ប្រធានាធិបតីវៀតណាមបន្តទស្សនកិច្ចថ្ងៃទី២នៅកម្ពុជា
ក្នុងថ្ងៃទី២នៃទស្សនកិច្ចរបស់ខ្លួន ប្រធានាធិបតីវៀតណាម លោក ជ្រឿង តឹងសាង (Truong Tan Sang ) បានចូលបង្គំគាល់សម្តេចព្រះមហាសង្ឃរាជទាំងពីរគណៈនិងជួបជាមួយវិនិយោគិនវៀតណាម នៅកម្ពុជាផងដែរ។ ក្នុងជំនួបជាមួយលោកនាយករដ្ឋមន្ត្រីហ៊ុន សែន កាលពីល្ងាចថ្ងៃអង្គារ ភាគីទាំងពីរ បានព្រមព្រៀងជំរុញពាណិជ្ជកម្ម រវាងកម្ពុជា និងវៀតណាមឲ្យដល់ ៥ ០០០លានដុល្លារក្នុងឆ្នាំ ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ដូចការគ្រោងទុក លោក ជ្រឿង តឹងសាង ប្រធានាធិបតីវៀតណាម នៅព្រឹក ថ្ងៃទី២៤ ខែធ្នូនេះ បានជួបថ្វាយបង្គំសម្តេចព្រះមហាសង្ឃរាជ ទេព វង្ស នៃគណៈមហានិកាយនៅឯវត្តឧណ្ណាឡោម និងសម្តេចព្រះមហាសង្ឃរាជ បួរ គ្រី នៃគណៈធម្មយុត្តិកនិកាយនៅវត្តស្វាយអំពែ។ ប្រមុខរដ្ឋទីក្រុងហាណូយ ក៏បានជួបជាមួយវិនិយោគិនវៀតណាមដែលកំពុងប្រកបអាជីវកម្ម នៅកម្ពុជាផងដែរ។
គ្មានសេចក្តីរាយការណ៍អំពីខ្លឹមសារនៃជំនួប រវាងប្រមុខរដ្ឋវៀតណាម ជាមួយសម្តេចសង្ឃរាជនោះទេ។ ប៉ុន្តែ ក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីល្ងាចថ្ងៃអង្គារ ភាគីទាំងពីរ បានជំរុញទំហំពាណិជ្ជកម្មឲ្យបានដល់ ៥០០០លានដុល្លារក្នុងឆ្នាំ ២០១៥ ។ ក្នុងជំនួបជាមួយលោក ហេង សំរិន ប្រធានរដ្ឋសភា កាលពីថ្ងៃអង្គារដែរ លោក ជ្រឿង តឹងសាង បានសុំឲ្យកម្ពុជាជួយការពារជនជាតិវៀតណាម ដែលកំពុងរស់នៅ និងប្រកបអាជីវកម្មនៅកម្ពុជាស្របតាមច្បាប់អន្តរជាតិ។
ការបោះបង្គោលព្រំដែនដែលនៅមិនទាន់យល់ស្របគ្នាត្រង់ចំណុចមួយចំនួននោះ ក៏ត្រូវបានភាគីទាំងពីរជំរុញឲ្យបញ្ចប់ឲ្យបានឆាប់ផងដែរ។ នេះបើយោងតាមអ្នកនាំពាក្យនៃជំនួបទាំងពីរ។ ប៉ុន្តែ គ្មានព័ត៌មានថា មេដឹកនាំកម្ពុជា និងវៀតណាមបានជជែកគ្នាអំពីករណីជនជាតិម៉ុងតាញ៉ាវៀតណាម ឬក៏បញ្ហាខ្មែរកម្ពុជាក្រោមនោះទេ។
លោក ជ្រឿង តឹងសាង បានមកដល់ភ្នំពេញកាលពីព្រឹកថ្ងៃអង្គារ ក្នុងដំណើរទស្សនកិច្ចជាផ្លូវរដ្ឋរយៈពេលពីរថ្ងៃនៅកម្ពុជា។ ទស្សនកិច្ចនេះ ធ្វើឡើងតបតាមការអញ្ជើញរបស់ព្រះមហាក្សត្រ សម្តេចព្រះបរមនាថ នរោត្តម សីហមុនី។ យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ភាគីទាំងពីរគ្រោងចេញសេចក្តីប្រកាសរួមគ្នាមួយនៅចុងបញ្ចប់នៃទស្សនកិច្ចរបស់លោក ជ្រឿង តឹងសាង នារសៀលថ្ងៃពុធនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ