អាមេរិកថាអង្គការសហប្រជាជាតិសុខចិត្តកាត់បន្ថយចំណាយ២៨៥លានដុល្លារ
អង្គការសហប្រជាជាតិ នឹងកាត់បន្ថយការចំណាយ ប្រមាណ២៨៥លានដុល្លារ នៅក្នុងដំណើរការរបស់ខ្លួន សម្រាប់ពីរឆ្នាំខាងមុខ គឺឆ្នាំ២០១៨ និង២០១៩។ នេះគឺជាការប្រកាសឲ្យដឹងពីឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិ។ ចំពោះភាគីសហរដ្ឋអាមេរិក, ការកាត់បន្ថយចំណាយនេះ គឺជាជំហានមួយដ៏ធំទៅរកផ្លូវត្រូវ ហើយក៏ជាជោគជ័យមួយបន្ថែមទៀតរបស់រដ្ឋបាលលោក ដូណាល់ ត្រាំ ដើម្បីបង្កើនប្រសិទ្ធភាពនៃការចំណាយ របស់អង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅក្នុងសេចក្តីថ្លែងការណ៍ពីថ្ងៃអាទិត្យកន្លងទៅ លោកស្រី Nikki Halay ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិ បានប្រកាសដោយមានអំនួតថា ការចាយវាយគ្មានប្រសិទ្ធភាពរបស់អង្គការសហប្រជាជាតិ គឺត្រូវបានគេដឹងឮយូរមកហើយ ហើយគេមិនត្រូវបណ្តោយឲ្យមានការកេងចំណេញពីទឹកចិត្តសប្បុរសរបស់ពលរដ្ឋអាមេរិក ដោយគ្មានការត្រួតពិនិត្យត្រឹមត្រូវបានតទៅទៀតនោះទេ។
សូមបញ្ជាក់ថា ក្នុងកញ្ចប់ថវិកា២៨៥លានដុល្លារ ដែលនឹងត្រូវកាត់បន្ថយនោះ គឺគេមិនដឹងថា មានលុយវិភាគទានរបស់អាមេរិកចំនួនប៉ុន្មានលានដុល្លារនោះទេ។ ក៏ប៉ុន្តែ ការកាត់បន្ថយចំណាយរបស់អាមេរិកនៅក្នុងអង្គការសហប្រជាជាតិ គឺជាកិច្ចការមួយអាទិភាពបំផុតរបស់រដ្ឋបាលលោក ដូណាល់ ត្រាំ ដែលថា ត្រូវតែគិតគូរផ្តល់ផលប្រយោជន៍អាមេរិកជាមុន America First ។
ជាការកត់សម្គាល់ ការប្រកាសដំណឹងពីការកាត់បន្ថយចំណាយរបស់អង្គការសហប្រជាជាតិ ដែលលេចចេញពីភាគីអាមេរិកនេះ គឺធ្វើឡើងក្រោយតែ៦ថ្ងៃប៉ុណ្ណោះ បន្ទាប់ពីមហាសន្និបាទអង្គការសហប្រជាជាតិ ដែលមានប្រទេសច្រើនលើសលុបបោះឆ្នោតមិនទទួលស្គាល់ចំពោះការសម្រេចចិត្តរបស់អាមេរិក ដែលយល់ព្រមចាត់ទុក ទីក្រុង Jérusalem ជារដ្ឋធានីអ៊ីស្រាអែល សម្ព័ន្ធមិត្តចាក់ទឹកមិនលិចរបស់អាមេរិក នៅមជ្ឈិមបូព៌ា។
ការកាត់បន្ថយគម្រោងថវិការបស់អង្គការសហប្រជាជាតិ ជាលើកទី២នេះ បន្ទាប់ពីបានកាត់បន្ថយថវិកា៦០០លានដុល្លារសម្រាប់ប្រតិបត្តិការរក្សាសន្តិសុខ កាលពីខែមិថុនាកន្លងទៅ។ អង្គការសហប្រជាជាតិ មានមន្ត្រីអ្នកធ្វើការរបស់ខ្លួនប្រមាណ ៤ម៉ឺននាក់នៅទូទាំងពិភពលោក ហើយសហរដ្ឋអាមេរិក ជាប្រទេសសមាជិកដែលផ្តល់ប្រាក់ជំនួយច្រើនជាងគេបំផុត គឺប្រមាណ២២ភាគរយ នៅក្នុងដំណើរការប្រព្រឹត្តទៅទាំងមូលរបស់អង្គការសហប្រជាជាតិ។
ដូច្នេះ ការកាត់បន្ថយចំណាយលើកទី២នេះទៀត គឺប្រាកដជានឹងប៉ះពាល់ទៅដល់ដំណើរការរបស់អង្គការសហប្រជាជាតិ ជាពិសេសគឺការជ្រើសរើសបុគ្គលិកថ្មី ប៉ះពាល់ដល់ប្រាក់ខែរបស់មន្ត្រីអង្គការសហប្រជាជាតិ និងជះឥទ្ធិពលអវិជ្ជមានដល់បេសកម្មភាពនយោបាយ ព្រមទាំងកិច្ចការទំនាក់ទំនង ហើយក៏ទំនងជាអាចនឹងប៉ះពាល់ដល់គម្រោងជំនួយអភិវឌ្ឍផ្សេងៗទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ