វ៉េណេស៊ុយអេឡាកាន់តែផុងជ្រៅក្នុងវិបត្តិ ប្រធានាធិបតីMaduroរងសម្ពាធពីការតវ៉ាអោយចុះពីអំណាច
ចុះផ្សាយនៅថ្ងៃ៖
ក្រុមប្រឆាំងវ៉េណេស៊ុយអេឡាបានអំពាវនាវអោយប្រជាជនធ្វើកូដកម្ម នៅទូទាំងប្រទេស ថ្ងៃសុក្រនេះ ដើម្បីដាក់សម្ពាធលើប្រធានាធិបតីម៉ាឌុយរ៉ូ អោយចុះពីអំណាច។ សាលារៀនបានបិទទ្វារ ចរាចរណ៍បានកកស្ទះ នៅតាមផ្លូវនានា ក្នុងទីក្រុងការ៉ាកាស។ ការតវ៉ាប្រឆាំងលោកម៉ាឌុយរ៉ូ បានធ្វើឡើងក្នុងស្រុក តាំងពីថ្ងៃពុធម្ល៉េះ។
កាលពីថ្ងៃពុធ មនុស្សរាប់សែននាក់ បាននាំគ្នាចុះតាមដងផ្លូវ ប្រឆាំងនឹងលោកម៉ាឌុយរ៉ូ តវ៉ានឹងក្រុមប្រឹក្សាបោះឆ្នោតជាតិ ដែលសប្តាហ៍មុន បានព្យួរប្រជាមតិ ស្តីពីការទំលាក់លោកម៉ាឌុយរ៉ូចេញពីអំណាច។
ម្សិលមិញនេះ លោកម៉ាឌុយរ៉ូ បានប្រកាសតម្លើងប្រាក់ខែ៤០ភាគរយក្នុងស្រុក ដើម្បីបន្ថយកំហឹងក្រុមបាតុករ។ ប៉ុន្តែ លោកម៉ាឌុយរ៉ូបានព្រមានដែរថា ករណីមានបាតុកម្មគំរាមប្រើកងកម្លាំងទ័ពដើម្បីបង្ក្រាបចលនាកូដកម្ម។ មន្ត្រីជាន់ខ្ពស់មួយចំនួនក៏បានគំរាមរឹបអូសសហគ្រាសដែលបិទទ្វារធ្វើកូដកម្មផងដេរ។
ការតម្លើងប្រាក់ខែមិនមែនជាដំណោះស្រាយបញ្ហាសេដ្ឋកិច្ច
វ៉េណេស៊ុយអេឡាធ្លាក់ជ្រៅក្នុងវិបត្តិគ្រប់បែបយ៉ាង នយោបាយ សេដ្ឋកិច្ច សង្គម។ ម្សិលមិញ ប្រធានាធិបតីម៉ាឌុយរ៉ូបានចាត់វិធានការតម្លើងប្រាក់ខែដល់ទៅ៤០ភាគរយ។ ប្រាក់ខែត្រូវបានតម្លើងម្តងមកហើយ កាលពីដើមខែឧសភា។
ប្រាក់ខែអប្បបរមានៅវ៉េណេស៊ុយអេឡា បច្ចុប្បន្ន មានមិនដល់១៤០ដុល្លារទេ។ បើតម្លើង៤០ភាគរយ ថែម ដូច្នេះ គេអាចទទួលបានជិត២០០ដុល្លារ ក្នុងមួយខែ។ ជិត២០០ដុល្លារនេះ គឺមិនច្រើនទេ ប្រៀបនឹងបញ្ហាអតិផរណាក្នុងស្រុក។ យោងតាមមូលនិធិរូបិយវត្ថុអន្តរជាតិ អតិផរណាវ៉េណេស៊ុយអេឡាឆ្នាំនេះ អាចមានដល់អត្រា៤៧៥ភាគរយ ហើយអាចកើនខ្ពស់ខ្លាំង រហូតដល់១៦៦០ភាគរយ សម្រាប់ឆ្នាំ២០១៧។
ដំណោះស្រាយតម្លើងប្រាក់ខែរបស់ប្រធានាធិបតីម៉ាឌុយរ៉ូ គ្មានប្រសិទ្ធភាពអ្វីទេ ប្រឈមបញ្ហាសេដ្ឋកិច្ចដែលកាន់តែធ្លាក់ដុនដាប។ វ៉េណេស៊ុយអេឡាជាប្រទេសមានសេដ្ឋកិច្ចពឹងផ្អែកលើការនាំចេញប្រេងទៅក្រៅស្រុក។ ប៉ុន្មានឆ្នាំនេះ ប្រេងធ្លាក់ថ្លៃដល់ទៅ១ជា៣ ដូច្នេះ ចំណូលរដ្ឋក៏ខាតធ្ងន់ធ្ងរតាមនោះដែរ។ វ៉េណេស៊ុយអេឡាជាប្រទេសសង្គមនិយមធំបំផុតមួយ មានរបៀបរបបរស់នៅ បែបសមូហភា រដ្ឋគ្រប់គ្រងសព្វបែបយ៉ាង សហគ្រាសធំតូច ទីផ្សារហិរញ្ញវត្ថុ ទំនិញមន្ទីរពេទ្យ។ល។និង។ល។
រដ្ឋជាអ្នកចែកចាយម្ហូបអាហារ ទឹក ភ្លើង សម្ភារប្រើប្រាស់ ធ្លាប់តែចែកចាយសំបូរហូរហៀរ ដល់តែប្រេងធ្លាក់ថ្លៃប្រិប ចំណូលជាតិក៏ខាតធ្ងន់ក។ ពេលនេះ ចំណីអាហារនិងថ្នាំពេទ្យ ដែលខ្វះខាតនោះ មានដល់ទៅ៨០ភាគរយ។ ទោះជាមានលុយក៏ពិបាករកទិញបានរបស់ត្រូវការចាំបាច់ដែរ។ ទំនិញដែលរដ្ឋចាត់ចែងនាំចូលបន្ថែមក្នុងស្រុកទៀតសោត ត្រូវបានឈ្មួញលួចកេងបន្លំលក់តម្លើងថ្លៃកបពពក។ ឧទាហរណ៍ គ្រាន់តែប្រេងឆាមួយដប មានតម្លៃដល់១៧ដុល្លារឯណោះ។
ដោយសារកង្វះខាតសម្ភារ និងម្ហូបអាហារ កាលពីរដូវក្តៅ ប្រជាជនខ្លះបានសម្រុកឆ្លងចូលទៅព្រំដែនកូឡុំប៊ីក្បែរនោះ ដើម្បីទិញម្ហូប និងវត្ថុប្រើប្រាស់ចាំបាច់។ ដោយសារការខ្វះខាតទាំងនេះ ហិង្សាលួចប្លន់ បានកើតមានឡើងក្នុងសង្គម។ រដ្ឋមិនអាចដោះស្រាយអ្វីបាន ធ្វើអោយប្រជាជនមិនពេញចិត្តនឹងលោកម៉ាឌុយរ៉ូតទៅទៀត។
យោងតាមការស្ទាបស្ទង់មតិ ប្រជាជន៧៦,៥ភាគរយ លែងពេញចិត្តលោកម៉ាឌុយរ៉ូ ហើយ៦២,៣ភាគរយ អាចនឹងបោះឆ្នោតអោយលោកចុះពីតំណែង។
សេដ្ឋកិច្ចពឹងតែលើប្រេង របបសង្គមនិយមមានរដ្ឋចែកសម្ភារ និងម្ហូបអាហារអោយប្រជាជន។ ការដែលរដ្ឋគ្រប់គ្រងគ្រប់បែបយ៉ាងនេះហើយ ដែលជាប្រភពនៃអំពើពុករលួយ នាំអោយជនមួយចំនួនលួចកេងចំណេញលុយរដ្ឋ ដាក់ហោប៉ៅផ្ទាល់ខ្លួន។ ដល់តែប្រេងធ្លាក់ចុះ រដ្ឋខាតលុយ ក៏មិនអាចមានលុយពីណាមកដោះស្រាយបាន។ នេះហើយជាប្រភពនៃវិបត្តិបច្ចុប្បន្ន។
បក្សប្រឆាំងមានសម្លេងច្រើនក្នុងសភា តែអំណាចស្ថិតលើប្រធានាធិបតី
បក្សប្រឆាំងស្តាំនិយម ឈ្នះការបោះឆ្នោតសភា កាលពីចុងឆ្នាំ២០១៥មែន មានសម្លេងភាគច្រើនក្នុងសភាមែន ប៉ុន្តែ អំណាចគ្រប់បែបយ៉ាងក៏នៅតែស្ថិតក្នុងកណ្តាប់ដៃ របស់ប្រធានាធិបតីម៉ាឌុយរ៉ូដដែល។ សូមបញ្ជាក់ថា លោកម៉ាឌុយរ៉ូមិនទទួលស្គាល់សភាជាតិទេ។
ដើម្បីអាចយកប្រៀបលើប្រធានាធិបតីបាន បក្សប្រឆាំងមានតែប្រើមធ្យោបាយ អំពាវនាវប្រជាជន អោយធ្វើបាតុកម្ម ដាក់សម្ពាធលើលោកម៉ាឌុយរ៉ូ រឺក៏សុំអោយប្រជាជនផ្តិតស្នាមមេដៃ ដើម្បីអាចរៀបចំការបោះឆ្នោតប្រជាមតិ ទំលាក់លោកម៉ាឌុយរ៉ូ ពីអំណាច។ កាលពីថ្ងៃ១កញ្ញា សកម្មជនបក្សប្រឆាំងរាប់សែននាក់បានចុះតាមដងផ្លូវបាតុកម្មអោយលោកម៉ាឌុយរ៉ូ ចុះពីអំណាច និងជំរុញអោយមានការរៀបចំប្រជាមតិ អោយបានឆាប់រហ័ស។
កន្លងមក បក្សប្រឆាំងបានទទួលស្នាមមេដៃគ្រប់ចំនួន ពីប្រជាជនទូទាំងប្រទេស ស្របតាមច្បាប់ ដើម្បីរៀបចំប្រជាមតិ។ ប្រជាមតិនេះអាចនឹងធ្វើនៅមុនថ្ងៃ១០មករា ដើម្បីអាចរៀបចំការបោះឆ្នោតមុនអាណត្តិ។ ប៉ុន្តែ សប្តាហ៏មុននេះ រដ្ឋអំណាចក៏ស្រាប់តែព្យួរការរៀបចំប្រជាមតិទៅវិញ។ ប្រជាមតិចង់ទំលាក់លោកម៉ាឌុយរ៉ូ ម្ល៉ោះហើយ លោកម៉ាឌុយរ៉ូពិតជាមិនអាចអោយរៀបចំវាទៅបានទេ។
ម្ល៉ោះហើយ បានជាបក្សប្រឆាំងខឹងសម្បារយ៉ាងនេះ នៅតែទាមទារអោយធ្វើការតវ៉ាប្រឆាំង។ ក្រុមប្រឆាំងបានអំពាវនាវអោយនាំគ្នាធ្វើបាតុកម្ម នៅថ្ងៃព្រហស្បតិ៍សប្តាហ៍ក្រោយនេះទៀត នៅពីមុខវិមានប្រធានាធិបតី។
ម្សិលមិញនេះ ក្នុងការតវ៉ា ក្រុមបាតុករនិងប៉ូលិសបានប៉ះទង្គិចគ្នា នៅជិតសភា។ មិនដឹងថា ចលនាតវ៉ាទំលាក់លោកម៉ាឌុយរ៉ូ អាចធ្វើឡើងបានយ៉ាងណាទៅមុខទេ ព្រោះលោកម៉ាឌុយរ៉ូគំរាមប្រើទ័ពអន្តរាគមន៍ នៅតាមសហគ្រាសដែលធ្វើកូដកម្ម។ ម្យ៉ាងទៀត កងទ័ពក៏បង្ហាញជំហរ គាំទ្រប្រធានាធិបតីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ