វៀតណាមដោះលែងអ្នកទោសមនសិការជាកូនជនកុម្មុយនិស្តស្និទ្ធនឹងហូជីមិញ
ជាសកម្មជនការពារសិទ្ធិមនុស្ស និងបរិស្ថាន និងជាកូនប្រុសរបស់សកម្មជនកុម្មុយនិស្តស្និទ្ធនឹងមេបក្ស ហូ ជីមិញ លោក គូ ហ៊ុយ ហា វូ (Cu Huy Ha Vu) ត្រូវបានគេដោះលែងឱ្យចេញពីពន្ធនាគារ និងបានចាកចេញពីប្រទេសវៀតណាមសំដៅសហរដ្ឋអាមេរិក។ នេះបើតាមប្រភពព័ត៌មានអាមេរិក។ លោក គូហ៊ុយហាវូ ត្រូវបានតុលាការប្រជាជនក្រុងហាណូយកាត់ទោសឲ្យជាប់ពន្ធនាគារ ៧ ឆ្នាំពីបទ បាន “ឃោសនានយោបាយប្រឆាំងនឹងរដ្ឋអំណាច” វៀតណាម កាលពីឆ្នាំ២០១១។
ចុះផ្សាយនៅថ្ងៃ៖
ស្តាប់ - ០១:៤៧
រដ្ឋាភិបាលក្រុងហាណូយ មិនបានបញ្ជាក់ថាអំពីមូលហេតុនៃការដោះលែងអ្នកទោសមនសិការដែលបណ្តាជនវៀតណាមគាំទ្រយ៉ាងខ្លាំងនោះទេ។ ចំណែកមេធាវីលោក គូ ហ៊ុយ ហា វូ វិញ បានត្រឹមអះអាងថា ហេតុផលនៃការបើកចំហបន្ធូរបន្ថយទោសនេះ មិនច្បាស់លាស់ឡើយ។ ប៉ុន្តែយ៉ាងណាក៏ដោយ ការផ្តល់សេរីភាពដល់បណ្ឌិតច្បាប់ ដែលធ្លាប់ដាក់បណ្តឹងប្រឆាំងនឹងនាយករដ្ឋមន្ត្រីវៀតណាម លោក Nguyen Tan Dung ផ្ទាល់ កាលពីឆ្នាំ២០០៩ ត្រូវបានស្វាគមន៍ពីសំណាក់សហរដ្ឋអាមេរិក និងជាលទ្ធផលនៃការខិតខំប្រឹងប្រែងទាមទាររហូតមករបស់ក្រុមអ្នកការពារសិទ្ធិមនុស្ស និងរដ្ឋាភិបាលបរទេស។
សំណុំរឿងកាត់ទោសលោក វូ កាលពីឆ្នាំ២០១១ ត្រូវបានគេចាត់ទុកថាមានលក្ខណៈនយោបាយបំផុតមួយ។ កាលណោះតុលាការក្រុងហាណូយ ដែលបានបើកសវនការតែមួយព្រឹកគត់ ក្រោមការការពារ យ៉ាងហ្មត់ចត់បំផុត រួចផ្តល់សាលក្រមភ្លាមក្នុងថ្ងៃតែមួយ បានសម្រេចដាក់ទោសលោកបណ្ឌិតច្បាប់ឱ្យជាប់ពន្ធនាគារ៧ឆ្នាំ ពីបទធ្វើសកម្មភាពប្រឆាំងរដ្ឋាភិបាល សម្តីនិងសំណេរ មានលក្ខណៈមួលបង្កាច់ បង្ខូចឈ្មោះ គណបក្សកុម្មុយនិស្ត ដែលកំពុងកាន់អំណាច ធ្វើឲ្យសង្គមវៀតណាមអាចទទួលរងការខូចខាត !
ម្យ៉ាងទៀតមកពីលោក វូ ជាកូនប្រុសរបស់ជនកុម្មុយនិស្ត លោក គូហ៊ុយគឹង (Cu Huy Can) ស្និទ្ធនឹងលោក ហូ ជីមិញ។ ឪពុកលោកវូ ឈ្មោះ គូហ៊ុយគឹង គឺជាកវី ដ៏ល្បីល្បាញ ជាជនកុម្មុយនិស្តដ៏សកម្ម និងជាអតីតសមាជិករដ្ឋាភិបាលបដិវត្តិបណ្តោះអាសន្នដំបូង ក្នុងឆ្នាំ១៩៤៥ ដែលបង្កើតឡើងដោយលោក ហូជីមិញ។ កំណាព្យដែលមានក្នុងកម្មវិធីសិក្សានៅតាមសាលារៀន ភាគច្រើនជាស្នាដៃនិពន្ធរបស់លោក Cu Huy Can។
ប៉ុន្តែសេរីភាពក្នុងការបញ្ចេញមតិរបស់លោកវូ មិនស៊ីគ្នាវៀតណាមទំនើបបច្ចុប្បន្ន ដែលហាមឃាត់មិនឱ្យមានសារព័ត៌មានឯកជន មេធាវី សកម្មជនសិទ្ធិមនុស្ស អ្នកបង្កើតប្លុកអ៊ីនធ័រនែត តែងត្រូវឃាត់ខ្លួន និងចាប់ដាក់ពន្ធនាគារដោយគ្មានអ្វីប្រកែកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ