លោកអូបាម៉ាចេញក្រិត្យប្រធានាធិបតីជួយជនអន្តោប្រវេសន៍ខុសច្បាប់
ចុះផ្សាយនៅថ្ងៃ៖
ស្តាប់ - ០៧:០៤
លោកប្រធានាធិបតីអាមេរិក បារ៉ាក់ អូបាម៉ា បានសម្រេចប្រើ "អំណាចប្រតិបត្តិ" នៅយប់មិញ ចេញក្រិត្យផ្តល់លិខិតស្នាមស្របច្បាប់ បណ្តោះអាសន្នទៅឲ្យជនបរទេស ដែលរស់នៅខុសច្បាប់ក្នុងទឹកដីអាមេរិកលើសពី ៥ឆ្នាំ និងដែលមានកូនជាពលរដ្ឋអាមេរិកស្របច្បាប់។ ជនអន្តោប្រវេសន៍ប្រមាណ៥លាននាក់ ក្នុងចំណោម១១លាននាក់នឹងទទួលបានប្រយោជន៍ពីនយោបាយបន្ធូរបន្ថយរបស់លោកអូបាម៉ា។ ប៉ុន្តែក្រិត្យប្រធានាធិបតីនេះ បានទទួលការរិះគន់ និងចោទប្រកាន់យ៉ាងខ្លាំងពីសំណាក់គណបក្សប្រឆាំង។ សមាជិកសភា និងព្រឹទ្ធសភាខ្លះ បានចោទលោកអូបាម៉ា ថាធ្វើផ្ទុយនឹងច្បាប់រដ្ឋធម្មនុញ្ញផង។
អាមេរិកមានជនអន្តោប្រវេសន៍ខុសច្បាប់ច្រើន ប្រមាណដល់ទៅជាង១១លាននាក់ ! ប៉ុន្តែនៅក្នុងសុន្ទករថាខ្លី ទៅកាន់ប្រជាជាតិល្ងាចមិញ លោកអូបាម៉ា បានប្រកាសបន្ធូរបន្ថយច្បាប់ ផ្តល់សិទ្ធិស្នាក់នៅបណ្តោះអាសន្នដល់ជនបរទេសប្រមាណតែ ជិត៥លាននាក់ប៉ុណ្ណោះ។ លោកអូបាម៉ាបានពន្យល់ថា ផ្តល់សិទ្ធិដល់ជនអន្តោប្រវេសន៍អត់ក្រដាសស្នាមទាំងអស់ គឺមិនត្រូវ ! បណ្តេញចេញទាំងហ្វូងៗ ពិតជាមិនអាចធ្វើទៅកើត និងផ្ទុយពីគោលការណ៍របស់អាមេរិក ! ដូច្នេះ ហើយទើបលោក ត្រូវរកឱ្យឃើញនូវប្រព័ន្ធដោះស្រាយមួយ មិនលម្អៀងនិងត្រឹមត្រូវបំផុត។ នៅល្ងាចនេះ លោកប្រធានាធិបតីអាមេរិកត្រូវលម្អិត និងពន្យល់បន្ថែមទៀតអំពីវិធានការរបស់លោកទាក់ទងនឹងក្រិត្យផ្តល់សិទ្ធិជ្រកកោនស្របច្បាប់ដល់អន្តោប្រវេសន៍ខុសច្បាប់។
លក្ខខណ្ឌសម្រាប់ក្លាយជាជនអន្តោប្រវេសន៍ស្របច្បាប់
សម្រាប់ពេលនេះ អ្វីដែលយើងនិយាយបានគឺ ចាប់ពីរដូវផ្ការីកឆ្នាំ២០១៥ទៅ បណ្តាជនអន្តោប្រវេសន៍ដែលរស់នៅខុសច្បាប់លើទឹកដីអាមេរិក តាំងពីជាង៥ឆ្នាំមកហើយ និងមានកូនជាសញ្ជាតិអាមេរិក ឬមានកាន់លិខិតស្នាក់នៅអចិន្ត្រៃយ៍ អាចស្នើសុំលិខិតអនុញ្ញាតឱ្យធ្វើការទឹកដីសហរដ្ឋ ឬតាកការងារ បានសម្រាប់រយៈពេលបីឆ្នាំ។ សិទ្ធិធ្វើការនេះ មិនមែនជាការធានាថាថ្ងៃក្រោយពួកគេអាចសុំសញ្ញាតិអាមេរិក ឬសិទ្ធិរស់នៅជាអចិន្ត្រៃយ៍ឡើយ។ ប៉ុន្តែ ពួកគេចាំបាច់ត្រូវជាជនស្អាតស្អំ ពុំធ្លាប់មានបញ្ហាជាមួយនគរបាល និងត្រូវគោរពលក្ខខណ្ឌមួយចំនួនទៀត។ លើសពីនេះ កម្មវិធីថ្មីរបស់លោក អូបាម៉ា នឹងផ្តល់ប័ណ្ណស្នាក់នៅបណ្តោះអាសន្នដល់និតិជន ឬជនមិនទាន់គ្រប់អាយុ ដែលបានមករស់នៅលើទឹកដីសហរដ្ឋអាមេរិកមុនអាយុ ១៦ ឆ្នាំ។
កំណែទម្រង់ប្រព័ន្ធអន្តោប្រវេសន៍អាមេរិក ជាប្រធានបទដែលគ្រប់បេក្ខជនប្រធានាធិបតីអាមេរិកបានសន្យា ជារៀងរាល់បួនឆ្នាំមក នៅពេលត្រូវការស្វែងរកសំឡេងឆ្នោត ប៉ុន្តែក្នុងស្ថានភាពជាក់ស្តែងគឺពិបាកធ្វើខ្លាំងណាស់។ អាមេរិកធ្លាប់ធ្វើការផ្តល់សិទ្ធិជ្រកកោនជាទ្រង់ទ្រាយធំម្តងនៅឆ្នាំ ១៩៨៦ ! ប៉ុន្តែសម័យក្រោយៗមក គ្មានរដ្ឋាភិបាលណាមួយអាចធ្វើបានសម្រេចកំណែទម្រង់ប្រព័ន្ធអន្តោរប្រវេសន៍អាមេរិកទេ។
លោក អូបាម៉ាតាំងពីបានក្លាយជាប្រធានាធិបតីបានចាត់ទុកបញ្ហាអន្តោប្រវេសន៍ជាអាទិភាពមួយ ប៉ុន្តែ សភានិងព្រឹទ្ធសភា មិនចុះសម្រុងនឹងគ្នា។ ហើយកាលពីដើមខែគណបក្សប្រជាធិបតេយ្យរបស់លោកអូបាម៉ា បានរបូតព្រឹទ្ធសភាពីដៃទៀត។ សភានិងព្រឹទ្ធសភាស្ថិតក្នុងកណ្តាប់ដៃបក្សប្រឆាំងទាំងអស់។ ដូច្នេះលោកអូបាម៉ា មិនអាចរំពឹងលើស្ថាប័នទាំងពីរដើម្បីធ្វើកំណែទម្រង់ប្រព័ន្ធអន្តោប្រវេសន៍បានឡើយ លោកគ្មានជម្រើសអ្វីទៀតទេ និងក៏គ្មានខ្លាចខាតបង់អ្វីទៀតដែរ ក្រៅពីត្រូវប្រើអំណាចជាប្រធានាធិបតី ប្រកាសការពារឱ្យជនអន្តោប្រវេសន៍ខុសច្បាប់ តាមរយៈក្រិត្យប្រធានាធិបតីនេះទេ និងបានអំពាវនាវឱ្យសភានិងព្រឹទ្ធបោះឆ្នោតទទួលយកច្បាប់នេះ។
ហេតុអ្វីគណបក្សសាធារណរដ្ឋប្រឆាំងក្រិត្យប្រធានាធិបតី?
លោកអូបាម៉ា មិនមែនជាប្រធានាធិបតីអាមេរិកដំបូងគេដែលប្រើអំណាចជាប្រធានាធិបតី ក្នុងការអារកាត់សេចក្តីអ្វីមួយទេ គ្រាន់តែថាប្រធានបទនេះ មានលក្ខណៈនយោបាយផង សង្គមផង។ សភា និងព្រឹទ្ធសភាអាមេរិក អាចបោះឆ្នោត ដកសុពលភាពលើក្រិត្យរបស់លោកអូបាម៉ា បាននៅពេលលោកលែងជាប្រធានាធីបតី។ ហេតុដូច្នេះ ហើយបានជាលោក អូបាម៉ា បានបញ្ជាក់យ៉ាងច្បាស់ ថា ការផ្តល់សិទ្ធិនេះជាលក្ខណៈបណ្តោះអាសន្នតែប៉ុណ្ណោះ។
អ្វីដែលធ្វើឱ្យគណបក្សប្រឆាំងសាធារណរដ្ឋខឹងសម្បារខ្លាំងជាពិសេស នៅពេលនេះ គឺប្រយោជន៍នយោបាយទេ។ ខឹងសម្បារខ្លាំង មកពីពួកគេយល់ថាលោកអូបាម៉ា បានពង្រាវច្បាប់អន្តោប្រវេសន៍ ដោយចេញក្រិត្យ ដើម្បីការពារប្រយោជន៍គណបក្សប្រជាធិបតេយ្យ និងរូបលោកផ្ទាល់ឱ្យជាប់ឈ្មោះក្នុងទំព័រប្រវត្តិសាស្ត្រអាមេរិក ក្នុងសំណុំរឿងអន្តោប្រវេសន៍។ ជាពិសេស លោកអូបាម៉ា បានជ្រើសរើសចេញក្រិត្យនៅនាទីចុងក្រោយ មុនពេលសភានិងព្រឹទ្ធសភាបិទវគ្គ ហៀបនឹងចេញទៅវិស្សមកាល ដើម្បីឱ្យច្បាប់នេះអាចចេញរួចបានដោយរលូន។
ម្យ៉ាងវិញទៀត គណបក្សសាធារណរដ្ឋប្រហែលជាពិបាកនឹងសំឡេងប្រឆាំងខ្លាំង ព្រោះគណបក្ស ធ្លាប់បានមានបទពិសោធន៍ម្តង ក្នុងសំណុំរឿងជាប់គាំង ច្បាប់ថវិកា ឆ្នាំកន្លងទៅ។ កាលណោះ គណបក្សប្រឆាំងបានខ្ទប់ច្បាប់មិនឱ្យចេញ ធ្វើឱ្យអាមេរិកជាប់គាំងរាប់សិបថ្ងៃ ជាលទ្ធផលគណបក្សសាធារណរដ្ឋបានបាត់បង់ការគាំទ្រ និងទំនុកចិត្ត។ នៅលើកនេះ ប្រធានបទកាន់តែដ៏រសើបក្រៃ ព្រោះការបោះឆ្នោតប្រធានាធិបតីកាន់តែខិតជិតចូលមកដល់ (២០១៧)។ លោកអូបាម៉ា ដែលបានបង្ខំចិត្តប្រើអំណាចប្រធានាធិបតីដើម្បីចេញក្រិត្យជួយអន្តោប្រវេសន៍(ភាគច្រើនជាមានដើម កំណើតមកពីអាមេរិកឡាទីន ឬនិយាយភាសាអេស្ប៉ាញ)មែន តែពិតជាទទួលបានមកវិញនូវការគាំទ្រច្រើនពីសហគមន៍នេះ។ ដូច្នេះបើគណបក្សសាធារណរដ្ឋ ហ៊ានចេញមុខប្រឆាំងខ្លាំងពេក ឬបិទខ្ទប់មិនឱ្យច្បាប់ចេញរួច ដូចសម័យច្បាប់ថវិកា នោះផលវិបាកអាចនឹងធ្ងន់ធ្ងរខ្លាំង ! ពលរដ្ឋសហគមន៍នេះ អាចទាមទារសំណងនៅពេលបោះឆ្នោតប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ