លោក Jame Mattis ៖ អាមេរិកនឹងធ្វើប្រតិបត្តិការយោធាទ្រង់ទ្រាយធំ ប្រសិនបើកូរ៉េខាងជើងប្រើអាវុធនុយក្លែអ៊ែរ
នៅថ្ងៃសៅរ៍ ទី២៨តុលានេះ រដ្ឋមន្ត្រីការពារជាតិមេរិក លោក Jame Mattis បានប្រកាសប្រតិកម្មថា អាមេរិកនឹងមានប្រតិបត្តិការយោធាលក្ខណៈទ្រង់ទ្រាយធំ ករណីបើ កូរ៉េខាងជើង ប្រើអាវុធនុយក្លែអ៊ែរ។ ការប្រកាសឆ្លើយតបរបស់លោក Jame Mattis នេះ គឺធ្វើឡើងក្នុងសន្នីសីទកាសែតរួមគ្នាជាមួយសមភាគីកូរ៉េខាងត្បួង នាទីក្រុងសេអ៊ូល ជាទីដែលលោកកំពុងបំពេញទស្សនកិច្ច។ គួរបញ្ជាក់ថា នៅពេលនេះ កងទ័ពយោធាអាមេរិក ប្រមាណជិត៣ម៉ឺននាក់ កំពុងតែឈរជើងប្រចាំការជាស្រេចនៅក្នុងទឹកដីកូរ៉េខាងត្បូង សម្ព័ន្ធមិត្តចាក់ទឹកមិនលេចរបស់អាមេរិក។
ចុះផ្សាយនៅថ្ងៃ៖
ស្តាប់ - ០២:០៩
«រាល់ការប្រើប្រាស់អាវុធនុយក្លែអ៊ែរ ពីសំណាក់កូរ៉េខាងជើង គឺនឹងត្រូវទទួលបានការឆ្លើយតបវិញ ដោយកម្លាំងយោធាទ្រង់ទ្រាយធំ ដ៏មានប្រសិទ្ធភាព និងយ៉ាងច្រើនសម្បើម» នេះជាការបញ្ជាក់របស់លោក Jame Mattis រដ្ឋមន្ត្រីការពារជាតិមេរិក ដែលបានថ្លែងក្នុងសន្នីសីទការកាសែតរួមគ្នាជាមួយរដ្ឋមន្ត្រីការពារជាតិកូរ៉េខាងត្បួង។
ទោះជាបានអះអាងដូច្នេះមែនក្តី ក៏ប៉ុន្តែលោក Jame Mattis មិនបានសង្គត់ធ្ងន់ឲ្យច្បាស់លាស់ ថាតើរាល់ការប្រើប្រាស់អាវុធនុយក្លែអ៊ែរ ប្រភេទណានិងលក្ខណៈណាខ្លះពីសំណាក់កូរ៉េខាងជើង ដែលអាមេរិកត្រូវឆ្លើយតបជាយោធាទ្រង់ទ្រាយធំនោះឡើយ។ ការព្រលយពាក្យដូច្នេះ គឺទំនងជាឆ្លើយតបទៅនឹងលោក RI Yong Ho រដ្ឋមន្ត្រីការបរទេសកូរ៉េខាងជើង ដែលបានថ្លែងនៅមហាសន្និបាតអង្គការសហប្រជាជាតិ កាលពីខែកញ្ញាថា កូរ៉េខាងជើងអាចនឹងបាញ់សាកល្បងគ្រាប់បែកនុយក្លែអ៊ែរនៅលើដែនសមុទ្រប៉ាស៊ីហ្វិក។
ក៏ប៉ុន្តែចំពោះអាមេរិក លោក Mattis អះអាងថា «រដ្ឋបាលទីក្រុង Washington មិនអាចទទួលបានទេ ចំពោះកូរ៉េខាងជើងដែលមាននុយក្លែអ៊ែរ»។
ភាពតានតឹងរវាងកូរ៉េខាងជើងនិងអាមេរិក គឺមានខ្លាំងឡើងៗ តាំងតែពីការបាញ់សាកល្បងអាវុធនុយក្លែអ៊ែរ និងមីសស៊ីលបាលេស្ទីក គម្រប់ជាលើកទី៦ របស់របបក្រុងព្យុងយ៉ាង។ បុរសខ្លាំងកូរ៉េខាងជើង គីម ជុងអ៊ុន និងលោក ដូណាល់ ត្រាំ បានផ្ទុះសង្គ្រាមពាក្យសម្តីដាក់គ្នា និងជេរប្រទេច គ្នាទៅវិញទៅមក ជាញឹកញយ។
ទោះបីជាយ៉ាងណាក៏ដោយ ទាំងរដ្ឋមន្ត្រីការពារជាតិអាមេរិក និងទាំងរដ្ឋមន្ត្រីការបរទេសមេរិក គឺសុទ្ធតែទុកច្រកទ្វារការទូតសម្រាប់ចរចាគ្នា។ លោក Jame Mattis រម្លឹកសម្តីរបស់ប្រមុខការទូតអាមេរិកឡើងវិញថា គោលដៅរបស់អាមេរិក គឺមិនមែនសង្គ្រាមទេ ក៏ប៉ុន្តែ កូរ៉េខាងខាងជើង ដាច់ខាតគឺត្រូវតែគ្មានអាវុធនុយក្លែអ៊ែរ។
សូមបញ្ជាក់ដែរថា វត្តមានរបស់លោករដ្ឋមន្ត្រីការពារជាតិអាមេរិក នៅក្នុងទឹកដីកូរ៉េខាងត្បួងនាពេលនេះ គឺ ដើម្បីរៀបចំដំណើរទស្សនកិច្ចរបស់ប្រធានាធិបតីអាមេរិក លោក ដូណាល់ ត្រាំ ជាផ្លូវការលើកទី១ នៅក្រុងសេអ៊ូល ដែលនឹងត្រូវធ្វើឡើងនៅថ្ងៃទី៧និង៨វិច្ឆិកា ខាងមុននេះ។ នាឱកាសនោះ លោក ត្រាំ នឹងបន្តទស្សនកិច្ចមួយជុំអាស៊ី ទៅជប៉ុន ចិន វៀតណាម និងហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ