បេក្ខជនប្រធានាធិបតីអាមេរិកត្រៀមខ្លួនបើកឆាកកម្មវិធីពិភាក្សាទល់មុខគ្នា
ចុះផ្សាយនៅថ្ងៃ៖
ស្តាប់ - ០៤:១៣
នៅសល់តែ៧សប្តាហ៍ទៀតប៉ុណ្ណោះ សហរដ្ឋអាមេរិកនឹងរៀបចំការបោះឆ្នោតប្រធានាធិបតីថ្មីដើម្បីជំនួសលោក បារ៉ាក់ អូបាម៉ា។ បេក្ខជនប្រធានាធិបតីអាមេរិក គឺលោកស្រី Hillary Clinton តំណាងគណបក្សប្រជាធិបតេយ្យ និងលោក Donald Trump មកពីគណបក្សសាធារណរដ្ឋនឹងចូលរួមក្នុងកម្មវិធីពិភាក្សាទល់មុខគ្នាជាលើកដំបូង។ ការជជែកដេញដោលគ្នានេះនឹងប្រព្រឹត្តទៅនាថ្ងៃច័ន្ទ ទី២៦ កញ្ញា វេលាម៉ោង៩ ល្ងាច (ម៉ោងនៅសហរដ្ឋអាមេរិក) ដែលត្រូវជាម៉ោង ៩ ព្រឹកថ្ងៃអង្គារស្អែកនេះ (ម៉ោងនៅទីក្រុងភ្នំពេញ)។ ការជជែកតទល់គ្នានេះនឹងត្រូវផ្សាយបន្តផ្ទាល់តាមកញ្ចក់ទូរទស្សន៍ ដោយគេរំពឹងថានឹងមានមនុស្សរាប់លាននាក់តាមដាន។
កិច្ចពិភាក្សាទល់មុខគ្នារវាងបេក្ខជនប្រធានាធិបតីតំណាងឲ្យគណបក្សធំៗទាំងពីរបានមកដល់ហើយ។ កិច្ចពិភាក្សាបោះឆ្នោតប្រធានាធិបតីនេះនឹងត្រូវចាត់ទុកជាប្រវត្តិសាស្រ្តនៃនយោបាយអាមេរិក។ ព្រោះថាកន្លងមក ពុំដែលមានស្រ្តីត្រូវបានជ្រើសតាំងជាបេក្ខនារីប្រធានាធិបតីតំណាងឲ្យគណបក្សណាមួយឡើយ។
កិច្ចពិភាក្សាបេក្ខជនប្រធានាធិបតីនេះត្រូវបានបង្កើតឡើងចាប់តាំងពីទសវត្សរ៍ឆ្នាំ១៩៦០មកម្ល៉េះ។ ហើយការរៀបចំពិភាក្សាបែបនេះនារដូវកាលបោះឆ្នោតបានក្លាយទៅជាប្រពៃណីទំនៀមទំលាប់មួយក្នុងការអនុវត្តន៍លិទ្ធិប្រជាធិបតេយ្យក្នុងសង្គមអាមេរិក។ បេក្ខជនប្រធានាធិបតីនឹងជជែកដេញដោលគ្នាលើប្រធានបទសង្គមសំខាន់ៗ។ ហើយនេះក៏ជាឱកាសឲ្យអ្នកបោះឆ្នោតឃើញសមត្ថភាពរបស់បេក្ខជននោះផងដែរ។
នៅសហរដ្ឋអាមេរិក គណៈកម្មការរៀបចំកិច្ចពិភាក្សាបោះឆ្នោតប្រធានាធិបតី (Commission on Presidential Debates) គឺស្ថាប័នមួយទទួលបន្ទុករៀបចំកិច្ចពិភាក្សានេះ។ ស្ថាប័ននេះជាអង្គការមិនរកប្រាក់កំរៃ ដែលស្ថិតក្រោមការត្រួតពិនិត្យរបស់គណបក្សសាធារណរដ្ឋ និងគណបក្សប្រជាធិបតេយ្យ។ គណៈកម្មការនេះទទួលបានថវិការពីបណ្តាមូលនិធិ និងក្រុមហ៊ុនឯកជននានា ដើម្បីដំណើរការសកម្មភាពរបស់ខ្លួន។
បេសកកម្មចម្បងរបស់គណៈកម្មការរៀបចំកិច្ចពិភាក្សាបោះឆ្នោតប្រធានាធិបតីនេះ គឺរៀបចំ និងឧបត្ថម្ភការជជែកទល់មុខគ្នារបស់បេក្ខជនប្រធានាធិបតី និងអនុប្រធានាធិបតី។ ហើយគណៈកម្មការនេះក៏ដឹកនាំសកម្មភាពស្រាវជ្រាវ និងការអប់រំផងដែរទាក់ទងនឹងកិច្ចពិភាក្សានយោបាយនេះ។ ចាប់តាំងពីឆ្នាំ១៩៨៨ ម្ល៉េះ គណៈកម្មការនេះតែងរៀបចំកិច្ចពិភាក្សាទល់មុខគ្នានៅពេលរដូវបោះឆ្នោតប្រធានាធិបតីអាមេរិក។
សំរាប់ការបោះឆ្នោតប្រធានាធិបតីឆ្នាំ២០១៦នេះ គណៈកម្មការបានសំរេចរៀបចំកិច្ចពិភាក្សាបេក្ខជនប្រធានាធិបតីចំនួន ៣ លើក។ ចំណែកពិធីករដែលជាអ្នកសម្របសម្រួលការជជែកដេញដោលគ្នានេះត្រូវបានជ្រើសរើសសំរិតសំរាំងចាប់តាំងពីដើមខែកញ្ញាមកម្ល៉េះ។ កិច្ចពិភាក្សាទីមួយ គឺនឹងចាប់ផ្តើមនាថ្ងៃច័ន្ទ ទី២៦ កញ្ញានេះ ដោយមានលោក Lester Holt ជាពិធីករសម្របសម្រួល។ កិច្ចពិភាក្សានេះនឹងធ្វើឡើងនៅសាកលវិទ្យាល័យ Hofstra ក្នុងទីក្រុង Hampstead នៃរដ្ឋញ៉ូវយក។
កម្មវិធីនេះនឹងផ្សាយបន្តផ្ទាល់តាមកញ្ចក់ទូរទស្សន៍ម៉ោង ៩ ល្ងាច (ម៉ោងនៅប៉ែកខាងកើតសហរដ្ឋអាមេរិក ដែលត្រូវជាម៉ោង ៩ ព្រឹកថ្ងៃអង្គារ៍នាទីក្រុងភ្នំពេញ)។ កិច្ចពិភាក្សាមួយទល់នឹងមួយនេះមានរយៈពេល ៩០ នាទី។ គេរំពឹងទុកថា សំរាប់តែក្នុងសហរដ្ឋអាមេរិកប៉ុណ្ណោះ មានពលរដ្ឋអាមេរិកចន្លោះពី ៧០ ទៅ១០០ លាននាក់នឹងតាមដានកិច្ចពិភាក្សានេះតាមកញ្ចក់ទូរទស្សន៍។
លោក Lester Holt ដែលជាអ្នកបើកកិច្ចពិភក្សាតំបូងនេះ គឺជាពិធីករជនជាតិអាមេរិកស្បែកខ្មៅប្រចាំស្ថានីយ៍ទូរទស្សន៍ NBC ក្នុងកម្មវិធីព័ត៌មានពេលល្ងាច (NBC Nightly News)។ គាត់បានចាប់អាជីពអ្នកសារព័ត៌មានតាំងពីឆ្នាំ១៩៨១មកម្ល៉េះ។ សំរាប់កិច្ចពិភាក្សានេះ លោក Lester Holt គ្រោងសួរទីកាន់បេក្ខជនម្នាក់ៗ ដោយសំណួរទាំងនោះផ្តោតលើប្រធានបទចំនួនបី៖១) ទិសដៅដើម្បីតំរង់សហរដ្ឋអាមេរិក ២) ដំណោះស្រាយធ្វើឲ្យសេដ្ឋកិច្ចលូតលាស់ ៣) ការធានាសន្តិសុខជូនពលរដ្ឋអាមេរិក។
ចំណែកការជជែកដេញដោលគ្នាជាលើកទីពីររវាងលោកស្រី Hillary Clinton និងលោក Donald Trump នឹងរៀបចំនាថ្ងៃទី ៩ តុលា ក្រោមការសម្របសម្រួលរបស់ពិធីករដ៏ល្បីឈ្មោះម្នាក់ គឺលោក Anderson Cooper។ កិច្ចពិភាក្សាទីពីរនេះនឹងប្រព្រឹត្តទៅនៅសាកលវិទ្យាល័យវ៉ាស៊ីងតោនប្រចាំទីក្រុង Saint-Louis នៃរដ្ឋ Missouri។ រីឯកិច្ចពិភាក្សាទីបីចុងក្រោយគេ គឺនឹងធ្វើឡើងនាថ្ងៃទី១៩ តុលាខាងមុខនេះនាសាកលវិទ្យាល័យ Nevada ក្នុងទីក្រុងឡាសវេហ្គាស នៃរដ្ឋ Nevada។ លោក Chris Wallace ពិធីករប្រចាំសា្ថនីយ៍ទូរទស្សន៍ Fox News នឹងធ្វើជាអ្នកសម្របសម្រួលការជជែកគ្នាចុងក្រោយនេះ។
បើតាមការចុះផ្សាយរបស់សារព័ត៌មាន The New York Times សំរាប់កិច្ចពិភាក្សាបោះឆ្នោតប្រធានាធិបតីឆ្នាំ២០១៦ នេះ គណៈកម្មការរៀបចំកិច្ចពិភាក្សាបោះឆ្នោតប្រធានាធិបតី (CPD) បានខិតខំធ្វើយ៉ាងណាឲ្យកិច្ចពិភាក្សានេះទទួលការសម្របសម្រួលពីពិធីករ ឬបុគ្គលល្បីឈ្មោះមកពីមជ្ឈដ្ឋានចំរុះផ្សេងៗគ្នា។ តួយ៉ាងដូចជាលោក Lester Holt តំណាងពលរដ្ឋអាមេរិកស្បែកខ្មៅ ហើយលោក Anderson Cooper តំណាងឲ្យសហគមន៍អ្នកស្រលាញ់ភេទដូចគ្នា។ សូមបញ្ជាក់ផងដែរថា កិច្ចពិភាក្សាបេក្ខជនប្រធានាធិបតីនេះនឹងធ្វើឡើងក្រោមសម្ពាភតឹងតែងមួយ ក្រោយពីសហរដ្ឋអាមេរិកបានរងគ្រោះការបំផ្ទុះគ្រាប់បែកនៅទីក្រុងញ៉ូវយក និងរដ្ឋ New Jersey។ ហើយសហរដ្ឋអាមេរិកក៏កំពុងឈឺក្បាលផងដែរ ក្នុងការស្វែងរកដំណោះស្រាយចំពោះបញ្ហាភាពរំជើបរំជួលហឹង្សាដោយហ្វូងបាតុករ ដែលកំពុងតែកើតឡើងនៅទីក្រុង Charlotte នៃរដ្ឋ Caroline ខាងជើង។
ចំពោះកិច្ចពិភាក្សាតំបូងនេះ គេមិនអាចទាយទុកមុនថាតើលោកស្រី Hillary Clinton ឬលោក Donald Trump ជាអ្នកលេចធ្លោជាងគេឈ្នះការជជែកដេញដោលគ្នាឡើយ។ តាមពិតទៅ កិច្ចពិភាក្សានេះនឹងមិនមានឥទ្ធិពលឡើយចំពោះពលរដ្ឋអាមេរិកណា ដែលបានគិតទុកជាមុនហើយថានឹងបោះឆ្នោតឲ្យបេក្ខជនណាម្នាក់។ កិច្ចពិភាក្សានេះគ្រាន់តែជាការជួយពង្រឹងការសំរេចចិត្តរបស់ពួកគេថែមទៀតមួយកំរិតទៀតប៉ុណ្ណោះ។
ផ្ទុយទៅវិញ ការជជែកមួយទល់នឹងមួយនេះនឹងជះឥទ្ធិពលខ្លាំក្លាចំពោះក្រុមអ្នកបោះឆ្នោតណាដែលនៅស្ទាក់ស្ទើរចិត្តមិនទាន់ដឹងថានឹងឲ្យឆ្នោតជូនបេក្ខជនណាម្នាក់។ បើតាមការស្ទង់មតិរបស់ស្ថានីយ៍ទូរទស្សន៍ NBC បានឲ្យដឹងថា ចំនួនអ្នកស្ទាក់ស្ទើរកាន់តែមានច្រើនសំរាប់ការបោះឆ្នោតឆ្នាំ២០១៦នេះបើប្រៀបធៀបកាលពីបួនឆ្នាំមុន។ តួលេខបានបង្ហាញថាមានរហូតទៅដល់ ៩% នៃចំនួនពលរដ្ឋគ្រប់អាយុបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ