អាមេរិក និងជប៉ុនព្រមានអាល់ហ្សេរីឲ្យការពារសុវត្ថិភាពចំណាប់ខ្មំាង
នៅក្នុងប្រទេសអាល់ហ្សរី ជួនចំពេលដែលព័ត៌មានជុំវិញប្រតិបត្តិការរបស់កងកម្លំាងពិសេសអាល់ហ្សេរីនៅរោងចក្រផលិតប្រេង និងឧស្ម័នកំពុងបន្តស្រពិចស្រពិលនោះ សហរដ្ឋអាមេរិក និងប្រទេសជប៉ុនបានព្រមានរដ្ឋាភិបាលអាល់ហ្សរីឲ្យព្យាយាមការពារជីវិតចំណាប់ខ្មំាងដែលកំពុងស្ថិតក្នុងកណ្តាប់ដៃក្រុមអ៊ីស្លាមនិយមជ្រុល។ ការព្រមាននេះបានធ្វើឡើងរួមគ្នានៅក្នុងទីក្រុងវ៉ាស៊ីនតោននាថ្ងៃសុក្រ ទី១៨ មករាម្សិលមិញ រវាងលោកស្រីប្រមុខការទូតអាមេរិក ហ៊ីលឡារី គ្លីនតុន និងលោកប្រមុខការទូតជប៉ុន Fumio Kishida។
ចុះផ្សាយនៅថ្ងៃ៖
ស្តាប់ - ០២:២៤
រហូតមកដល់ថ្ងៃនេះ និងមានរយៈពេលជាង ២ថ្ងៃមកហើយ ដែលគេនៅតែគ្មានព័ត៌មានលំអិតណាមួយទាក់ទងនឹងប្រតិបត្តិការរបស់កងកម្លំាងពិសេសអាល់ហ្សេរីវាយប្រហារលើក្រុមអ៊ីស្លាមនិយមជ្រុលនៅរោងចក្រផលិតប្រេង និងឧស្ម័ននៅអ៊ីន អាមេណា ( In Amenas)។ អ្វីដែលគ្រប់គ្នាបានដឹងមកទល់ម៉ោងនេះគឺថា កងកម្លំាងពិសេសអាល់ហ្សរីបាននិងកំពុងបន្តប្រតិបត្តិការរបស់ខ្លួនជាបន្តទៀតដើម្បីព្យាយាមរំដោះចំណាប់ខ្មំាងអាល់ហ្សេរី និងបរទេសពីកណ្តាប់ដៃក្រុមអ៊ីស្លាមនិយមជ្រុល។ គឺកង្វះព័ត៌មានលំអិតជុំវិញប្រតិបត្តិការនោះហើយ ដែលបានធ្វើឲ្យរដ្ឋាភិបាលទីក្រុងអាល់ហ្សេបន្តទទួលការរិះគន់ ទិតៀនយ៉ាងខ្លំាងពីសំណាក់ប្រទេសដែលមានពលរដ្ឋខ្លួនកំពុងជាប់ជាចំណាប់ខ្មំាង រួមមាន ជប៉ុន បារំាង អង់គ្លេស ន័រវែស និងសហរដ្ឋអមេរិក។ សហរដ្ឋអាមេរិកដែលបានបញ្ជាក់នៅយប់មិញ ពីការស្លាប់ពលរដ្ឋម្នាក់របស់ខ្លួន។
ខុសពីលោកប្រធានាធិបតីបារំាង François Hollande ឬមួយក៏លោកនាយករដ្ឋមន្រ្តីអង់គ្លេស David Cameron លោកប្រធានាធិបតីអាមេរិក អូបាម៉ាមិនបាននិយាយអ្វីមួយម៉ាត់ទេ ទាក់ទងនឹងរឿងរ៉ាវកើតឡើងនៅក្នុងប្រទេសអាល់ហ្សរីនោះ ហើយសេតវិមានក៏មិនបានចេញផ្សាយនូវសេចក្តីជូនដំណឹងណាមួយដែរ។ គឺទើបតែនៅថ្ងៃសុក្រ ទី១៨ មករាម្សិលមិញទេ ដែលលោកអូបាម៉ាបានទុកឲ្យប្រមុខការទូតរបស់លោក គឺលោកស្រីហ៊ីលឡារី គ្លីនតុនជាអ្នកបញ្ចេញប្រតិកម្ម។ លោកស្រីគ្លីនតុនបានស្នើរដ្ឋាភិបាលអាល់ហ្សេរីឲ្យមានការប្រយ័ត្នប្រយែងខ្ពស់ក្នុងការជួយស្រោចស្រង់ជីវិតចំណាប់ខ្មំាងទំាងអស់ដែលកំពុងស្ថិតនៅក្នុងកណ្តាប់ដៃក្រុមអ៊ីស្លាមនិយមជ្រុល។
នៅក្នុងជំនួបជាមួយលោកប្រមុខការទូតជប៉ុន Fumio Kishida ក្នុងទីក្រុងវ៉ាស៊ីតោន លោកស្រីគ្លីនតុនបាននិយាយប្រាប់ក្រុមអ្នកាសែតថា លោកស្រីបានព្រមានលោកនាយករដ្ឋមន្រ្តីអាល់ហ្សេរី Abdelmalek Sellal ឲ្យការពារសុវត្ថិភាពជីវិតចំណាប់ខ្មំាងទំាងអស់ មិនថាជាជនជាតិអាល់ហ្សេរី ឬមួយជាជនបរទេសទេ។ សម្រាប់លោកស្រីគ្លីនតុន នេះពិតជាស្ថានការណ៍មួយដ៏សែនពិបាក និងប្រកបដោយគ្រោះថ្នាក់។ ទន្ទឹមគ្នានេះ លោកស្រីគ្លីនតុនក៏បានបញ្ជាក់ផងដែរថា អ្វីដែលបានកើតមានឡើងនៅក្នុងប្រទេសអាល់ហ្សេរី គឺជាទង្វើភេរវនិយម ទង្វើភេរវនិយមដែលអាមេរិកមិនចរចាជាមួយក្រុមភេរវជនជាដាច់ខាត។ យ៉ាងណាក៏ដោយ ទីក្រុងវ៉ាស៊ីនតោននៅតែមិនទាន់អាចទទួលយកបានទេ ចំពោះកាយវិការរបស់រដ្ឋាភិបាលអាល់ហ្សេរីក្នុងការសម្រេចបើកប្រតិបត្តិការវាយប្រហារលើក្រុមអ៊ីស្លាមនិយមជ្រុលនៅរោងចក្រផលិតប្រេង និងឧស្ម័ននៅអ៊ីន អាមេណា ( In Amenas)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ