ភេរវកម្ម១១កញ្ញា២០០១៖ អាមេរិក នឹងបង្ហាញឈ្មោះជនសង្ស័យសំខាន់ម្នាក់ទៀត
ថ្ងៃព្រហស្បតិ៍ ទី១២កញ្ញា ប៉ូលីស FBI បានឱ្យដឹងថា ក្រសួងយុត្តិធម៌អាមេរិក នឹងទម្លាយបញ្ចេញឈ្មោះជនជាប់សង្ស័យសំខាន់មួយរូបទៀត ដែលពាក់ព័ន្ធនឹងគម្រោងវាយប្រហារភេរវកម្ម ថ្ងៃទី១១កញ្ញា ឆ្នាំ២០០១។ ជនសង្ស័យដ៏សំខាន់នេះ បានត្រូវគេខំលាក់ការជាសម្ងាត់កម្រិតខ្ពស់ តាំងតែពីយូរមកហើយ។ ក៏ប៉ុន្តែ ក្រុមគ្រួសារជនរងគ្រោះ បានប្តឹងទាមទារឱ្យទម្លាយការពិតនៃការស៊ើបអង្កេត និងត្រូវបញ្ចេញឈ្មោះជនសង្ស័យទាំងឡាយ ដែលជាប់ពាក់ព័ន្ធ ក្នុងការវាយប្រហារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ការវាយប្រហារភេវរកម្ម ដោយបើកយន្តហោះទៅបុកអគារភ្លោះពាណិជ្ជកម្មពិភពលោក World Trade Center នៅថ្ងៃទី១១កញ្ញាឆ្នាំ២០០១ គឺសម្លាប់មនុស្ស អស់ជិត ៣ ០០០ នាក់។ រហូតមកទល់សព្វថ្ងៃ បងប្អូនសាច់ញាតិជនរងគ្រោះ និងអ្នករួចពីស្លាប់ នៅតែស្វះស្វែងរកយុត្តិធម៌ និងទាមទារសំណងជំងឺចិត្ត។ សមាគមជនរងគ្រោះ បានសាទរដោយចាត់ទុកថា «ជាជោគជ័យមួយ» នៅពេលដែលអាជ្ញាធរអាមេរិកសម្រេចទម្លាយឈ្មោះជននៅពីក្រោយវាំងននខ្មៅ។
ក្រសួងយុត្តិធម៌ ឱ្យដឹងថានឹងបញ្ចេញឈ្មោះបុគ្គលម្នាក់នោះមែន ប៉ុន្តែ មិនបានបញ្ជាក់ច្បាស់ថា អាចធ្លាយចេញមក នៅថ្ងៃណាទេ ហើយការលាតបង្ហាញនោះ ក៏នឹងប្រាប់ត្រឹមតែឈ្មោះប៉ុណ្ណោះ ដោយដំណើរដើមទងលម្អិត គឺត្រូវបិទផ្អឹបទុកជាការសម្ងាត់ដដែល។
គួររម្លឹកជូនថា ក្រោយពេលកើតហេតុវាយប្រហារភេវរកម្មដ៏កក្រើកក្រុងញូវយ៉កនោះ នគរបាលអាមេរិក បានចាប់ក្របួចកជនសង្ស័យនិងភេវរជនអាល់កៃដា ចំនួន ១៩នាក់ សុទ្ធតែប្រុសៗ ដែលក្នុងនោះមានម្នាក់ ជាជនជាតិប៉ាគីស្ថាន ហើយ១៥នាក់ទៀត គឺជាអាណិកជនជនជាតិ អារ៉ាប៊ីសាអូឌីត។
នៅក្នុងរបាយការណ៍ការស៊ើបអង្កេតសម្ងាត់ ដែលត្រូវបញ្ចេញនៅឆ្នាំ២០០២ គឺអាចឱ្យគេបានដឹងថា មានមនុស្សពីរនាក់ (Omar al-Bayoumi និង Fahad al-Thumairy) ដែលមន្ត្រីស្និទនឹងស្ថានទូតអារ៉ាប៊ីសាអូឌីតប្រចាំនៅអាមេរិក គឺជាអ្នកជួយជ្រោមជ្រែងពួកកងកុម្មង់ដូ ផ្នែកមធ្យោបាយសម្ភារៈនិងលុយកាក់ ដើម្បីរៀបចំផែនការធ្វើភេរវកម្ម។ ប៉ូលីសFBI ថា មានភស្តុតាងដែលអាចបញ្ជាក់ថា មនុស្សទាំងពីរនាក់នោះ បានទទួលបញ្ជាពីបុគ្គលដ៏សំខាន់ម្នាក់ទៀត ដែលជននេះហើយ គឺជាកម្មវត្ថុនៃការទាមទារឱ្យបើកបង្ហាញ តាំងតែពីយូរមកហើយ។
នៅក្នុងសំណុំរឿងនេះ ក្រុមជនរងគ្រោះ បានបន្ទោសបង្អាប់រដ្ឋាភិបាលអារ៉ាប៊ីសាអូឌីត យ៉ាងចាស់ដៃ ថាមានជាប់ពាក់ព័ន្ធនឹងឧក្រិដ្ឋកម្ម ហើយញាតិមិត្តជនរងគ្រោះក៏បានទាមទារឱ្យអារ៉ាប៊ីសាអូឌីត សងសំណងជាទឹកប្រាក់ខ្ទង់រាប់ពាន់លានដុល្លារ។ ក្នុងសំណុំរឿងនេះដែរ ទើប អាមេរិក បានសម្រេចប្រកាសសង្គ្រាមប្រឆាំងភេវរកម្ម នៅអាហ្វហ្គានីស្ថាន រហូតបាញ់សម្លាប់ មេខ្សែបណ្តាញភេវរកម្មអាល់ដៃកា អូសាម៉ា ប៊ិនឡាដិន នៅឆ្នាំ២០១១។
សូមជម្រាបថា ឈ្មោះភេរវជន មួយចំនួន ដែលត្រូវត្រៀមខ្លួនកាត់ទោស មានដូចជា Mohammed, Walid bin Attash, Ramzi Binalshibh, Ali Abd al-Aziz Ali និង Mustafa al-Hawsawi ។ ពេលនេះ ពួកគេកំពុងជាប់ឃុំក្នុងពន្ធនាគារដ៏សម្ងាត់ នៅលើកោះ កណ្តាលសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ