រដ្ឋមន្ត្រីការពារជាតិអាមេរិកលាលែងចេញពីតំណែង
រដ្ឋមន្ត្រីក្រសួងការពារជាតិអាមេរិក លោក Chuck Hagel បានប្រកាសលាលែងពីតំណែង នៅថ្ងៃចន្ទទី២៤ វិច្ឆិកា ២០១៤នេះ នាឱកាសធ្វើសុន្ទរកថារួមគ្នាជាមួយប្រធានាធិបតីលោក បារ៉ាក់ អូបាម៉ា។ នេះបើតាមអ្នកទទួលខុសត្រូវសេតវិមាន។ ជាការលាលែងចេញពីតំណែងដែលប្រព្រឹត្តទៅតែប៉ុន្មានថ្ងៃក្រោយបរាជ័យរបស់គណបក្សប្រជាធិបតេយ្យក្នុងសម័យបោះឆ្នោតព្រឹទ្ធសភាពាក់កណ្តាលអាណត្តិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
ភាពមិនចុះសម្រុងនឹងគ្នាក្នុងយុទ្ធសាស្ត្រប្រយុទ្ធប្រឆាំងនឹងអង្គការរដ្ឋអ៊ីស្លាមនៅស៊ីរី និងនៅអ៊ីរ៉ាក់ ជាបុព្វហេតុមួយដែលនាំឱ្យរដ្ឋមន្ត្រីក្រសួងការពារជាតិ លោក ឆាក់ ហាហ្គែល លាលែងចេញពីតំណែង។ នេះបើតាមការគូសបញ្ជាក់បន្ថែមក្នុងទំព័រកាសែត New York Times។
មានអាយុ ៦៨ឆ្នាំ ជាអតីតយុទ្ធជនធ្លាប់បានចុះក្នុងសមរភូមិសង្គ្រាមនៅវៀតណាម និងជាអ្នកសាធារណរដ្ឋតែម្នាក់គត់ ដែលមានតួនាទីក្នុងរដ្ឋបាលអូបាម៉ា លោក ឆាកហាហ្គែល នឹងបន្តកាន់តំណែងរហូតដល់ថ្ងៃតែងតាំងរដ្ឋមន្ត្រីការពារជាតិថ្មី។ ការតែងតាំងដែលនឹងប្រព្រឹត្តទៅក្នុងពេលដ៏ឆាប់ៗខាងមុខនេះ។
បើតាមកាសែតញូវយ៉កថែមស៍ដដែល អនុរដ្ឋមន្ត្រីក្រសួងការពារជាតិ លោកស្រី Michele Flouroy លោកJack Reed ព្រឹទ្ធសភាបក្សប្រជាធិបតេយ្យនិងអតីតសមាជិកក្រុមទាហានឆ័ត្រយោងជើងឆើត លោក Ashton Carter ជាឥស្សរជនបីរូបដែលអាចមកកាត់តួនាទីបន្តពីលោកឆាក់ ហាហ្គែល។
លោក ឆាក ហាហ្គែល បានបង្ហាញឆន្ទៈសុំលាលែងចេញពីតំណែង ទៅកាន់លោកអូបាម៉ា តាំងពីខែតុលាមក និងបានពិភាក្សាគ្នាអស់រយៈពេលជាច្រើនសប្តាហ៍ មុននឹងឈានដល់ការសម្រេចចិត្ត និងព្រមព្រៀងពីប្រធានាធិបតីនៅថ្ងៃសុក្រកន្លងទៅ។ នេះបើតាមអ្នកទទួលខុសត្រូវម្នាក់នៅសេតវិមាន ដែលបានរំលឹកបន្ថែមទៀតថា លោក ឆាក់ ហាហ្គែលម៉ឺងម៉ាត់ បានគ្រប់គ្រងវិមានបញ្ចកោណប្រឈមមុខនឹងដំណាក់អន្តរកាលដ៏តានតឹង មានជាអាទិ៍ការដកកងទ័ពអាមេរិកចេញពីអាហ្វហ្កានិស្ថាន និងជម្រើសថវិកាដ៏លំបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ