នាវាវៀតណាមនិងចិនប្រឈមមុខដាក់គ្នានៅសមុទ្រចិនខាងត្បូង
ជម្លោះនៅសមុទ្រចិនខាងត្បូង បានឡើងកម្តៅកាន់តែខ្លាំង នៅក្រោយពេលមានការប៉ះទង្គិចគ្នា រវាងនាវាល្បាតវៀតណាម និងនាវាចិន នៅតំបន់ជាប់ជម្លោះ។ ក្រសួងការបរទេសវៀតណាមបានអះអាង កាលពីពុធថា នាវារបស់ចិនជាច្រើនគ្រឿង បានបើកកៀរនាវាល្បាតវៀតណាមដោយចេតនា កាលពីថ្ងៃអាទិត្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ហេតុការណ៍បានកើតមានឡើង កាលពីថ្ងៃអាទិត្យ ៤ឧសភា នៅក្នុងពេលដែលនាវាល្បាតវៀតណាម បានព្យាយាមរារាំងនាវាចិន ដែលចង់ចូលទៅខួងបូមប្រេង ក្រោមបាតសមុទ្រ ក្នុងប្រជុំកោះ Paracel ដែលជាតំបន់កំពុងជាប់ជម្លោះជាមួយវៀតណាម។
យោងតាមក្រសួងការបរទេសវៀតណាម នាវាចិនជាច្រើនគ្រឿង ដោយមានជំនួយពីយន្តហោះផង ដែលបើកអមការពារនាវាបូមប្រេងចិន បានបាញ់ទឹកទៅលើនាវាល្បាតវៀតណាម ព្រមទាំងបានបើកកៀរនាវាវៀតណាមដោយចេតនា បណ្តាលឲ្យមនុស្ស ៦នាក់ រងរបួសស្រាល។
មេបញ្ជាការរងនៃប៉ូលិសល្បាតដែនសមុទ្រវៀតណាមក៏បានអះអាងផងដែរថា ការប្រឈមមុខដាក់គ្នា រវាងនាវាវៀតណាម និងនាវាចិន កំពុងស្ថិតក្នុងសភាពតានតឹងខ្លាំង ក៏ប៉ុន្តែ មិនមានការផ្ទុះអាវុធនោះទេ។ តែមន្រ្តីដដែលបានព្រមានថា ប្រសិនបើនាវាចិននៅតែបន្តវាយប្រហារលើនាវាវៀតណាមតទៅទៀត វៀតណាមប្រាកដជានឹងត្រូវចាត់វិធានការ ដើម្បីការពារខ្លូន។
គួរបញ្ជាក់ថា រដ្ឋាភិបាលក្រុងប៉េកាំងបានប្រកាស កាលពីថ្ងៃសៅរ៍ថា ខ្លួននឹងបញ្ជូននាវាឲ្យចូលទៅខួងបូមប្រេងក្រោមបាតសមុទ្រ នៅក្នុងតំបន់ប្រជុំកោះ Paracel ដោយអះអាងថា វាគឺជាសិទ្ធិរបស់ចិន ព្រោះ តំបន់នេះស្ថិតនៅក្នុងទឹកដីរបស់ចិន។ ក៏ប៉ុន្តែ វៀតណាមវិញបានអះអាងថា សកម្មភាពខួងបូមប្រេងដោយនាវាចិននេះ គឺជា “សកម្មភាពខុសច្បាប់”។
កាលពីថ្ងៃអង្គារ សហរដ្ឋអាមេរិកបានព្រមានចិនថា ការចូលទៅខួងបូមប្រេងនៅក្នុងតំបន់ជាប់ជម្លោះនេះ គឺជា “សកម្មភាពបង្កហេតុ” ហើយថា អាមេរិកកំពុងតាមដានមើលយ៉ាងជិតដិតបំផុត ទៅលើសកម្មភាពទាំងនេះ។
កាលពីថ្ងៃអង្គារ នៅឯប៉ែកម្ខាងទៀតនៃសមុទ្រចិនខាងត្បូង គឺនៅឯម្តុំប្រជុំកោះ Spratley នាវានេសាទចិនមួយគ្រឿង ដែលមានអ្នកនេសាទ ១១នាក់ ត្រូវបានឆ្មាំល្បាតដែនសមុទ្រហ្វីលីពីនចាប់ទុក ដោយចោទថា បានចូលទៅនេសាទដោយខុសច្បាប់ នៅក្នុងដែនទឹករបស់ហ្វីលីពីន។
អ្នកនាំពាក្យក្រសួងការបរទេសចិនបានទាមទារឲ្យរដ្ឋាភិបាលហ្វីលីពីនធ្វើការបកស្រាយពីការចាប់ខ្លួនទូកនេសាទនេះ ព្រមទាំងបានទាមទារឲ្យដោះលែងទាំងទូក និងទាំងអ្នកនេសាទចិនមកវិញទាំងអស់។
គួររំឭកឡើងវិញថា ចិនទាមទារយកសមុទ្រចិនខាងត្បូងស្ទើរតែទាំងស្រុងមកដាក់ជាទឹកដីរបស់ខ្លួន នៅក្នុងពេលដែលវៀតណាម ហ្វីលីពីន ម៉ាឡេស៊ី ព្រុយណេ ព្រមទាំងកោះតៃវ៉ាន់ ក៏មានការទាមទារផ្នែកខ្លះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ