័ន សម្រាប់អឺរ៉ុប នេះជាសារព្រមានអាមេរិកយ៉ាងចាស់ដៃ ! ពេលនេះ ចិននិងអឺរ៉ុប អាចខ្ចីលុយគ្នា ប្រមាណ៤៥លានអឺរ៉ូក្នុងរយៈពេលបីឆ្នាំ ដោយមិនបាច់កាត់កងឆ្លងតាមប្រាក់ដុល្លារ ហើយកិច្ចព្រមព្រៀងនេះនឹងអាចពង្រីកបន្ថែមមានទំហំធំជាងនេះខ្លាំង នាពេលអនាគត។ ម្យ៉ាងវិញទៀត ប្រទេសផ្សេងទៀត ដែលធ្លាប់ប្រើដុល្លារជាគោលក្នុងផ្តោះប្តូរអន្តរជាតិ មានជាអាទិ៍ឥណ្ឌា បានចាប់ផ្តើមដោះដូរបំណុលនៅលើទីផ្សារជាលើកដំបូងជាប្រាក់រូពី តាំងពីដើមរដូវក្តៅមក។ រូពីមិនអាចនៅផ្តួលប្រាក់ដុល្លារបានមែន ប៉ុន្តែយ៉ាងហោចណាស់ក៏អាចកាត់បន្ថយការរំពឹងទាំងស្រុងតែលើប្រាក់ដុល្លារបានច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ